Top News

ဘရာဇီးနိုင်ငံတစ်ဝန်းတွင် ကိုရိုနာဗိုင်းရပ်စ် ကူးစက်မှုသစ်အရေအတွက် မြင့်တက်လာမှုကြောင့် ဆေးရုံများ၊ ရေခဲတိုက်များ၊ မီးသဂြုႋဟ်သည့် နေရာများအား ဝန်ပိစေခဲ့ပြီး လက်တင်အမေရိက၏ အကြီးဆုံးနိုင်ငံသည် ကမ္ဘာ့ကပ်ရောဂါ၏ ကူးစက်ပျံ့နှံ့မှု ဗဟိုချက်သစ်တစ်ခု ဖြစ်လာရန် ရုတ်တရက် နီးကပ်လာနေသည်။

ရီယိုဒီဂျနေရိုးနှင့် အခြားမြို့ကြီးလေးခုမှ ဆေးဘက်ဆိုင်ရာ တာဝန်ရှိသူများက ၎င်းတို့၏ ဆေးရုံလည်ပတ်မှုစနစ်များသည် ပြိုလဲလုနီး သို့မဟုတ် မည်သည့်လူနာကိုမျှ ထပ်မံ လက်မခံနိုင်တော့သည်အထိ အလွန်အမင်း ဝန်ပိမှုကို ကြုံနေရကြောင်း သတိပေးခဲ့ကြသည်။

လူဦးရေ ၂၁၁ သန်း ရှိသောနိုင်ငံတွင် ဗိုင်းရပ်စ်စမ်းသပ် စစ်ဆေးမှုများသည် မလုံလောက်မှုနှင့် နှောင့်နှေးမှုများကြောင့် ထုတ်ပြန်ထားသော ကူးစက်မှု အတည်ပြုလူနာ အရေအတွက်သည် ယင်းထက် ပိုမိုများပြားမည်ဟု ကျန်းမာရေးကျွမ်းကျင်သူများက မျှော်မှန်းထားကြသည်။

COVID-19 ရောဂါသည် အတော်အသင့် အပျော့စားရောဂါတစ်မျိုးဖြစ်ပြီး ကျယ်ပြန့်သော လူမှုဆိုင်ရာ ခွာခွာကင်းကင်း နေထိုင်မှုစနစ်များသည် ထိုရောဂါအား တိုက်ဖျက်ရန်အတွက် မလိုအပ်ကြောင်း သမ္မတ ဘော်ဆွန်နာရိုက ၎င်း၏အခိုင်အမာ ပြောကြားထားမှုများကို အလျှော့ပေးမည့် အရိပ်အယောင်များ မပြသသေးပေ။

အခြေအနေ အလွန်အမင်းစိုးရိမ်ရသူများကိုသာ သီးခြားခွဲထားသင့်ကြောင်းလည်း ၎င်းက ပြောကြားခဲ့သည်။

အမေဇုန်၏ အကြီးဆုံးမြို့ Manaus တွင် သေဆုံးသူ အလွန်များပြားခြင်းကြောင့် သချုႋင်းတစ်ခုတွင် ဧရာမတွင်းများကို မဖြစ်မနေ တူးခဲ့ရကြောင်း တာဝန်ရှိသူများက ပြောကြားခဲ့ကြသည်။ အလုပ်သမားများသည်  ယခုအခါ တစ်နေ့လျှင် အလောင်း ၁၀၀ ကို မြှုပ်နှံပေးနေရပြီး ဗိုင်းရပ်စ်ကူးစက်မှု မဖြစ်ပေါ်မီက ပျမ်းမျှ မြှုပ်နှံရမှုထက် သုံးဆ မြင့်တက်လာခြင်းဖြစ်သည်။

လတ်တလောအချိန်အထိ ဘရာဇီးတွင် COVID-19 ကူးစက်သည့် အတည်ပြုလူနာ ၅၃၀၀၀ နီးပါးနှင့် သေဆုံးသူ ၃၆၀၀ ကျော်ရှိကြောင်း အစိုးရက ထုတ်ပြန်ခဲ့သည်။ တရားဝင် ထုတ်ပြန်မှုများအရ ဧပြီ ၂၃ တွင် ဗိုင်းရပ်စ် ကူးစက်သူသစ် ၃၇၀၀ ခန့်နှင့် သေဆုံးသူ ၄၀၀ ကျော် ရှိမှုကြောင့် အဆိုးရွားဆုံးနေ့ တစ်နေ့အဖြစ် မှတ်တမ်းဝင်ခဲ့သည်။

ရောဂါစစ်ဆေးမှု အလွန်အမင်းနည်းပါးမှုကြောင့် ကူးစက်ခံရသူ အမှန်တကယ် အရေအတွက်သည် ယင်းထက် အလွန်အမင်း ပိုများနိုင်ကြောင်း ကျွမ်းကျင်သူများက သတိပေးခဲ့ကြသည်။ စမ်းသပ်မှုများအား ဆောင်ရွက်ရန် အချိန်အများကြီး ယူရနိုင်သောကြောင့် လတ်တလော ကိန်းဂဏန်းများသည် ပြီးခဲ့သောတစ်ပတ် သို့မဟုတ် နှစ်ပတ်ခန့်က သေဆုံးမှုများကို အမှန်တကယ် ထင်ဟပ်ကြောင်း ထိုအစီအစဉ်တွင် ပါဝင်ခဲ့သော ဆော်ပေါ်လိုတက္ကသိုလ်မှ Social Medicine ဆိုင်ရာ တွဲဖက်ပါမောက္ခ Domingos Alves က ပြောကြားခဲ့သည်။

ဆော်ပေါ်လိုတက္ကသိုလ်၊ ဘရာစီလီယာ တက္ကသိုလ်နှင့် အခြားတက္ကသိုလ်များမှ သိပ္ပံပညာရှင်များက ယခုသီတင်းပတ်အထိ ဗိုင်းရပ်စ်ကူးစက်ခံရသူ အမှန်တကယ် အရေအတွက်သည် ၅၈၇၀၀၀ မှ ၁.၁ သန်းအထိ ဖြစ်နိုင်ခြေရှိကြောင်း ပြောကြားခဲ့ကြသည်။

ကျန်းမာရေးဝန်ကြီးဌာနက ယခုလအစောပိုင်းတွင် ထုတ်ပြန်ခဲ့သောအစီရင်ခံစာ၌ ဘရာဇီးတွင် တစ်နေ့လျှင် လူ ၆၇၀၀ ကို ဗိုင်းရပ်စ်စစ်ဆေးနိုင်စွမ်းရှိကြောင်း ဖော်ပြခဲ့ရာ ဗိုင်းရပ်စ်ကူးစက်မှု အထွတ်အထိပ်သို့ ရောက်ရှိစဉ် တစ်နေ့လျှင် အကြမ်းဖျင်းအားဖြင့် လူ ၄၀၀၀၀ အထိ စစ်ဆေးရန် လိုအပ်မှုနှင့်နှိုင်းယှဉ်ပါက အလွန်အမင်း ကွာဟနေခဲ့သည်။

ရောဂါစစ်ဆေးမှုအား လတ်တလော လုပ်ဆောင်နေမှုနှုန်းထက် ပိုမို၍ ပြုလုပ်သင့်ကြောင်း၊ သို့သော် မိမိတို့၏ ဓာတ်ခွဲခန်းများတွင် အံကုန်လုပ်ဆောင်နေခြင်းဖြစ်ကြောင်း ကပ်ရောဂါ တိုက်ဖျက်ရေးနှင့်ပတ်သက်၍ ဘရာဇီးအရှေ့မြောက်ပိုင်း Ceara ပြည်နယ်တွင် အစိုးရတာဝန်ရှိသူများအား အကြံဉာဏ် ပေးနေရသည့် Sao Jose ဆေးရုံမှ ကူးစက်ရောဂါဆိုင်ရာ အထူးကု ကင်နီကိုလာရက်စ်က ပြောကြားခဲ့သည်။

ယင်းအချိန်တွင် ကျန်းမာရေးဝန်ထမ်းများမှာမူ တွေ့ရှိခဲ့သမျှ ကူးစက် အတည်ပြုလူနာ အရေအတွက်ကိုသာ ကိုင်တွယ်နိုင်ရုံ အနေအထား ဖြစ်နေသည်။

ရီယိုပြည်နယ်တွင် COVID-19 ရောဂါအား ကုသရန် ပြင်ဆင်ထားသော အစိုးရ ဆေးရုံခုနစ်ရုံအနက် ခြောက်ရုံတွင် လူနာပြည့်နေပြီဖြစ်ပြီး ထိုလူနာများ ပြန်လည်သက်သာသွားခြင်း သို့မဟုတ် သေဆုံးသွားခြင်း ဖြစ်မှသာ လူနာသစ်ကို လက်ခံနိုင်တော့မည်ဖြစ်ကြောင်း ကျန်းမာရေးဝန်ကြီးဌာန၏ သတင်းပြန်ကြားရေးရုံးက ထုတ်ပြန်ခဲ့သည်။ နေရာလွတ်နေသော ကျန်ဆေးရုံမှာ မြို့တော်ဗဟိုချက်မှ ကားဖြင့် နှစ်နာရီကြာ သွားရသော အကွာအဝေး၌ ရှိနေသည်။

သမ္မတဘော်ဆွန်နာရိုကမူ နိုင်ငံထဲ၌ ဗိုင်းရပ်စ်ကူးစက်ပျံ့နှံ့မှုနှင့် ပတ်သက်၍ ကျန်းမာရေးတာဝန်ရှိသူများ၏ အရေးတကြီး သတိပေးမှုများကို ပယ်ချနေဆဲဖြစ်သည်။ ပြင်းထန်သော ဗိုင်းရပ်စ်ကာကွယ်ရေး ဆောင်ရွက်ချက်များ ချမှတ်ရန် ထောက်ခံသည့် ကျန်းမာရေးဝန်ကြီးကို သမ္မတက ထုတ်ပယ်ခဲ့ပြီး စီးပွားရေးပြန်ဖွင့်ရန် လှုံ့ဆော်သူတစ်ဦးဖြင့် အစားထိုးခန့်အပ်ခဲ့သည်။