မြန်မာ့လက်ရွေးစင်ဟောင်း ၀ါရင့်နောက်ခံလူ ဇော်မင်းထွန်းသည် ထိုင်းလိဂ်-၂ ကလပ် ထရတ်အသင်းမှ ဘန်ကောက်အသင်းသို့ ယခုရာသီကုန်အထိ အငှားဖြင့်သွားရောက်ကစားမည်ဖြစ်ကြောင်း သိရသည်။
ထိုင်းလိဂ်-၂ ကလပ်အသင်းပင်ဖြစ်သည့် ဘန်ကောက်အသင်းသည် လာမည့်ရာသီတွင် ထိုင်းလိဂ်-၁ သို့ တန်းတက်ကစားခွင့်ရရန် ပစ်မှတ်ထားနေပြီး နောက်တန်းကို ပိုမိုကျစ်လျစ်မာကျောရန် ပြင်ဆင်လိုသောကြောင့် မြန်မာ့လက်ရွေးစင်ဟောင်း ၀ါရင့်နောက်ခံလူ ဇော်မင်းထွန်းကို ထိုင်းလိဂ်-၂ ကလပ် ထရတ်အသင်းမှ အငှားဖြင့် ခေါ်ယူခဲ့ခြင်း ဖြစ်သည်။
ဇော်မင်းထွန်း၏ မူလကလပ်အသင်းဖြစ်သည့် ထရတ်အသင်းသည် ပြီးခဲ့သည့်ရာသီဝက်အပြောင်းအရွှေ့ကာလတွင် တောင်ကိုရီးယားနောက်ခံလူတစ်ဦးကို ခေါ်ယူအားဖြည့်ခဲ့သောကြောင့် ဇော်မင်းထွန်းကို ဘန်ကောက်အသင်းသို့ အငှားချရန် ဆုံးဖြတ်ခဲ့ခြင်းဖြစ်ကြောင်း သိရသည်။
ထိုင်းလိဂ်-၂ ကလပ် ဘန်ကောက်အသင်းသည် ပြီးခဲ့သည့် ဇန်နဝါရီ ၁၉ ရက်က ဇော်မင်းထွန်းကို ပရိသတ်များနှင့် မိတ်ဆက်ပေးခဲ့ပြီး အသင်းတာဝန်ရှိသူများကလည်း နွေးထွေးစွာကြိုဆိုခဲ့ကြကြောင်း သိရသည်။
ဇော်မင်းထွန်းသည် ဘန်ကောက်အသင်းတွင် ကျောနံပါတ် ၃၂ ကို ဝတ်ဆင်ကစားသွားမည်ဖြစ်ကြောင်း သိရသည်။
လက်ရှိတွင် ဘန်ကောက်အသင်းသည် ယခုရာသီ ထိုင်းလိဂ်-၂ အမှတ်ပေးပြိုင်ပွဲ ပွဲစဉ်(၂၀) အပြီးတွင် ၁၁ ပွဲနိုင်၊ ၂ ပွဲ သရေ၊ ၇ ပွဲရှုံး၊ ရမှတ် ၃၅ မှတ်ဖြင့် အမှတ်ပေးဇယား အဆင့်(၄) နေရာတွင် ရပ်တည်နေလျက်ရှိကြောင်း သိရသည်။
ထိုင်းလိဂ်ပြိုင်ပွဲများ၏ တန်းတက်တန်းဆင်း သတ်မှတ်ထားမှုအရ ထိုင်းလိဂ်-၂ ပြိုင်ပွဲအပြီးတွင် အမှတ်ပေးဇယား ထိပ်ဆုံးရပ်တည်မှုရ အသင်းနှစ်သင်းမှာ ထိုင်းလိဂ်-၁ ပြိုင်ပွဲသို့ တိုက်ရိုက်တန်းတက်ခွင့်ရမည်ဖြစ်ပြီး Play-off အဆင့်မှ တစ်သင်း၊ ပေါင်း သုံးသင်း တက်ရောက်ယှဉ်ပြိုင်ခွင့်ရမည်ဖြစ်သည်။
ထိုင်းလိဂ်-၂ ပြိုင်ပွဲ တန်းတက်ခွင့်တစ်နေရာအတွက် Play-off ကစားခွင့်ကို အမှတ်ပေးဇယား အဆင့် ၃ မှ အဆင့် ၆ နေရာရ အသင်း ၄ သင်းကို သတ်မှတ်ထားကြောင်းသိရသည်။
ဇော်မင်းထွန်း၏ ဘန်ကောက်အသင်းသည် လက်ရှိအခြေအနေအရဆိုပါက တန်းတက်ခွင့်တစ် နေရာအတွက် Play-off ကစားခွင့် ရရှိမည်ဖြစ်သည်။
ဇော်မင်းထွန်းသည် ယခုရာသီကုန်တွင် မူရင်းကလပ် ထရတ်သင်းနှင့် စာချုပ်သက်တမ်းကုန်ဆုံးမည်ဖြစ်သောကြောင့် ဘန်ကောက်အသင်းကသာ ဆက်လက်ကစားစေလိုပါက သက်တမ်းတိုးစာချုပ် ဆက်လက်ချုပ်ဆိုသွားဖွယ်ရှိကြောင်း သိရသည်။
ဇော်မင်းထွန်းသည် ယခုရာသီအစကမှ ထရတ်အသင်းသို့ တစ်ရာသီစာချုပ်ဖြင့် ပြောင်းရွှေ့လာပြီး အသင်းအတွက် ၁၁ ပွဲ ကစားပေးထားကြောင်း သိရသည်။
ဇော်မင်းထွန်းသည် ၂၀၁၉ ခုနှစ်ကတည်းက ပြည်ပကလပ်အသင်းများသို့ သွားရောက်ကစားနေသူဖြစ်ပြီး ဘန်ကောက်အသင်းမှာ ခြောက်သင်းမြောက်ဖြစ်သည်။
-
မြောက်ဦးမြို့နယ်တွင် တပ်မတော်နှင့် AA အဖွဲ့ အချိန်ကြာမြင့်စွာ တိုက်ပွဲဖြစ်ပွားရာ၌ တပ်မတော်ဘက်က စစ်သည်အချို့ ကျဆုံးပြီး AA ဘက်မှ အလောင်းအချို့နှင့် သေနတ်ခြောက်လက် သိမ်းဆည်းရမိခဲ့ကြောင်း တပ်မတော်ပြောကြား
-
မြောက်ဦးမြို့နယ် လက္ကာကျေးရွာအနီးတွင်ဖြစ်ပွားခဲ့သော တပ်မတော်နှင့် AA အဖွဲ့တိုက်ပွဲအတွင်းAA အလောင်းကိုးလောင်းရရှိခဲ့ပြီး တပ်မတော်က နယ်မြေလုံခြုံရေးဆောင်ရွက်နေကြောင်း သတင်းထုတ်ပြန်
-
မြန်မာနိုင်ငံတွင် ပြည့်စုံသော ဒီမိုကရေစီကို အသွင်ပြောင်းရန်အတွက် ဖွဲ့စည်းပုံအခြေခံဥပဒေ ပြင်ဆင်ရမည် ဖြစ်သော်လည်း လာမည့်နှစ် ရွေးကောက်ပွဲမတိုင်မီ ဖြစ်နိုင်ခြေ မရှိကြောင်း ဒေါ်အောင်ဆန်းစုကြည် ပြောကြား
-
အဲဗာတန်အားရှုံးနိမ့်ခြင်းမှာ ပျင်းရိခြင်းကြောင့်ဟု ဝေဖန်ခဲ့သော မော်ရင်ဟိုကို စပါးကစားသမားများ မကျေမနပ်ဖြစ်နေပြီး စုပေါင်းပုန်ကန်ဖွယ်ရှိ
-
ကိုရိုနာဗိုင်းရပ်စ်ကြောင့် ပရီးမီးယားလိဂ်အသင်းများ ရုပ်သံဝင်ငွေ(၁၀.၇%)စီ ပြန်ပေးရမည်ဖြစ်ပြီး လီဗာပူးလ် အနစ်နာဆုံးဖြစ်
