Top News

အမေရိကန်၏မူဝါဒပြောင်းလဲခြင်းမရှိဟု အိမ်ဖြူတော်က ပြောဆိုထားစဉ် အမေရိကန်အနေဖြင့် ထိုင်ဝမ်အား တရုတ်၏ကျူးကျော်မှုမှ ကာကွယ်ပေးမည်ဟု သမ္မတဂျိုးဘိုင်ဒင်က စက်တင်ဘာ ၁၈ ရက်တွင် ပြောကြားခဲ့သည်။

CBS ရုပ်သံ၏ 60 Minutes အစီအစဉ်၌ အမေရိကန်တပ်ဖွဲ့ဝင်များက ထိုင်ဝမ်ကို အကာအကွယ်ပေးခြင်းပြုမပြု မေးမြန်းရာတွင် သမ္မတဘိုင်ဒင်က ကာကွယ်ပေးမည်ဟု ပြန်လည်ဖြေကြားခဲ့ပြီး မကြုံဖူးလောက်သည့် တိုက်ခိုက်မှုရှိလာမည်ဆိုပါက ထိုင်ဝမ်ကို အကာအကွယ်ပေးသွားမည်ဟု ၎င်းက ဆိုသည်။

တရုတ်နှင့်ထိုင်ဝမ်အကြား စစ်ပွဲဖြစ်ပွားလာပါက အမေရိကန်တပ်ဖွဲ့ဝင်များ ပါဝင်ရလိမ့်မည်ဟု အမေရိကန်သမ္မတဂျိုးဘိုင်ဒင်က ပြောကြားခဲ့ခြင်းမှာ ပထမဆုံးအကြိမ် မဟုတ်ပေ။ ယခုနှစ်မတ်လထဲတွင် ဂျပန်နိုင်ငံသို့ သွားရောက်ခဲ့စဉ်ကလည်း ၎င်းကယခုကဲ့သို့ပြောကြားခဲ့ဖူးသည်။

ထိုစဉ်ကလည်း အဆိုပါအခြေအနေမျိုးတွင် အမေရိကန်တပ်ဖွဲ့ဝင်များ ပါဝင်ပတ်သက်ခြင်းပြုမပြု မေးမြန်းခဲ့ရာတွင် ဘိုင်ဒင်က ‘ရက်စ်’ ဟု ပြန်လည်ဖြေကြားခဲ့ပြီး ယင်းသည် မိမိတို့ထားရှိသော ကတိကဝတ်ဖြစ်ကြောင်း ပြောကြားခဲ့သည်။

အမေရိကန်သည် ၁၉၇၉ ခုနှစ်တွင် ထိုင်ဝမ်နှင့် တရားဝင်သံတမန်ဆက်ဆံရေး ဖြတ်တောက်ခဲ့ပြီး တရုတ်ကို ပြောင်းလဲအသိအမှတ်ပြုခဲ့သော်လည်း တစ်ချိန်တည်းတွင် ထိုင်ဝမ်အား ထောက်ခံအားပေးမှုများကို အခိုင်အမာ ဆက်လက်လုပ်ဆောင်ခဲ့သည်။

အမေရိကန် ကွန်ဂရက်လွှတ်တော်က အတည်ပြုထားသည့် ဥပဒေတစ်ရပ်အရ အင်အားချင်းမယှဉ်သာသည့် တရုတ်စစ်တပ်နှင့် ရင်ဆိုင်ရာတွင် ထိုင်ဝမ်၏ ကိုယ်ပိုင်ကာကွယ်ရေးအတွက် အမေရိကန်ပြည်ထောင်စုအနေဖြင့် စစ်လက်နက်ပစ္စည်းများ ရောင်းချခွင့်ရှိသည်။

အမေရိကန်အနေဖြင့် ထိုင်ဝမ်အား ဒေါ်လာဘီလျံပေါင်းများစွာရှိသည့် စစ်ရေးအကူအညီများ တိုက်ရိုက်ပေးအပ်နိုင်ရေးနှင့် အပြန်အလှန်ဆက်ဆံမှုများကို ပိုမိုတရားဝင်ဖြစ်စေရေးအတွက် ဆီးနိတ်လွှတ်တော် နိုင်ငံခြားဆက်ဆံရေးကော်မတီသည်လည်း ပါတီနှစ်ရပ်လုံး၏ ထောက်ခံမှုနှင့်အတူ ထိုင်ဝမ်မူဝါဒရေးရာအက်ဥပဒေကို စက်တင်ဘာ ၁၄ ရက်တ အတည်ပြုခဲ့သည်။

သမ္မတဘိုင်ဒင်၏ လတ်တလောပြောကြားချက်သည် ထိုင်ဝမ်အရေးနှင့်ပတ်သက်၍ မပြတ်သားသည့် မဟာဗျူဟာကျင့်သုံးနေမှုကို ပြောင်းလဲလိုက်သည့် အရိပ်အယောင်မျိုးဟုတ်မဟုတ် မေးမြန်းရာတွင် အိမ်ဖြူတော်ပြောခွင့်ရပုဂ္ဂိုလ်က “သမ္မတကြီးအနေနဲ့ အခုနှစ်အစောပိုင်းကလည်း တိုကျိုမှာ အဲဒီလိုမျိုး ပြောခဲ့ဖူးပါတယ်။ ထိုင်ဝမ်နဲ့ပတ်သက်ပြီး မူဝါဒပြောင်းလဲခြင်း မရှိကြောင်းကိုလည်း သမ္မတကြီးက ရှင်းရှင်းလင်းလင်း ပြောခဲ့ပြီးပါပြီ။ အဲဒါကပကတိအမှန်တရားအဖြစ် ဆက်ရှိနေပါတယ်” ဟု ပြန်လည်ဖြေကြားခဲ့သည်။

ထိုင်ဝမ်ကို ကာကွယ်ရန်အတွက် အမေရိကန်တပ်ဖွဲ့ဝင်များ ပါဝင်တိုက်ခိုက်ပေးနိုင်ဖွယ်ရှိခြင်းကို သမ္မတဘိုင်ဒင် ထုတ်ဖော်ပြောဆိုခဲ့သည့် အကြိမ်တိုင်းတွင်လည်း တရုတ်က ဒေါသတကြီးတုံ့ပြန်ခဲ့သည်။ ထိုင်ဝမ်သို့ အမေရိကန်အောက်လွှတ်တော်ဥက္ကဋ္ဌ နန်စီပယ်လိုစီ သွားရောက်ခဲ့ပြီးနောက်တွင် တင်းမာမှုများ ပိုမိုမြင့်တက်လာခဲ့သည်။