Top News

Google နှင့် Facebook ကဲ့သို့သော နည်းပညာလုပ်ငန်းကြီးများသည် ၎င်းတို့ ပြန်လည်အသုံးပြုနေသော သတင်းကြောင်းအရာများအတွက် သက်ဆိုင်သည့် ဒေသန္တရမီဒီယာများကို အကျိုးအမြတ် ပြန်လည်ခွဲဝေပေးရန် လိုအပ်ကြောင်း ဥပဒေပြဋ္ဌာန်းသွားမည်ဟု ဩစတြေးလျအစိုးရက ဧပြီ ၂၀ တွင် ကြေညာခဲ့သည်။

ကိုရိုနာဗိုင်းရပ်စ်ကြောင့် ကြော်ငြာဝင်ငွေ ကျဆင်းခဲ့ပြီး ဩစတြေးလျမီဒီယာများ အထိနာခဲ့ချိန်တွင် ယခုကြေညာချက် ထွက်လာခဲ့ခြင်းလည်း ဖြစ်သည်။

“ COVID-19 က မီဒီယာကို ကြီးမားတဲ့သက်ရောက်မှု ရှိပါတယ်။ အဲဒါကြောင့် နည်းပညာလုပ်ငန်းတွေဟာ မီဒီယာလုပ်ငန်းအတွက် ရေရှည်တည်တံ့မယ့် သဘောတူညီချက်တစ်ရပ် ဖော်ထုတ်ပေးဖို့ ဖိအားဖြစ်လာပါတယ်” ဟု News Media Alliance ၏အမှုဆောင်ချုပ် ဒေးဗစ်ချာဗန်းက BuzzFeed News သို့ ပြောကြားခဲ့သည်။

ထိုကြိုးပမ်းမှုအောင်မြင်ပါက ဩစတြေးလျသည် နည်းပညာလုပ်ငန်းများအား ၎င်းတို့အသုံးပြုသော သတင်းအကြောင်းအရာများအတွက် အကျိုးအမြတ်ပေးရန် ဆောင်ရွက်နိုင်သော ပထမဆုံးနိုင်ငံ တစ်နိုင်ငံဖြစ်လာမည်ဖြစ်သည်။

ပြင်သစ်၊ စပိန်နှင့် ဂျာမနီအစိုးရများသည် ပြီးခဲ့သည့်ဆယ်စုနှစ်က Google နှင့် Facebook ကို အလားတူ ဖိအားများပေးရန် ကြိုးပမ်းခဲ့သော်လည်း မအောင်မြင်ခဲ့ပေ။

အမေရိကန်တွင်လည်း အလားတူ ဥပဒေများ ပြဋ္ဌာန်းရန် News Media Alliance က ကြိုးပမ်းနေသည်။

American University မှ Journalism Division ၏ဒါရိုက်တာ Amy Eisman က သတင်းမီဒီယာလုပ်ငန်းအား ရန်ပုံငွေထောက်ပံ့မှုတွင် အစိုးရပါဝင်ပတ်သက်ပါက သတင်းတင်ဆက်မှုအား အစိုးရထိန်းချုပ်မှုဆီ ဦးတည်သွားနိုင်ကြောင်း BuzzFeed News သို့ ပြောကြားခဲ့သည်။

နည်းပညာကုမ္ပဏီများအား အခွန်ပြဋ္ဌာန်းခြင်းသို့မဟုတ် အခြားနည်းလမ်းများဖြင့် မီဒီယာများ ဝင်ငွေပိုမိုရရှိစေခြင်းကို အစိုးရများက ကူညီဆောင်ရွက်ပေးခြင်းကို ထောက်ခံကြောင်း သူက ပြောကြားခဲ့သည်။

ဒီဂျစ်တယ် နည်းပညာလုပ်ငန်းများနှင့် မီဒီယာလုပ်ငန်းများအကြား ဆက်ဆံရေးကို ထိန်းကွပ်ရန်အတွက် ယခုနှစ် နိုဝင်ဘာတွင် ဥပဒေတစ်ရပ်ပြဋ္ဌာန်းရန် ကြိုးပမ်းမှုသည် တိုးတက်မှုမရရှိဘဲ ပျက်ပြားသွားခဲ့ကြောင်း၊ ဩစတြေးလျဘဏ္ဍာရေးဝန်ကြီး ဂျို့ဖရိုင်းဒန်ဘတ်က ပြောကြားခဲ့သည်။

နည်းပညာလုပ်ငန်းများနှင့် ငွေပေးငွေချေဆိုင်ရာ စည်းမျဉ်းများကို ဆွေးနွေးခဲ့ရာ ကြန့်ကြာနေခဲ့ပြီးနောက် ဩစတြေးလျအစိုးရသည် ယှဉ်ပြိုင်မှုရေးရာနှင့်စားသုံးသူရေးရာ ကော်မရှင် Australian Competition and Consumer Commission (ACCC) ကို မူဘောင်တစ်ခု ရေးဆွဲရန် တာဝန်ပေးခဲ့သာ်ဟု ဆိုသည်။

ဥပဒေကို မဖြစ်မနေ လိုက်နာရန် လိုအပ်သောထိုပြဋ္ဌာန်းချက်ကို ဇူလိုင်မတိုင်မီတွင် ACCC က တင်သွင်းရမည်ဖြစ်ပြီး တင်သွင်းပြီး မကြာမီ ဥပဒေအဖြစ် အာဏာတည်မည်ဖြစ်ကြောင်း ဘဏ္ဍာရေးဝန်ကြီးက ပြောကြားခဲ့သည်။

ထိုဥပဒေတွင် အချက်အလက်မျှဝေရေး၊ သတင်းမှရရှိသော ဝင်ငွေကို ခွဲဝေရေး၊ အငြင်းပွားမှုဖြေရှင်းရေး၊ ပြစ်ဒဏ်များ သတ်မှတ်ရေးတို့ ပါဝင်မည်ဖြစ်သည်။

ဩစတြေးလျ၏ အွန်လိုင်းကြော်ငြာဈေးကွက်သည် တစ်နှစ်လျှင် ဒေါ်လာ ၅.၇၂ ဘီလျံအထိ တန်ဖိုးရှိသည်ဟု ဆိုသည်။ ဩစတြေးလျတွင် ကြော်ငြာအတွက် အသုံးစရိတ်၏သုံးပုံတစ်ပုံသည် Google နှင့် Facebook ထံ ရောက်ရှိသွားကြောင်း ယမန်နှစ်ဇွန်က ထုတ်ပြန်သည့် ACCC ၏ အစီရင်ခံစာတွင် ဖော်ပြထားသည်။

ဈေးကွက်ပါဝါကို အလွဲသုံးစားမပြုရန်နှင့် ယှဉ်ပြိုင်မှုကို မပျက်စီးစေရန် သတ်မှတ်သည့် စည်းမျဉ်းများကို လိုက်နာကြရမည်ဖြစ်‌ကြောင်း မလိုက်နာလျှင် ထိန်းချုပ်မှုများ ချမှတ်မည်ဖြစ်ကြောင်း Google နှင့် Facebook ကို ပြီးခဲ့သည့်ဒီဇင်ဘာ၌ ဩစတြေးလျအစိုးရက ပြောကြားခဲ့သည်။

ဩစတြေးလျအစိုးရ၏ ကြေညာချက်ကို စိတ်ပျက်မိကြောင်း၊ ဩစတြေးလျ မီဒီယာလုပ်ငန်းကို ပံ့ပိုးရန်အတွက် ဒေါ်လာသန်းပေါင်းများစွာ ရင်းနှီးမြှုပ်နှံခဲ့ကြောင်း Facebook ၏ ဩစတြေးလျနှင့် နယူဇီလန်ဆိုင်ရာ ဒါရိုက်တာ ဝေအီစတန်က E-mail နှင့် ထုတ်ပြန်သောကြေညာချက်တွင် ပြောကြားခဲ့သည်။

ဩစတြေးလျ၏ မီဒီယာကျင့်ထုံးဆိုင်ရာ အစီအစဉ်များ၌ ဆက်လက်ပူးပေါင်း ဆောင်ရွက်သွားမည်ဖြစ်ကြောင်း Google က ပြောကြားခဲ့သည်။