Top News

အာဖရိကတွင် လွန်ခဲ့သည့် နှစ်စပိုင်းမှ စတင်ပြီး mpox ရောဂါကူးစက်ခံရသူ ၇၇,၈၀၀ ကျော်ရှိကာ သေဆုံးသူ ၁,၃၂၁ ဦး အထိမြင့်တက်ခဲ့ကြောင်း အာဖရိကရောဂါ ထိန်းချုပ်ရေးနှင့် ကာကွယ်ရေးစင်တာ(အာဖရိက CDC က ပြောကြားခဲ့သည်။

ဇန်နဝါရီ ၁၆ ရက် ညနေခင်းအချိန်တွင် အွန်လိုင်းမီဒီယာတစ်ခု၌ ထုတ်ဖော်ပြောကြားချိန်တွင် CDC ညွှန်ကြားရေးမှူးချုပ် ယန်းကာဆီရာက အာဖရိကတိုက်တွင် ၂၀၂၄ ခုနှစ် နှစ်စပိုင်းကတည်းက mpox ကူးစက်ခံရသူ ၇၇,၈၈၈ဦးရှိပြီး ၎င်းတို့ထဲတွင် အတည်ပြုကူး စက်မှုဖြစ်စဉ် ၁၆,၇၆၇ ဦးရှိကာ သေဆုံးသူ ၁,၃၂၁ ဦးရှိသည်ဟုဆိုသည်။

လွန်ခဲ့သည့်နှစ်က mpox ရောဂါကူးစက်မှုများအတွက် ကမ္ဘာတစ်ဝန်းတွင် သတိပေးချက် အမြင့်ဆုံးအဆင့် တပ်လှန့်နှိုးဆော်ပြီး နောက်ပိုင်း ဆီရာလီယွန်နိုင်ငံတွင် ဇန်နဝါရီ ၁၀ ရက်က ပထမဆုံး mpox ကူးစက်မှုဖြစ်စဉ် ကို ပထမဆုံးအကြိမ်တွေ့ရှိခဲ့ပြီးနောက် အာဖရိကတွင် mpox ကူးစက်ဖြစ်ပွားသည့် နိုင်ငံ ၂၁ နိုင်ငံအထိ ရှိကြောင်း ကာဆီရာက ဆိုသည်။

mpox ကူးစက်ဖြစ်ပွားနေသည့်နိုင်ငံ ၂၁ နိုင်ငံတွင် ၁၃ နိုင်ငံသည် လက်ရှိ mpox ရောဂါဆက်လက် ကူးစက်ဖြစ်ပွားနေသည်ဟု အာဖရိကသမဂ္ဂ၏ အထူးကျန်းမာရေး စောင့်ရှောက်မှု အေဂျင်စီမှ ထုတ်ပြန်သည့်အ ချက်အလက်တွင် ဖော်ပြထားသည်။

နိုင်ငံ ရှစ်နိုင်ငံသည် လက်ရှိတွင်ရောဂါကို ထိန်းချုပ်နိုင်သည့် အဆင့်တွင်ရှိနေပြီး ၎င်းတို့ထဲမှ နိုင်ငံလေးနိုင်ငံ ဖြစ်သည့်တောင် အာဖရိက၊ ဂါဘွန်၊ မော်ရိုကိုနှင့် ဇင်ဘာဘွေတို့သည် ရက်ပေါင်း ၉၀ ကျော်ကြာ mpox ကူးစက်မှုဖြစ်စဉ်မရှိကြောင်း အာဖရိက CDC အကြီးအကဲက ဆိုသည်။

ယခင်က မျောက်ကျောက်ရောဂါဟုလူ သိများခဲ့သော mpox သည် ရေကျောက်ကဲ့သို့ ဗိုင်းရပ်စ်များနှင့် တူညီသော မျိုးနွယ်စုတစ်စုထဲမှ ပေါ်ပေါက်လာခြင်းဖြစ်သည်။သို့သော် ဖျားနာမှုကဲ့သို့ အပျော့စားလက္ခဏာများ ကို သာဖြစ်ပေါ်ခံစားရနိုင်သည်။

ပြင်းထန်ဖြစ်စဉ် ခံစားရသူများတွင်မူ အရေပြားတွင် အနာများပေါက်လေ့ရှိသည်။ အာဖရိကတွင် နောက်ဆုံးအကြိမ် ဖြစ်ပွားသည့် ကူးစက်မှု ဖြစ်စဉ်များတွင် သေဆုံးသူ ၇၂၀ ကျော်ရှိပြီး အများစုမှာ ကွန်ဂိုနိုင်ငံမှ ဖြစ်သည်။

mpox ရောဂါသည် ဗိုင်းရပ်စ်ကူးစက်ခံထားရသော တိရစ္ဆာန်များမှ လူသားများကို ကူးစက်နိုင်သော ရောဂါဖြစ်သည်။

၂၀၂၂ခု နှစ်တွင် ကမ္ဘာတစ်ဝန်း mpox ရောဂါကူးစက် ပျံ့နှံ့ချိန်က ဗိုင်းရပ်စ်သည် အထူးသဖြင့် လိင် ဆက်ဆံမှုနှင့် ရုပ်ပိုင်းဆိုင်ရာ အနီးကပ်ထိ တွေ့မှုမှတစ်ဆင့် အဓိကကူး စက်ပျံ့နှံ့ခဲ့သည်။ mpox  ဗိုင်းရပ်စ်တွင်clade 1 နှင့် clade 2 ဟူ၍နှစ်မျိုးရှိကာ clade နှစ်ခုစီတွင် a  နှင့် b ဟူ၍ clades အခွဲများ ရှိသည်။

ယင်း clade နှစ်မျိုးနှင့် အခွဲ clade များသည် မတူညီသော နေရာဒေသများတွင် ပျံ့နှံ့လျက်ရှိပြီး မတူညီသော လူဦးရေများအပေါ် သက်ရောက်မှုရှိသောကြောင့် ဒေသအလိုက် အံဝင်ခွင်ကျရှိပြီး လိုက်လျောညီထွေရှိသည့် တုံ့ပြန်ဆောင်ရွက်မှုများ ပြုလုပ်ရန် လိုအပ်ကြောင်း WHO ကပြောကြားခဲ့သည်။

“ဒါဟာ နောက်ထပ် COVID-19 အမျိုးအစားမဟုတ်ပါဘူး”ဟု WHO က ပြောကြားခဲ့သည်။ mpox ဗိုင်းရပ်စ် သည် ၂၀၂၂ ခုနှစ်တွင် အာဖရိကပြင်ပသို့ ကျယ်ကျယ်ပြန့်ပြန့် ကူးစက်ပျံ့နှံ့ခဲ့သည်။   

Ref:Xinhua