Top News

ဘက်မျှသော ဘတ်ဂျက်ကို မလျှော့တမ်းတောင်းဆိုမှုကြောင့် ဘောဂဗေဒပညာရှင် အများအပြား၏ နှစ်ပေါင်းများစွာ လှောင်ပြောင်ခံခဲ့ရပြီး ဖောင်းပွနေကာ အလွန်အမင်း ကုန်ကျစရိတ်မြင့်မားသည်ဟု ရှုမြင်ခံရသော ကျန်းမာရေးစောင့်ရှောက်မှုစနစ်ကြောင့် ဝေဖန်ခံခဲ့ရသော်လည်း ဂျာမနီသည် ယခုအခါ ကိုရိုနာဗိုင်းရပ်စ် ကပ်ရောဂါအား ကိုင်တွယ်ဖြေရှင်းရန် ကောင်းမွန်စွာ ပြင်ဆင်နိုင်ခဲ့ပြီးဖြစ်သည်။

လူအချင်းချင်း ခပ်ခွာခွာ နေထိုင်ခြင်းနှင့် ကူးစက်လူနာများနှင့် ထိတွေ့ဖွယ်ရှိသူများအား အလွန်အမင်း ခြေရာခံစစ်ဆေးခြင်းကဲ့သို့ စောလျင်စွာ ဆောင်ရွက်မှုများသည် ကိုရိုနာဗိုင်းရပ်စ်ကြောင့် သေဆုံးမှုကို အလွန်အမင်းနိမ့်ကျစေခဲ့ကြောင်း ချီးကျူးခံနေရပြီးဖြစ်သည့် ဥရောပ၏ စီးပွားရေးအင်အားအကြီးဆုံးနိုင်ငံ ဂျာမနီက စီးပွားရေးလုပ်ငန်းများအား ကူညီရန်နှင့် အလုပ်သမားများအား လစာ ဆက်လက်ပေးထားနိုင်ရန်အတွက် ဧရာမကူညီရေး အစီအစဉ်ကို စတင်ရန်ဘဏ္ဍာရေးဆိုင်ရာ လုပ်သာကိုင်သာရှိမှု အနေအထား ရှိနေသည်။

ဂျာမနီတွင် လူမှုဆိုင်ရာ ကန့်သတ်ချက်အချို့အား စတင်ဖြေလျှော့ပေးစဉ် ဝန်ကြီးချုပ်အင်ဂျလာမာကယ်က ပြီးခဲ့သော ငါးနှစ်ခန့်တွင် မတူညီသော ကိုရိုနာဗိုင်းရပ်စ်တိုက်ဖျက်ရေး အတွေ့အကြုံကို မှီခိုခဲ့သည့် တောင်ကိုရီးယားကို နမူနာယူကြရန် ပြောကြားခဲ့သည်။

ယင်းအချိန်တွင် အမေရိကန်သမ္မတ ဒေါ်နယ်ထရန့်၏ Twitter ၌ ရေးသားမှုများအား ကျောထောက် နောက်ခံယူလျက် အမေရိကန်၌ ဆန္ဒပြသူအချို့က လမ်းပေါ်ထွက်လာခဲ့ကြသည်။ အမေရိကန်၏  ကျန်းမာရေးစောင့်ရှောက်မှုစနစ် ရုန်းကန်နေရစဉ် သေဆုံးမှု ပိုမိုမြင့်တက်လာနိုင်မှုကို ဦးတည်နေလျှင်ပင် လူသန်းပေါင်းများစွာအား အလုပ်အကိုင်ဆုံးရှုံးစေခဲ့ပြီဖြစ်သည့် ဗိုင်းရပ်စ်နှင့်ဆက်နွှယ်သော Lockdown များကို အဆုံးသတ်ရန် ထိုဆန္ဒပြသူများက တောင်းဆိုခဲ့သည်။

နှစ်ပေါင်းများစွာကတည်းက ဘက်မျှသော ဘတ်ဂျက်ကို ထောက်ခံလာကြသူများက စီးပွားရေး ကောင်းမွန်နေသည့်ကာလအတွင်း ဂျာမနီအား အကျပ်အတည်းအတွက် ကြိုတင်ပြင်ဆင်ထားရန် စီစဉ်မှုသည် ချင့်ချိန်မှုရှိခြင်းဖြစ်ကြောင်း စောဒက တက်ခဲ့ကြသည်။

ဂျာမနီ လူဦးရေ ၈၃ သန်းအတွက် ယူရို ၁ ထရီလျံ (ဒေါ်လာ ၁.၁ ထရီလျံ) ရှိ ကယ်ဆယ်ရေးအစီအစဉ်အား ပြီးခဲ့သောလတွင် ကြေညာခဲ့စဉ် ဘဏ္ဍာရေးဝန်ကြီး Olaf Scholz က လိုအပ်ပါက ငွေကြေးထပ်မံရရှိနိုင်မည်ဟု အာမခံခဲ့သည်။

ယင်းအချိန်တွင် အီတလီနှင့် စပိန်တို့၌ အလွန်အရေးပါနေသော အရေးပေါ်ကြပ်မတ်ကုသဆောင်မှ ခုတင်များကို အရေးတကြီးလိုအပ်နေသည့် သက်ကြီးပိုင်းလူနာများနှင့် အသက်ရှင်ရန် အခွင့်အလမ်း ကောင်းမွန်နေသည့် လူငယ်လူနာများအကြား မည်သူ့အတွက် လျာထားရမည်ကို ဆုံးဖြတ်ရသည်အထိ အကျပ်အတည်း၏ အထွတ်အထိပ်ကို ရောက်ရှိခဲ့သည်။

ဂျာမနီတွင်မူ ယင်းကဲ့သို့ပြတ်လပ်မှု လုံးဝမရှိခဲ့ဘဲ အိမ်နီးချင်း ဥရောပနိုင်ငံအချို့မှ လူနာများကိုပင် လက်ခံကုသပေးနိုင်ခဲ့သည်။

“ သူတို့မှာ နည်းလမ်းတွေရှိတယ်။ နောက်ပြီး နိုင်ငံရေးဆန္ဒလည်း ရှိပြီးတော့ နည်းလမ်းတွေကို အသုံးချဖို့ အရမ်းကောင်းမွန်တဲ့ သုံးသပ်နိုင်စွမ်းလည်း ရှိတယ်” ဟု ING ဘဏ်၏ ယူရိုဇုန်ဘောဂဗေဒပညာရှင် အကြီးအကဲဖြစ်သူ Carsten Brzeski က ပြောကြားခဲ့သည်။

နိုင်ငံရေးသို့ မဝင်ရောက်မီ သိပ္ပံပညာရှင်တစ်ဦးဖြစ်ခဲ့သည့် မာကယ်၏ အစိုးရက ထိုအကျပ်အတည်းအား တုံ့ပြန်ဆောင်ရွက်မှုထက် မည်သည့်အစိုးရကမျှ ပိုမိုကောင်းမွန်အောင် စွမ်းဆောင်နိုင်မည်ဟု စိတ်ကူး၍မရကြောင်း ၎င်းက ပြောကြားခဲ့သည်။

မာကယ်က မိမိတို့သည်ကျန်းမာရေး စောင့်ရှောက်မှုစနစ်အား ဝန်မပိစေသင့်ကြောင်း ပြောကြားခဲ့ပြီး ဖြေလျှော့ပေးမည့် ကန့်သတ်မှုများသည် တစ်ကျော့ပြန်လာနိုင်ကြောင်းလည်း သတိပေးခဲ့သည်။ အကောင်းဆုံးနည်းလမ်းမှာ ဂရုတစိုက် လုပ်ဆောင်ရမည်ဖြစ်ပြီး ပေါ့ဆ၍ မရကြောင်းလည်း ၎င်းက ပြောကြားခဲ့သည်။

နှေးကွေးစွာ ချဉ်းကပ်နေသည့် မာကယ်၏လုပ်ရပ်သည် နိုင်ငံအား ဖျက်ဆီးနေကြောင်း လက်ယာ အစွန်းရောက် Alternative for Germany ပါတီက ဝေဖန်ခဲ့သော်လည်း မာကယ်အား လူထုထောက်ခံမှုသည် တဖြည်းဖြည်း မြင့်တက်နေပြီး မာကယ်အစိုးရ၏ ပဋိပက္ခစီမံခန့်ခွဲမှုကို ပြည်သူအများအပြားက အပြုသဘော ရှုမြင်ခဲ့ကြသည်။

ဘာလင်ရှိ အရုပ်ဆိုင်အား တစ်လကျော်အတွင်း ပထမဆုံးအကြိမ်အဖြစ် ဧပြီ ၂၂ တွင် ပြန်ဖွင့်နိုင်ခဲ့သော ဂါလီနာဟိုဂီက အစိုးရထံမှ ထောက်ပံ့ငွေများ ရရှိခဲ့ပြီးဖြစ်ပြီး လုပ်ငန်းစဉ်များသည် အံ့အားသင့်ဖွယ် အလွန်လျင်မြန်ကာ မရှုပ်ထွေးကြောင်းလည်း ချီးကျူးခဲ့သည်။

ဂျာမနီ၏ အားလုံးလွှမ်းခြုံသော ကျန်းမာရေးအာမခံစနစ်နှင့် အားကောင်းသော လူမှုဖူလုံရေးစနစ်တို့ကြောင့် အတော်အသင့် ဘေးကင်းလုံခြုံသည်ဟု ခံစားရကြောင်း ပြောကြားလျက် ဂါလီနာဟိုဂီက အဓိက အကျဆုံးအရာမှာ လူတိုင်းကျန်းမာနေပြီး အမေရိကန်ကဲ့သို့ အခြေအနေဆိုး မကြုံခဲ့ရခြင်းဖြစ်ကြောင်း ပြောကြားခဲ့သည်။

ဂျာမနီ၏ အကူအညီပေးရေး အစီအစဉ်သည် အသေးစား စီးပွားရေးလုပ်ငန်းများအတွက် ကူညီရန်အပြင် အလုပ်လက်မဲ့နှုန်းအား လျှော့ချရန်နှင့် အလုပ်သမားများအား လုပ်ငန်းခွင်သို့ အမြန်ဆုံးဝင်ရောက်နိုင်ရန်လည်း ဖန်တီးထားသည်။

၀ါရှင်တန်က အမေရိကန်နိုင်ငံသားများအား အကူအညီ ချက်လက်မှတ်တစ်ကြိမ်သာ ပေးအပ်ချိန်တွင်  ဂျာမနီကမူ အလုပ်ချိန်လျှော့ချခံရသည့် သို့မဟုတ် အလုပ်လုပ်ချိန် လုံးဝမရရှိသည့် အလုပ်သမားများ၏ လစာရာခိုင်နှုန်း ၆၀ ထက်မနည်းကို ပေးရန်စီစဉ်ထားသည်။

တောင်ကိုရီးယားက ၂၀၁၅ ခုနှစ်တွင် MERS သို့မဟုတ် အရှေ့အလယ်ပိုင်း အသက်ရှူလမ်းကြောင်းဆိုင်ရာ ရောဂါဖြစ်သည့် ကွဲပြားသော ကိုရိုနာဗိုင်းရပ်စ်အား တိုက်ဖျက်ခဲ့သည့် အတွေ့အကြုံကိုယူလျက် တင်းတင်းကျပ်ကျပ် စစ်ဆေးခြင်းနှင့် ထိတွေ့မှုရှိသူများအား ခြေရာခံခြင်းကို ဆောင်ရွက်ခဲ့သောကြောင့် ယခုကပ်ဘေးတွင် Lockdown သို့မဟုတ် စီးပွားရေးလုပ်ငန်းများအား ရပ်ဆိုင်းလိုက်ရခြင်းတို့ကို ရှောင်လွှဲ၍ စီမံနိုင်ခဲ့ခြင်းဖြစ်သည်ဟု ကျွမ်းကျင်သူများက ပြောကြားခဲ့သည်။

MERS ရောဂါကြောင့် ၃၆ ဦး သေဆုံးပြီး လူ ၂၀၀ ခန့် နေမကောင်းဖြစ်ခဲ့ပြီးနောက် တောင်ကိုရီးယားသည် ကျန်းမာရေးတာဝန်ရှိသူများက ကူးစက်ရောဂါများအား တိုက်ဖျက်နိုင်ရေး ပုဂ္ဂိုလ်ရေးအချက်အလက်များကို အလျင်အမြန်ရယူခွင့်ပြုရန် ကူးစက်ရောဂါဆိုင်ရာဥပဒေကို ပြန်လည်ပြင်ဆင်ရေးဆွဲခဲ့သည်။

ကိုယ်ရေးအချက်အလက် ကာကွယ်ရေး လှုံ့ဆော်သူများ၏ ဝေဖန်မှုရှိနေသော်လည်း တောင်ကိုရီးယားသည် ကိုရိုနာဗိုင်းရပ်စ် ကပ်ရောဂါကာလအတွင်း ထိုအခွင့်အာဏာကို အပြည့်အဝအသုံးချလျက် စမတ်ဖုန်း၏ GPS ခြေရာခံစနစ်၊ အကြွေးဝယ်ကတ်များ၏  မှတ်တမ်းများနှင့် စောင့်ကြည့်ရေးဗီဒီယိုကဲ့သို့ အရာများဖြင့် ဗိုင်းရပ်စ်သယ်ဆောင်သူများနှင့် ထိတွေ့သူများကို အပြင်းအထန် ခြေရာခံခဲ့ကြသည်။

ဗိုင်းရပ်စ်ကူးစက်ခံခဲ့ရသူများက ကူးစက်မခံရမီ သွားလာထားမှုများကို ဝက်ဘ်ဆိုက်များတွင် ထုတ်ပြန်ခဲ့ပြီး ထိုဗိုင်းရပ်စ် သယ်ဆောင်သူနှင့် ထိတွေ့ခြင်း ရှိ မရှိ အခြားသူများအား အကြောင်းကြားရန် စမတ်ဖုန်းများတွင် တပ်လှန့်သည့်စနစ်ဖြင့် ထပ်ဆင့်သတိပေးခဲ့သည်။

နေအိမ်များတွင် ရောဂါခြေချုပ်ဖြင့် နေထိုင်နေရသူ ထောင်ပေါင်းများစွာအား စောင့်ကြည့်ရန် အစိုးရက စမတ်ဖုန်းခြေရာခံသည့် App များကို အသုံးချခဲ့ပြီး ရောဂါ ခြေချုပ်ညွှန်ကြားချက်များအား ချိုးဖောက်သူများကို အီလက်ထရွန်နစ် လက်ပတ်များဖြင့် စောင့်ကြည့်ရန် စီစဉ်နေသည်။

ထိုချဉ်းကပ် ဆောင်ရွက်မှုကြောင့် တောင်ကိုရီးယားသည် ဧရာမ Lockdown ချမှတ်ခြင်း သို့မဟုတ် မရှိမဖြစ် အရေးမပါသောလုပ်ငန်းများအား ရပ်ဆိုင်းရခြင်းတို့ မရှိဘဲ ဗိုင်းရပ်စ်ကူးစက်မှု နှေးကွေးစေရန် စီမံနိုင်ခဲ့သည်။

ဗိုင်းရပ်စ်ကူးစက်မှု အကျပ်အတည်းသည် အဆိုးရွားဆုံးအခြေအနေသို့ ရောက်ရှိစဉ်က စပိန်နှင့် အီတလီတို့တွင် လူနာအရေအတွက် အလွန်အမင်းများပြားခြင်းကြောင့် ၎င်းတို့၏ ကျန်းမာရေးစောင့်ရှောက်မှုစနစ်များကို အလွန်ဝန်ပိခဲ့ပြီး မည်သူအား ဦးစားပေးကုသမည်နည်းဟု နာကျင်စရာကောင်းသော ရွေးချယ်မှုများ ပြုလုပ်ခဲ့ရသည်။       

အီတလီတွင်COVID-19 အကျပ်အတည်း ဖြေရှင်းရေးဆိုင်ရာ ကော်မရှင်၏အဖွဲ့ဝင် Domenico Arcuri က အီတလီတွင် ကပ်ရောဂါအတွင်း ပထမဆုံးအကြိမ်အဖြစ် အသက်ရှူစက်များသည် အရေးပေါ် ကြပ်မတ်ကုသဆောင်များမှ လူနာအရေအတွက်ထက် ပိုများခဲ့ကြောင်း ဧပြီ ၂၁ တွင် ပြောကြားခဲ့ပြီး ကပ်ရောဂါ၏ ပထမဆုံးသီတင်းပတ်များအတွင်း မည်သူအား ဦးစားပေးကုသပေးရန် မချိတင်ကဲဆုံးဖြတ်ချက် ချမှတ်ခဲ့ရသည့် တာဝန်ရှိသူများအတွက် ကြေကွဲဝမ်းနည်းမိကြောင်း ပြောကြားခဲ့သည်။

ဗိုင်းရပ်စ်ကူးစက်ခံရသူသစ် အရေအတွက်သည် တည်ငြိမ်လာနေစဉ် အီတလီဝန်ကြီးချုပ် ဂူဆက်ပီကွန်တီက အီတလီသည် မေ ၄ တွင် ပြန်လည်၍ စတင်ဖွင့်လှစ်နိုင်ကြောင်း အတည်ပြုခဲ့သော်လည်း အတင်းကျပ်ဆုံး Lockdown စီမံချက်အချို့အား အလုံးစုံဖြေလျှော့ပေးမည့် မည်သည့်မျှော်လင့်ချက်ကိုမဆို ၎င်းက အဆုံးသတ်ပစ်ခဲ့သည်။

ဟိုတယ်များအား ယာယီ ဆေးရုံများအဖြစ် အသွင်ပြောင်းပြီး မက်ဒရစ်ရေခဲပြင် စကိတ်စီးစခန်းတစ်ခုအား ရေခဲတိုက်အဖြစ် ပြောင်းလဲခဲ့ရသောစပိန်တွင် ကန့်သတ်မှုများအား ဖြေလျှော့ပေးရန် အစီအစဉ် မရှိသေးကြောင်း ကျန်းမာရေးဝန်ကြီး Sakvador Illa က ပြောကြားခဲ့သည်။

မေ ၁၁ တွင် ကျောင်းသားဦးရေ လျှော့ချထားလျက် အခြေခံ မူလတန်းကျောင်းများအား ပြန်လည်ဖွင့်လှစ်မည့် အစီအစဉ်ကို ကြေညာခဲ့သော နယ်သာလန်ဝန်ကြီးချုပ် Mark Rutte က ၎င်းသည် မည်သို့ ရှေ့ဆက်ရန်နှင့် ပတ်သက်၍ ဆုံးဖြတ်ချက်ချမှတ်ရာတွင် အလွန်အမင်း အကျပ်ရိုက်နေခဲ့ကြောင်း ပြောကြားခဲ့သည်။