Top News

တရုတ်ထံမှ တင်သွင်းသည့် KN95 နှာခေါင်းစည်းအရေအတွက် တစ်သန်းခန့်သည် သတ်မှတ်စံချိန်စံညွှန်းများနှင့် ကိုက်ညီမှု မရှိသည့်အတွက် ကိုရိုနာဗိုင်းရပ်စ် ကူးစက်ပျံ့နှံ့မှု ဖြစ်ပွားနေသည့်ကာလအတွင်း ရောဂါတိုက်ဖျက်ရေးလုပ်ငန်းကို ရှေ့တန်းမှ ဆောင်ရွက်နေကြသော ကျန်းမာရေးဝန်ထမ်းများအား ထိုနှာခေါင်းစည်းများ ပေးဝေရန် မဖြစ်နိုင်တော့ကြောင်း ကနေဒါအစိုးရအဖွဲ့က ဧပြီ ၂၄ ရက်တွင် ထုတ်ပြန်ခဲ့သည်။

ခန့်မှန်းခြေ အရေအတွက် တစ်သန်းခန့်ရှိသော KN95 နှာခေါင်းစည်းများသည် ကျန်းမာရေး စောင့်ရှောက်မှုနှင့် သက်ဆိုင်သော သတ်မှတ်ချက်များနှင့်ညီညွတ်မှု မရှိဟု ကနေဒါပြည်သူ့ကျန်းမာရေးအဖွဲ့က အတည်ပြုခဲ့ကြောင်း၊ ရောဂါကုသရေး တုံ့ပြန်ဆောင်ရွက်မှုကို အရဲစွန့်လုပ်ဆောင်ကြရာ နယ်မြေဒေသများ၊ ပြည်နယ်များသို့ ထိုနှာခေါင်းစည်းများကို ပေးဝေမည်မဟုတ်ကြောင်း ပြောခွင့်ရပုဂ္ဂိုလ်တစ်ဦးက အေအက်ဖ်ပီသို့ ပြောကြားခဲ့သည်။

တရုတ်ထုတ် KN95 နှာခေါင်းစည်းများသည် N95 နှာခေါင်းစည်း၊ ဥရောပတွင် အသုံးပြုနေသည့် FFP2 နှာခေါင်းစည်းများနှင့် ပုံစံဆင်တူသည်။

ကမ္ဘာတစ်ဝန်းတွင် အသုံးပြုနေသော ကုန်ပစ္စည်းအများစုသည် တရုတ်တွင် ထုတ်လုပ်ခြင်းဖြစ်ကြောင်း၊ ကနေဒါရှိ ကုမ္ပဏီများအနေဖြင့် ခွဲစိတ်ခန်းသုံး နှာခေါင်းစည်းများ၊ ရောဂါကာကွယ်ရေးဝတ်ရုံရှည်များ၊ လက်သန့်ဆေးရည်များ၊ အသက်ရှူ အထောက်အကူပြုကိရိယာများစသော ကာကွယ်ရေးပစ္စည်းများ ထုတ်လုပ်ခြင်းကို တိုးမြှင့်လုပ်ဆောင်ကြရန် အစိုးရက တိုက်တွန်းထားကြောင်း ပြည်သူ့ဝန်ဆောင်မှုနှင့် ကုန်ကြမ်းဝယ်ယူမှုဝန်ကြီးဌာန ဝန်ကြီး အန်နီတာအာနန်က ဆိုသည်။

 တစ်ချိန်တည်းမှာပင် ကနေဒါသည် တရုတ်မှ ကုန်ကြမ်းများအပါအဝင် နိုင်ငံတကာမှ ကုန်ကြမ်းများကို နိုင်ငံတွင်းသို့ သယ်ယူရန် လိုအပ်နေသေးကြောင်း ၎င်းက ပြောကြားခဲ့သည်။

၂၀၁၈ ခုနှစ် ဒီဇင်ဘာလတွင် ကနေဒါ၌ တရုတ်ဆက်သွယ်ရေး နည်းပညာလုပ်ငန်း Huawei ၏အမှုဆောင် အရာရှိ မုန်ဝမ်ကျိုး ဖမ်းဆီးခံရပြီးနောက်ပိုင်း ကနေဒါနှင့် တရုတ်၏ ဆက်ဆံရေးအခြေအနေမှာ ပျက်ပြားတော့မည့် အနေအထားတွင် ရှိခဲ့သည်။

အသက်ရှူကိရိယာများနှင့် N95 နှာခေါင်းစည်း သန်းပေါင်းများစွာကို လတ်တလောတွင် ကနေဒါပြည်သူ့ကျန်းမာရေးအဖွဲ့က စေ့စေ့စပ်စပ် ကြည့်ရှုစစ်ဆေးမှု လုပ်ဆောင်နေကြောင်း အာနန်က ဆိုသည်။

ပြည်တွင်း၌ နှာခေါင်းစည်းထုတ်လုပ်မှုနှင့် အခြားသော ဆေးဘက်ဆိုင်ရာပစ္စည်းများ ထုတ်လုပ်မှုနှုန်း မြင့်တက်နေချိန်အတွင်း ကနေဒါကုမ္ပဏီသုံးခုထက်မနည်းနှင့် ယခု သီတင်းပတ်တွင် ချုပ်ဆိုထားသော စာချုပ်များအရ ထိုကုမ္ပဏီများသည် ဆေးဘက်ဆိုင်ရာ သုံးမျက်နှာကာပစ္စည်းအရေအတွက် ၁၆ သန်း ထုတ်လုပ်မည်ဖြစ်သည်။

မော်တော်ကားထုတ်လုပ်သည့် ကုမ္ပဏီ General Motors က ကုမ္ပဏီအနေဖြင့် ၎င်း၏ Oshawa ပစ္စည်းတပ်ဆင်ရေးစက်ရုံ၌ တစ်လလျှင် နှာခေါင်းစည်းအရေအတွက် တစ်သန်းနှုန်းဖြင့် ကနေဒါအစိုးရအတွက် စတင်ထုတ်လုပ်သွားမည်ဖြစ်ကြောင်း ထုတ်ပြန်ခဲ့သည်။

General Motors ကုမ္ပဏီ၏ Ohswa စက်ရုံကို ၂၀၁၉ ခုနှစ် ဒီဇင်ဘာလတွင် ပိတ်သိမ်းခဲ့ပြီးဖြစ်သော်လည်း နှာခေါင်းစည်း ထုတ်လုပ်ရန်အတွက် ကုမ္ပဏီဝန်ထမ်း ၅၀ ကို ပြန်လည်ခေါ်ယူရန်ကိစ္စမှာ စိတ်လှုပ်ရှားစရာဖြစ်ကြောင်း ကုမ္ပဏီ၏အလုပ်သမား သမဂ္ဂခေါင်းဆောင် ဂျယ်ရီဒိုင်အက်စ်က ဆိုသည်။

စက်ရုံပိတ်သိမ်းခဲ့ချိန်က ထိုမော်တော်ကားကုမ္ပဏီတွင် အလုပ်လုပ်ကိုင်နေကြသည့် ဝန်ထမ်း ၂၀၀၀ ခန့်မှာ အလုပ်အကိုင် ဆုံးရှုံးခဲ့ကြသည်။

ဧပြီလအစောပိုင်းတွင် ကနေဒါသည် ၎င်းတို့ မှာယူထားသော နှာခေါင်းစည်းအရေအတွက် ၁၀ သန်းကျော်ကို လက်ခံရရှိခဲ့ပြီး နောက်ထပ် N95 နှာခေါင်းစည်း သန်း ၆၀ ကျော်ကို မှာယူထားကြောင်း ကြေညာခဲ့သည်။