Top News

အီရန်တော်လှန်ရေးအစောင့်တပ်ဖွဲ့၏ ရေတပ်က ဒုံးပစ်လောင်ချာများ တပ်ဆင်ထားသည့် ဒါဇင်နှင့်ချီရှိသည့် တိုက်ခိုက်ရေး သင်္ဘောများကို ထားရှိသည့် မြေအောက်စခန်းတစ်ခုကို နိုင်ငံပိုင်ရုပ်သံမှတစ်ဆင့် ဇန်နဝါရီ ၁၈ ရက်တွင် ထုတ်ဖော်ပြသခဲ့သည်။

ထိုမြေအောက်ရေတပ်စခန်းသည် မည်သည့်နေရာတွင် တည်ရှိသည်ဆိုခြင်းကိုမူ အသေးစိတ်ထုတ်ပြန်ခဲ့ခြင်း မရှိဘဲ ထိုရေတပ်စခန်းသည် အီရန်၏ မဟာဗျူဟာမြောက် တောင်ပိုင်းရေပြင်များဖြစ်သည့် ပင်လယ်ကွေ့၊ ဟော်မုဇ်ရေလက်ကြားနှင့် အိုမန်ပင်လယ်ကွေ့တို့ကို အဓိက အာရုံစိုက်သွားမည်ဖြစ်ကြောင်း နိုင်ငံပိုင်ရုပ်သံက ထုတ်လွှင်ခဲ့သည်။

တိုက်ခိုက်ရေးစစ်သင်္ဘောများကို ထားရှိသည့် ထိုအဆောက်အအုံသည် အီရန်၏ တောင်ပိုင်းရေပြင်များတွင် မြေအောက်အနက် မီတာ ၅၀၀ (ပေ ၁၆၅၀)တွင် တည်ဆောက်ထားကြောင်း နိုင်ငံပိုင်ရုပ်သံက ဖော်ပြခဲ့သည်။

တော်လှန်ရေးအစောင့်တပ်ဖွဲ့၏ အကြီးအကဲ ဗိုလ်ချုပ်ကြီးဟော့စိန် ဆလာမီက ထိုရေတပ်စခန်းသို့ ရေတပ်တပ်မှူးဖြစ်သည့် ရေတပ်ဗိုလ်ချုပ်ကြီး အလီရီဇာတန်စီရီနှင့်အတူ သွားရောက်ကြည့်ရှုနေပုံကို ရုပ်သံတွင် ဖော်ပြခဲ့သည်။

အမေရိကန်တွင် ရွေးကောက်ခံသမ္မတ ဒေါ်နယ်ထရန့်၏ ကျမ်းသစ္စာကျိန်ဆိုမည့် ဇန်နဝါရီ ၂၀ မတိုင်မီ ရက်ပိုင်းအလိုတွင် ဆလာမီက ထိုမြေအောက်ရေတပ်စခန်းသို့ သွားရောက်ခဲ့ခြင်းဖြစ်သည်။

ထရန့်သည် ၎င်း၏ ပထမသက်တမ်းအတွင်း အီရန်ကို အဆုံးစွန်ဖိအားပေးသည့် မူဝါဒကို ကျင့်သုံးခဲ့ပြီး အီရန်နှင့် သဘောတူထားသည့် နျူကလီးယား သဘောတူညီမှုမှ နုတ်ထွက်ခဲ့ကာ အီရန်အပေါ် ပိတ်ဆို့မှုများ ပြုလုပ်ခဲ့သည်။

ယခုထုတ်ဖော်ပြသခဲ့သည့် ရေတပ်စခန်းတွင် သိမ်းဆည်းထားသည့် သင်္ဘောအချို့သည် အမေရိကန် စစ်သင်္ဘောများနှင့် ဖျက်သင်္ဘောများကို တိုက်ခိုက်ဖျက်ဆီးနိုင်စွမ်းရှိကြောင်း အီရန်နိုင်ငံပိုင်ရုပ်သံက ဖော်ပြ ခဲ့သည်။

ဇန်နဝါရီ ၁၁ ရက်ကလည်း အီရန်တော်လှန်ရေး အစောင့်တပ်ဖွဲ့သည် လေကြောင်းကာကွယ်ရေး စစ်ရေးလေ့ကျင့်မှုများကို ပြုလုပ်ခဲ့ကြောင်း နိုင်ငံပိုင်မီဒီယာက ဖော်ပြခဲ့သည်။

အီရန်သည် နောက်တက်လာမည့် အမေရိကန်သမ္မတ ဒေါ်နယ်ထရန့် လက်ထက်တွင် ၎င်း၏ ခါးသီးရန်ဘက် အစ္စရေးနှင့် အမေရိကန်တို့နှင့် ထိပ်တိုက်တွေ့မှုများအတွက် ကြိုတင်ပြင်ဆင်နေချိန်တွင် အဆိုပါစစ်ရေးလေ့ ကျင့်မှုများကို ပြုလုပ်ခဲ့ခြင်း ဖြစ်သည်။

အမေရိကန် သမ္မတလောင်း ထရန့်က အီရန်၏ နျူကလီးယား စီမံကိန်းများအား တိုက်ခိုက်ရန် အစ္စရေး ဝန်ကြီးချုပ် ဘင်ဂျမင်နေတန်ယာဟုကို လုပ်ပိုင်ခွင့် အာဏာပေးဖွယ်ရှိနေသည့် အခြေအနေကို အီရန်ခေါင်းဆောင်များက ရင်ဆိုင်နေရသည်။

ထိုစစ်ရေးလေ့ကျင့်မှုများသည် လက်တွေ့စစ်ပွဲ ဖြစ်ပွားနေသည့် အခြေအနေများတွင် လေယာဉ်များ၊ ဒုံးကျည်များနှင့် အီလက်ထရောနစ် စစ်ဆင်ရေး ခြိမ်းခြောက်မှုများကို တန်ပြန်တိုက်ခိုက်ရန်နှင့် အီရန်၏ ကောင်းကင်ယံနှင့် အထိခိုက်မခံသည့် နေရာများကို ကာကွယ်ရန်အတွက်ဖြစ်ကြောင်း အီရန်နိုင်ငံပိုင် ရုပ်သံက ဖော်ပြခဲ့သည်။

ဇန်နဝါရီ ၁၁ ရက်က ပြုလုပ်ခဲ့သည့် စစ်ရေးလေ့ကျင့်မှုသည် ဇန်နဝါရီ ၄ ရက်တွင် စတင်ခဲ့သည့် အီရန် တော်လှန်ရေး အစောင့်တပ်ဖွဲ့၏ ၂ လကြာ စစ်ရေးလေ့ကျင့်မှုများ၏ တစ်စိတ်တစ်ပိုင်းဖြစ်ကြောင်း နိုင်ငံ ပိုင်မီဒီယာက ဖော်ပြခဲ့သည်။

ထို့ပြင် မကြာသေးမီ လများအတွင်း အီရန်သည် ၎င်း၏ မဟာမိတ်ဖြစ်သည့် ရုရှားနှင့် စစ်ဘက်ဆက်ဆံရေးများ ကို တိုးမြှင့်ခဲ့သည်။

Ref:AFP