Top News

နော်ဝေတိုက်စစ်မှူး ဟာလန်းသည် မန်စီးတီးအသင်း နှင့် ၂၀၃၄ ခုနှစ်အထိ ကာလရှည်သက်တမ်းတိုးစာချုပ်ချုပ်ဆိုခဲ့ပြီးနောက် Opta ၏ ဆန်းစစ်လေ့လာသူတစ်ဦးဖြစ်သော ရိုင်ယန်ဘန်ဆန်က ဟာလန်းအနေဖြင့် လက်ရှိဂိုးသွင်းနှုန်းအတိုင်းဆိုပါက အလန်ရှီးယား၏ ပရီးမီးယားလိဂ်ဂိုးသွင်းစံချိန်ကို ၂၀၂၉-၃၀ ရာသီတွင် ချိုးဖျက်နိုင်လိမ့်မည်ဟု ခန့်မှန်းသုံးသပ်ခဲ့သည်။

မန်စီးတီးအသင်းသည် ဟာလန်း(၂၄ နှစ်)ကို ၂၀၂၇ ခုနှစ်အထိ စာချုပ်သက်တမ်းရှိနေသေးသော်လည်း ပြီးခဲ့သည့် သောကြာနေ့တွင် ၂၀၃၄ ခုနှစ်အထိ သက်တမ်းတိုးစာချုပ်သစ် ပြင်ဆင်ချုပ်ဆိုခဲ့ခြင်းဖြစ်သည်။

ထို့ကြောင့် ပရီးမီးယားလိဂ်ကစားသမားများထဲတွင် အရှည်လျားဆုံးစာချုပ်အဖြစ် မှတ်တမ်းဝင်သွားခဲ့သလို၊ ဟာလန်းသည် တစ်ပတ်လျှင် ပေါင်(၅၀၀၀၀၀)ရရှိသွားမည်ဟု သိရသည်။

မန်စီးတီးအသင်းအနေဖြင့် ဟာလန်းကို နှစ်ရှည်စာချုပ် ချုပ်ဆိုနိုုင်ခဲ့သော်လည်း အဆိုပါစာချုပ်သက်တမ်း၏ တစ်ဝက်တာကာလ၌ တန်ဖိုးပမာဏတစ်ခုဖြင့် လမ်းခွဲနိုင်သည့် သဘောတူညီချက် ရယူထားဖွယ်ရှိကြောင်း ထင်ကြေးပေးမှုများလည်း ရှိနေသည်။

စာချုပ်သစ်ချုပ်ဆိုနိုင်ခဲ့ခြင်းအတွက် ဟာလန်းက ''စာချုပ်သစ် ချုပ်ဆိုနိုင်ခဲ့တဲ့အတွက် ကျွန်တော် တကယ်ပျော်ရွှင်ပါတယ်။ မန်စီးတီးက ထူးခြားတဲ့ ကလပ်အသင်းတစ်သင်းပါ။ စိတ်လှုပ်ရှားစရာကောင်းတဲ့လူတွေနဲ့ အံ့အားသင့်စရာကောင်းတဲ့ ပရိသတ်တွေ ပေါင်းစပ်ထားတဲ့အသင်းပါ။ ဒါကြောင့် ကစားသမားတိုင်း အကောင်းဆုံးခြေစွမ်းပြနိုင်အောင် ကူညီပေးနိုင်ပါတယ်။ ကျွန်တော် ပက်(ဂွါဒီယိုလာ)နဲ့ သူ့ရဲ့ နည်းပြအဖွဲ့ဝင်တွေ၊ အသင်းဖော်တွေ၊ ပြီးခဲ့တဲ့နှစ်တွေအတွင်း ကျွန်တော့်ကို အများကြီးကူညီပေးခဲ့တဲ့ အသင်းကလူတိုင်းကိုလည်း ကျေးဇူးတင်ပါတယ်။ ကျွန်တော့်ရဲ့ တိုးတက်မှုကို  ဆက်လက်ထိ်န်းသိမ်းပြီး အသင်းအတွက် အောင်မြင်မှုတွေ ထပ်ရဖို့ ကူညီနိုင်အောင် ကြိုးစားသွားမှာပါ''ဟု ပြောကြား ခဲ့သည်။

ဟာလန်းသည် လက်ရှိအချိန်တွင် ပရီးမီးယားလိဂ်(၈၈)ပွဲကစားရာ၌ ဂိုး(၈၀) သွင်းယူထားသည်။

ထို့ ကြောင့် ၎င်း၏ ဂိုးသွင်းနှုန်းမှာ ပရီးမီးယားလိဂ်၏ ဂိုးသွင်းအများဆုံးကစားသမား(၅)ဦးစလုံးထက် သာလွန်လျက်ရှိသည်။

ပရီးမီးယားလိဂ်တွင် ဂိုးအများဆုံးသွင်းယူနိုင်သူအဖြစ် စံချိန်တင်ထားသည့် အလန်ရှီးယားသည် (၄၄၁)ပွဲကစားပြီး ဂိုးပေါင်း(၂၆၀) သွင်းယူခဲ့သည့်အတွက် တစ်ပွဲပျမ်းမျှဂိုးသွင်းနှုန်းမှာ (၀.၅၉)ဂိုးနှုန်းရှိသည်။

ဟာလန်း၏ တစ်ပွဲပျမ်းမျှဂိုးသွင်းနှုန်းမှာ (၀.၉၁)ရာခိုင်နှုန်းရှိနေသည်။

ထို့ကြောင့် လက်ရှိဂိုးသွင်းနှုန်းအတိုင်းဆိုပါက (၂၈၇)ပွဲ ယှဉ်ပြိုင်ပြီးချိန်တွင် (၂၆၁)ဂိုးသွင်းယူကာ အလန်ရှီးယား၏ စံချိန်ကို ကျော်ဖြတ်နိုင်မည်ဟု ရိုင်ယန်ဘန်ဆန်က သုံးသပ်ခန့်မှန်းခဲ့ခြင်းဖြစ်သည်။

အဆိုပါပွဲအရေအတွက်မှာ ၂၀၂၉-၃၀ ရာသီ၏ ဒုတိယရာသီဝက်ကာလတွင် ရောက်ရှိမည်ဟု သိရသည်။

ရိုင်ယန်ဘန်ဆန်က ဟာလန်းသည် ပရီးမီးယားလိဂ်၌ တစ်ရာသီလျှင် (၃၄)ဂိုးနှုန်း သွင်းယူနေသူဖြစ်သောကြောင့် ၂၀၃၄ ခုနှစ်အထိ အသင်းတွင် ဆက်ရှိခဲ့မည်ဆိုပါက ပရီးမီးယားလိဂ်သွင်းဂိုး (၃၇၃)ဂိုးအထိ သွင်းယူနိုင်လိမ့်မည်ဟုလည်း တွက်ချက်ဖော်ပြခဲ့သည်။

ဟာလန်းသည် နောက်ဆုံးနှစ်ရာသီဆက် ပရီးမီးယားလိဂ်ဂိုးသွင်းဘုရင်ဆု ရရှိခဲ့သူဖြစ်သည်။