Top News

တရုတ်ပြည်မကြီးတွင် မျောက်ကျောက်ရောဂါကူးစက်မှုဖြစ်စဉ် ပထမဆုံးတွေ့ရှိခဲ့ပြီးနောက် မျောက်ကျောက်ရောဂါကူးစက်နိုင်သည့်အခြေအနေကို ကာကွယ်နိုင်ရန်အတွက် ပြည်ပနိုင်ငံသားများနှင့် ရုပ်ပိုင်းဆိုင်ရာထိတွေ့မှုကို ရှောင်ရှားရန် အကြီးတန်းတရုတ်တာဝန်ရှိသူတစ်ဦးက အကြံပြုပြောကြားခဲ့သည်။

“အလားအလာရှိတဲ့ မျောက်ကျောက်ရောဂါကူးစက်မှုကို ကာကွယ်ဖို့နဲ့ ကျွန်တော်တို့ရဲ့ ကျန်းမာတဲ့ဘဝနေထိုင်မှုရဲ့ တစ်စိတ်တစ်ပိုင်းအနေနဲ့ ပြည်ပနိုင်ငံသားတွေနဲ့အရေပြားခြင်း ထိတွေ့မှုမရှိစေဖို့ အကြံပြုလိုက်ပါတယ်” ဟု တရုတ်ရောဂါထိန်းချုပ်ရေးနှင့် ကာကွယ်ရေးစင်တာရှိ ကူးစက်ရောဂါဗေဒ အကြီးအကဲ ဝူဇွန်းယူက ၎င်း၏တရားဝင် Weibo စာမျက်နှာတွင် စက်တင်ဘာ ၁၇ ရက်က ရေးသားခဲ့သည်။

ထို့ပြင်ဝူက တရုတ်နိုင်ငံသားများအနေဖြင့် လွန်ခဲ့သည့် သီတင်းပတ်သုံးပတ်အတွင်း ပြည်ပနိုင်ငံမှ ရောက်ရှိလာသူများ၊ လူစိမ်းများနှင့် အရေပြားခြင်း ထိတွေ့မှုကို ရှောင်ရှားရန်လည်း တိုက်တွန်းပြောကြားခဲ့သည်။

“လူမှုရေးအဆင့်မှာမျောက်ကျောက် ကူးစက်ရောဂါကာကွယ်ရေးနဲ့ စောင့်ကြည့်ရေးကို ပိုမိုအားကောင်းခိုင်မာစေဖို့အရေးတကြီး လိုအပ်ပါတယ်” ဟု ၎င်းက ပြောကြားခဲ့သည်။

၎င်း၏ ပိုစ့်ကို သီတင်းပတ်ကုန်ကျော်အတွင်း လူမှုမီဒီယာတစ်ဝန်းတွင် ကျယ်ကျယ်ပြန့်ပြန့် မျှဝေခဲ့ကြသော်လည်း ၎င်း၏အစောပိုင်း ပိုစ့်အောက်ရှိ မှတ်ချက်ပြုသည့်နေရာကို စက်တင်ဘာ ၁၉ ရက်တွင် ပိတ်ထားခဲ့သည်ဟု သိရသည်။

၎င်း၏ပိုစ့်အား screenshot ရိုက်ယူထားသည့် ပိုစ့်များ၏အောက်၌ မှတ်ချက်များတွင် တရုတ်နိုင်ငံရှိ ပြည်ပနိုင်ငံသားအများအပြားသည် COVID-19 အတားအဆီးကြောင့် မကြာသေးမီကာလအတွင်း ပြင်ပနိုင်ငံများသို့ သွားရောက်နိုင်ခြင်းမရှိဘဲ အများစုသည် တရုတ်တွင် ကာလကြာရှည်နေထိုင်သူများ ဖြစ်နေသည့်အတွက် ပြည်ပနိုင်ငံသားများကို ဒေသခံများထက် ပိုမိုအန္တရာယ်ရှိသည်ဟု သတ်မှတ်ကြခြင်းအပေါ် မေးခွန်းထုတ်ခဲ့ကြသည်။

ဝူသည် စက်တင်ဘာ ၁၉ ရက်က ရိုက် တာသတင်းဌာန၏ မေးမြန်းမှုကို ချက်ချင်း တုံ့ပြန်ဖြေကြားခြင်းမရှိသေးပေ။

နိုင်ငံအနောက်တောင်ပိုင်းချုံချင်းမြို့တွင် စက်တင်ဘာ ၁၆ ရက်က ပြည်ပနိုင်ငံမှ ပြန်လာသူတစ်ဦးတွင် မျောက်ကျောက်ရောဂါကူးစက်ခံထားရကြောင်း တွေ့ရှိခဲ့ပြီး ယင်းသည် တရုတ်ပြည်မကြီးတွင် ပထမဆုံးထိုရောဂါကူးစက်မှု တွေ့ရှိသည့်ဖြစ်စဉ်ဖြစ်သည်။

ယင်းအမျိုးသားသည် ချုံချင်းမြို့သို့ ရောက်ရှိချိန်တွင် ကွာရန်တင်းထားရှိခဲ့သောကြောင့် ကူးစက်နိုင်ခြေ လျော့နည်းကြောင်း ကျန်းမာရေးကော်မရှင်က ထုတ်ပြန်ထားသည်။

အနီးကပ်ထိတွေ့သူများအားလုံးကို သီးခြားခွဲထားကာဆေးဘက်ဆိုင်ရာ လေ့လာစောင့်ကြည့်မှုအောက်၌ ထားရှိခဲ့သည်။

မျောက်ကျောက်ရောဂါသည် ပုံမှန်ဖြစ်ပွားလေ့မရှိသော နိုင်ငံပေါင်း ၉၀ နီးပါးတွင် ကူးစက်ပျံ့နှံ့နေပြီး ကမ္ဘာ့ကျန်းမာရေးအဖွဲ့က ကမ္ဘာလုံးဆိုင်ရာ ကျန်းမာရေးအရေးပေါ်အခြေအနေအဖြစ် ထုတ်ပြန်ခဲ့သည်။

လက်ရှိကမ္ဘာတစ်ဝန်းတွင် မျောက်ကျောက်ရောဂါကူးစက်မှုဖြစ်စဉ် ၆၀၀၀၀ ကျော်ရှိပြီး ပုံမှန်ကူးစက်ဖြစ်ပွားလေ့မရှိသည့် နိုင်ငံအချို့တွင် ယင်းမျောက်ကျောက်ရောဂါနှင့် ဆက်နွှယ်၍ ပထမဆုံးသေဆုံးမှုဖြစ်စဉ်များ ရှိလာခဲ့သည်။