Top News

နှစ်ပေါင်းများစွာအတွင်း ဂျပန်သို့ဝင်ရောက်တိုက်ခတ်ခဲ့သည့် အင်အားအပြင်းဆုံး မုန်တိုင်းတစ်ခုဖြစ်သည့် တိုင်ဖွန်းမုန်တိုင်း Nanmadol ကြောင့် ဂျပန်နိုင်ငံ၏ နေရာဒေသအချို့တွင် ကြောက်မက်ဖွယ် လေပြင်းတိုက်မှုများနှင့် စံချိန်တင်မိုးရွာသွန်းမှုများ ဖြစ်ပေါ်ခဲ့ကာ အနည်းဆုံးလူတစ်ဦး သေဆုံးပြီး သယ်ယူပို့ဆောင်ရေးကဏ္ဍတွင်လည်း ထိခိုက်မှုများ ဖြစ်ပေါ်ခဲ့သည်။

ကုလသမဂ္ဂအထွေထွေညီလာခံတွင် မိန့်ခွန်းပြောကြားရန် ရှိနေသည့် ဂျပန်ဝန်ကြီးချုပ် ဖုမိအိုခိရှိဒသည်လည်း မုန်တိုင်း၏သက်ရောက်မှုဒဏ်ကို စောင့်ကြည့်ရန်အတွက် စက်တင်ဘာ ၂၀ ရက်မှသာ နယူးယောက်မြို့သို့ သွားရောက်ရန် အချိန်ရွှေ့ဆိုင်းခဲ့သည်ဟု ပြည်တွင်းမီဒီယာများက ဖော်ပြခဲ့သည်။

“ကျွန်တော်တို့ဟာ မိုးသည်းထန်မှု၊ လေပြင်းတိုက်ခတ်မှု၊ လှိုင်းထန်မှုနဲ့ မုန်တိုင်းဒီရေတက်မှုတွေကို ဆက်လက်ပြီး အထူးသတိပြုနေထိုင်သွားဖို့ လိုအပ်ပါတယ်” ဟု ဂျပန်မိုးလေဝသဌာန (JMA) တာဝန်ရှိသူတစ်ဦးက သတင်းစာရှင်းလင်းပွဲတွင် ပြောကြားခဲ့သည်။

ယခုနှစ်အတွင်း ဂျပန်သို့ဝင်ရောက်ခဲ့သည့် ၁၄ ခုမြောက် တိုင်ဖွန်းမုန်တိုင်းဖြစ်သည့် တိုင်ဖွန်းမုန်တိုင်း Nanmadol ကြောင့် စက်တင်ဘာ ၁၈ ရက် နှောင်းပိုင်းက ကာဂိုရှီးမားမြို့အနီး၌ မြေပြိုမှုဖြစ်ပွားခဲ့ပြီး ထို့နောက်တွင် နိုင်ငံအနောက်ပိုင်း ကျူရှုကျွန်းနှင့် ဟွန်ရှုကျွန်းမကြီးတို့ကိုလည်း ဆက်လက်ဝင်ရောက်ခဲ့သည်။

ကျူရှုကျွန်းရှိ မိယာဇာခိစီရင်စုတွင် မြစ်ရေလျှံမှုဖြစ်ပွားခဲ့ခြင်းကြောင့် စိုက်ခင်းနှင့် လမ်းမများ ရေမြုပ်နေပုံကို NHK ရုပ်သံက ထုတ်လွှင့်ခဲ့သည်။ ထို့အပြင်အဆောက်အအုံများ အမိုးလန်ပျက်စီးခြင်းနှင့် လမ်းဘေး ကြော်ငြာဆိုင်းဘုတ်များ ပြိုလဲခြင်းတို့လည်း ဖြစ်ပွားခဲ့သည်ဟု သိရသည်။

မြစ်ရေလျှံမှုကြောင့် ကားရေမြုပ်သွားသည့် ဖြစ်စဉ်အတွင်း အမျိုးသားတစ်ဦး သေဆုံးခဲ့ကြောင်းနှင့် မီးသတ်ဝန်ထမ်းများက ၎င်းမည်သူမည်ဝါဖြစ်ကြောင်းကို အတည်ပြုနိုင်ရန် ကြိုးပမ်းနေသည်ဟု NHK က ဖော်ပြခဲ့သည်။ ဒဏ်ရာရရှိသူ ၆၉ ဦးထက်နည်းရှိခဲ့သည်ဟုလည်း NHK ၏ ဖော်ပြချက်အရ သိရသည်။

စက်တင်ဘာ ၁၉ ရက် အစောပိုင်းက ကျူရှုကျွန်းမှ အများစုဖြစ်သည့် အိမ်ထောင်စုပေါင်း ၃၄၀၀၀၀ ခန့်သည် ဓာတ်အားပြတ်တောက်မှုနှင့် ရင်ဆိုင်နေရကြောင်း ကုန်သွယ်ရေးဝန်ကြီးဌာနက ဆိုသည်။ ကျူရှုမီးရထား ကုမ္ပဏီကလည်း ရထားပြေးဆွဲမှုများကို ရပ်ဆိုင်းထားကာ ဂျပန်လေကြောင်းလိုင်းနှင့် ANA Holdings လေကြောင်းလိုင်းတို့သည်လည်း လေယာဉ်ခရီးစဉ် ၈၀၀ ခန့်ကို ဖျက်သိမ်းခဲ့သည်ဟု NHK ရုပ်သံက ထုတ်လွှင့်ခဲ့သည်။

အဆိုပါတိုင်ဖွန်းမုန်တိုင်းသည် ဂရင်းနစ်စံတော်ချိန် နှစ်နာရီအထိ ဟွန်ရှုကျွန်းအနောက်ဖျားရှိ ယာမာဂုချိ စီရင်စုကို ဗဟိုပြုလျက်ရှိပြီး မြောက်ပိုင်းကမ်းရိုးတန်းတစ်လျှောက် တစ်နာရီလျှင် ၁၅ ကီလိုမီတာနှုန်းဖြင့် အရှေ့မြောက်ဘက်သို့ ဦးတည်နေသည်ဟု ဂျပန်မိုးလေဝသဌာနက ဆိုသည်။

အဆိုပါမုန်တိုင်းသည် စက်တင်ဘာ ၂၀ ရက်အထိ ဟွန်ရှုကျွန်း၏ မြောက်ဘက်သို့  ဦးတည်ရွေ့လျားပြီး ထို့နောက်တွင် ပစိဖိတ်သမုဒ္ဒရာပေါ်မှ ဖြတ်သန်းကာ ဆုတ်ခွာသွားဖွယ်ရှိကြောင်းလည်း ၎င်းမိုးလေဝသဌာနက ထုတ်ပြန်ထားသည်။

ဂျပန်အလယ်ပိုင်းရှိ စက်မှုလုပ်ငန်းဗဟိုချက်ဖြစ်သော တိုခါအိဒေသတွင် လာမည့် ၂၄ နာရီအတွင်း မိုးရေချိန် ၄၀၀ မီလီမီတာအထိ ရွာသွန်းဖွယ်ရှိကြောင်းလည်း ဂျပန်မိုးလေဝသဌာနက ခန့်မှန်းထားသည်။ တိုယိုတာ ကားကုမ္ပဏီသည်လည်း တိုင်ဖွန်းမုန်တိုင်းဒဏ်ကြောင့် ၎င်း၏စက်ရုံအချို့တွင် ထုတ်လုပ်မှုများကို ယာယီရပ်ဆိုင်းထားမည်ဟု ပြောဆိုထားသည်။