Top News

ကမ္ဘာလုံးဆိုင်ရာ ကိုရိုနာဗိုင်းရပ်စ်ကပ် ရောဂါ စတင်ခဲ့သော တရုတ်နိုင်ငံအလယ်ပိုင်း ဝူဟန်မြို့တွင် ယခုအခါ ဆေးရုံများ၌ ကျန်ရှိသော COVID- 19 လူနာအားလုံး ဆေးရုံမှ ဆင်းခဲ့ကြပြီဖြစ်ကြောင်း ကျန်းမာရေးတာဝန်ရှိသူတစ်ဦးက ဧပြီ ၂၆ တွင် ပြော ကြားခဲ့သည်။

ဝူဟန်မြို့၏ ပင်လယ်စာစျေးတစ်ခုမှ စတင်ပျံ့နှံ့ခဲ့သည်ဟု ယူဆရပြီး ကမ္ဘာတစ်ဝန်းသို့ အလျင်အမြန်မပျံ့နှံ့မီ ပြီးခဲ့သောနှစ် ဒီဇင်ဘာတွင် စတင်ထွက်ပေါ်လာခဲ့သည့် COVID- 19 သည် ယခုအခါ ကမ္ဘာတစ်ဝန်း လူ ၂.၈၃ သန်း ကူးစက်ခံထားရပြီး သေဆုံး သူ ၁၉၈၀၀၀ နီးပါးရှိကြောင်း Reuters ၏ စာရင်းပြုစုမှုအရ သိရသည်။

တရုတ်နိုင်ငံတစ်ဝန်းရှိ ဆေးဘက်ဆိုင်ရာ တာဝန်ရှိသူများနှင့် ဝူဟန်မြို့မှ တာဝန်ရှိသူများ၏ ပူးပေါင်းကြိုးပမ်းမှုကြောင့် ဧပြီ ၂၆ မတိုင်မီ ဝူဟန်တွင် ကိုရိုနာဗိုင်းရပ်စ်လူနာသစ် မရှိတော့ကြောင်း တရုတ်ကျန်းမာရေး ကော်မရှင်၏ ပြောခွင့်ရပုဂ္ဂိုလ် မီဖန်းက သတင်းအစီရင်ခံမှုတွင် ပြောကြားခဲ့သည်။

ဝူဟန်တွင် ကိုရိုနာဗိုင်းရပ်စ် ကူးစက်မှု ၄၆၄၅၂ မှု ရှိသောကြောင့် တရုတ်တစ်နိုင်ငံလုံး ကူးစက်မှုစုစုပေါင်း၏ ၅၆ ရာခိုင်နှုန်းရှိသည်။ ဝူဟန်တွင် ထိုဗိုင်းရပ်စ်ကြောင့် လူ ၃၈၆၉ ဦး သေဆုံးခဲ့သောကြောင့် တစ်နိုင်ငံလုံး သေဆုံးသူစုစုပေါင်း၏ ၈၄ ရာခိုင်နှုန်းရှိသည်။

ပြည်နယ်မြို့တော် ဝူဟန်ပါဝင်သော တရုတ်အလယ်ပိုင်း ဟူပေပြည်နယ်အား ဇန်နဝါရီလကုန်ပိုင်းတွင် Lockdown ပြုလုပ်ခဲ့ပြီး လမ်းများအား ပိတ်ထားကာ ရထားများနှင့် လေယာဉ်များ ပြေးဆွဲမှု ဖျက်သိမ်းခဲ့သည်။ ဒေသခံများသည်လည်း နှစ်လကျော်ကြာ လွတ်လပ်စွာသွားလာခွင့်မရရှိခဲ့ပေ။

ဝူဟန်တွင် ယခုအခါ ကန့်သတ်မှုများအား ဖြေလျှော့ခဲ့ပြီဖြစ်သော်လည်း ဒေသခံများအား စစ်ဆေးမှုများ ပုံမှန်ပြုလုပ်နေဆဲ ဖြစ်သည်။

ရုရှားမှ ဝင်ရောက်လာသူ အများအပြားတွင် ကိုရိုနာဗိုင်းရပ်စ်ကူးစက်မှုများ ဖြစ်ပွားခဲ့သည့် နိုင်ငံအရှေ့မြောက်ပိုင်းနယ်စပ် ပြည်နယ်ဟေလောင်ကျန်းအား ယခုအခါ ပြောင်းလဲအာရုံစိုက်နေသည်။

တရုတ်တွင် ဧပြီ ၂၆ ၌ ကိုရိုနာဗိုင်းရပ်စ် ကူးစက်ခံရသူသစ် သုံးဦးသာရှိသောကြောင့် ဧပြီ ၂၅ က ကူးစက်ခံရသူသစ် ၁၁ ဦးထက် ကျဆင်းခဲ့ကြောင်း၊ ထပ်မံသေဆုံးသူလည်း မရှိခဲ့ကြောင်း ကျန်းမာရေးတာဝန်ရှိသူများက ဧပြီ ၂၇ တွင် ပြောကြားခဲ့သည်။

ဧပြီ ၂၆ တွင် ပြည်မကြီး၌ ရောဂါလက္ခဏာမပြသသည့် ကူးစက်သူသစ် ၂၅ ဦးရှိခဲ့ပြီး ဧပြီ ၂၅ တွင် ယင်းကဲ့သို့ ကူးစက်သူ ၃၀ ရှိခဲ့ကြောင်း တာဝန်ရှိသူများက ထုတ်ပြန်ခဲ့သည်။

ပြည်မကြီးတရုတ်တွင် လတ်တလော၌ COVID- 19 ကူးစက်မှု စုစုပေါင်း ၈၂၈၃၀ ရှိခဲ့ပြီး ပေကျင်းတွင် သေဆုံးသူ တစ်ဦးအပါအဝင် ဧပြီ ၂၆ ကုန်အထိ သေဆုံးသူ စုစုပေါင်း ၄၆၃၃ ဦးရှိကြောင်း တာဝန်ရှိသူများက ထုတ်ပြန်ခဲ့သည်။

အရည်အသွေးနိမ့် နှာခေါင်းစည်း ၈၉ သန်းကျော်ကို သိမ်းဆည်းခဲ့

ကမ္ဘာတစ်ဝန်း တင်ပို့ခဲ့သည့် အပြစ်အနာအဆာရှိသော အကာအကွယ်ပစ္စည်းများအတွက် တိုင်ကြားမှုများစွာကို ရင်ဆိုင်နေရစဉ် တရုတ်သည် အရည်အသွေးညံ့ဖျင်းသော နှာခေါင်းစည်း ၈၉ သန်းကျော်ကို သိမ်းဆည်းခဲ့ကြောင်း အစိုးရတာဝန်ရှိသူတစ်ဦးက ဧပြီ ၂၆ တွင် ပြောကြားခဲ့သည်။

ကိုရိုနာဗိုင်းရပ်စ် တိုက်ဖျက်ရန်အတွက် ကမ္ဘာတစ်ဝန်း နိုင်ငံများက ကြိုးပမ်းနေရစဉ် အကာအကွယ်ပစ္စည်းများအတွက် ဝယ်လိုအား အလွန်မြင့်တက်ခဲ့သည်။

သို့သော် တရုတ်က တင်ပို့ခဲ့သည့် အထူးသဖြင့် ဆေးဘက်ဆိုင်ရာဝန်ထမ်းများနှင့် ခုခံနိုင်စွမ်းအားနည်းသူများ အသုံးပြုကြသော နှာခေါင်းစည်းများနှင့် အခြားပစ္စည်းများသည် အပြစ်အနာအဆာရှိနေကြောင်း နိုင်ငံများစွာက အပြစ်တင်ခဲ့ကြသည်။

ဧပြီ ၂၄ အထိ တရုတ်စျေးကွက် စည်းမျဉ်းထိန်းသိမ်းသူများက စီးပွားရေးလုပ်ငန်း ၁၆ သန်းနီးပါးကို စစ်ဆေးခဲ့ပြီး နှာခေါင်းစည်း ၈၉ သန်းကျော်နှင့် အကာအကွယ်ပစ္စည်း ၄၁၈၀၀၀ ကို သိမ်းယူခဲ့ကြောင်း စျေးကွက်စည်းမျဉ်းဆိုင်ရာ စီမံအုပ်ချုပ်ရေးအဖွဲ့၏ ဒုတိယညွှန်ကြားရေးမှူး ကန်လင်းက ပြောကြားခဲ့သည်။ ထို့ပြင် ယွမ် ၇.၆ သန်း (ဒေါ် လာ ၁.၁ သန်း) ကျော်တန်ဖိုးရှိ ထိရောက်မှုမရှိသော ပိုးသတ်ဆေးများကိုလည်း စည်းမျဉ်းထိန်းသိမ်းသူများက သိမ်းယူခဲ့ကြောင်း ၎င်းက ပြောကြားခဲ့သည်။

ထိုသိမ်းဆည်းခဲ့သော ကုန်ပစ္စည်းများအား ပြည်ပစျေးကွက်များသို့ မည်မျှတင်ပို့ မည်ဖြစ်ကြောင်းကို ရှင်းရှင်းလင်းလင်းမသိ ရသေးပေ။

အရည်အသွေးနိမ့်သော ကုန်ပစ္စည်းများအား တားဆီးရန် တရုတ်က ဆေးဘက်သုံး မဟုတ်သည့် နှာခေါင်းစည်းများပင်လျှင် တရုတ်အပြင် နိုင်ငံတကာ အရည်အသွေး စံနှုန်းများနှင့် ပြည့်မီရမည်ဟု စည်းမျဉ်းသစ်များကို ဧပြီ ၂၅ တွင် ထုတ်ပြန်ခဲ့သည်။

စပိန်၊ နယ်သာလန်၊ ချက်နှင့် တူရကီတို့ အပါအဝင် နိုင်ငံအများအပြားသည် တရုတ်မှ တင်သွင်းခဲ့သော ဖြစ်ကတတ်ဆန်းလုပ်ထားသည့် နှာခေါင်းစည်း ထောင်ပေါင်းများစွာနှင့် အကာအကွယ်ပစ္စည်းများကို မဖြစ်မနေ ပြန်လည်သိမ်းယူခဲ့ရပြီးနောက် ထိုစည်းမျဉ်းများကို တရုတ်က ထုတ်ပြန်ခဲ့ခြင်းဖြစ်သည်။

တရုတ်၏ နေ့စဉ် နှာခေါင်းစည်းထုတ်လုပ်မှုသည် ၁၁၆ သန်းရှိကြောင်း အစိုးရက ထုတ်ပြန်ခဲ့သည်။

ဧပြီလလယ်အထိ ပြည်ပတင်ပို့မည့် အနာအဆာရှိ နှာခေါင်းစည်း ၃၁.၆ သန်းကျော်နှင့် အကာအကွယ်ဝတ်စုံ ၅၀၉၀၀၀ စုံကို ဆိပ်ကမ်းအာဏာပိုင်များက သိမ်းဆည်းခဲ့ကြောင်း တရုတ်အကောက်ခွန်ဝန်ထမ်း တစ်ဦးက ပြောကြားခဲ့သည်။