Top News

တရုတ်နိုင်ငံ ချန်ဒူးမြို့ကြီးတွင် စာသင်ကျောင်းများကို ပိတ်ထားရပြီး စီးပွားရေးလုပ်ငန်းများကို အနှောင့်အယှက်ဖြစ်စေကာ ဒေသခံများအား နေအိမ်အတွင်း သီတင်းနှစ်ပတ်ကျော်နေထိုင်စေခဲ့သည့် COVID-19 Lockdown စည်းမျဉ်းအောက်မှ သန်းနှင့်ချီသော ဒေသခံများသည် စက်တင်ဘာ ၁၉ ရက်တွင် လွတ်မြောက်သွားခဲ့သည်ဟု သိရသည်။

တရုတ်နိုင်ငံ အနောက်တောင်ပိုင်းရှိ ဒေသခံ ၂၁ သန်းရှိသော ချန်ဒူးမြို့သည် ရှန်ဟိုင်းမြို့အားတင်းကျပ်သော သီတင်းပတ်နှစ်ပတ်ကြာ Lockdown ချခဲ့သည့် ဧပြီလနောက်ပိုင်း Lockdown ချခံရသည့်အကြီးဆုံး မြို့ဖြစ်လာသည်။

တရုတ်သည် ကိုဗစ်ကင်းစင်ရေးမဟာဗျူဟာကို ကျင့်သုံးသည့် နောက်ဆုံးအဓိက စီးပွားရေးအင်အားကြီးနိုင်ငံဖြစ်ပြီး အောက်တိုဘာလလယ်တွင် ကျင်းပမည့် အဓိကနိုင်ငံရေးအစည်းအဝေးမတိုင်မီ တာဝန်ရှိသူများသည် ဗိုင်းရပ်စ်ကူးစက်မှုကို အလျင်အမြန် ထိန်းချုပ်နိုင်ရန် ဖိအားပေးခံနေရသည်။

“တစ်မြို့လုံးရဲ့ ပူးပေါင်းဆောင်ရွက်မှုနဲ့အတူ ကူးစက်ရောဂါကို ထိထိရောက်ရောက် ထိန်းချုပ်နိုင်ခဲ့ပါတယ်” ဟု ချန်ဒူးအစိုးရက စက်တင်ဘာ ၁၈ ရက်တွင် ထုတ်ပြန်ခဲ့သည်။

စက်တင်ဘာ ၁ ရက်တွင် Lockdown ချမှတ်ခဲ့ပြီးနောက် အစိုးရဌာနများ၊ အများပြည်သူသယ်ယူ ပို့ဆောင်ရေးဝန်ဆောင်မှုများနှင့် ကုမ္ပဏီများအနေဖြင့် စက်တင်ဘာ ၁၉ ရက်တွင် အလုပ်များကို ပြန်လည်လည်ပတ်လုပ်ကိုင်ခွင့်ပြုကြောင်း ထုတ်ပြန်ချက်တွင် ဖော်ပြထားသည်။

ချန်ဒူးမြို့တွင် လူအုပ်စုလိုက်ကိုရိုနာဗိုင်းရပ်စ် ကူးစက်မှုရှိ၊မရှိ စစ်ဆေးမှုများကို ဆက်လက်လုပ်ဆောင်သွားမည်ဖြစ်ပြီး အများပြည်သူပိုင်နေရာ သို့မဟုတ် အများပြည်သူသယ်ယူပို့ဆောင်ရေးများကို အသုံးပြုလိုသူများအနေဖြင့် ပေကျင်းနှင့် ရှန်ဟိုင်းအပါအဝင် အခြားမြို့ကြီးများတွင် ချမှတ်ထားသော စည်းမျဉ်းများနည်းတူ ၇၂ နာရီအတွင်း ဗိုင်းရပ်စ်ကူးစက်ခံရခြင်းမရှိကြောင်း ရလဒ်ပြသရန်လိုအပ်လိမ့်မည်ဟု ဆိုသည်။

စာသင်ကျောင်းများကို စနစ်တကျပြန်လည်ဖွင့်လှစ်သွားမည်ဖြစ်ပြီး ကျောင်းပြန်တက်မည့် ကျောင်းသားများကို တင်းကျပ်စွာ ဗိုင်းရပ်စ်ကူးစက်ခံရခြင်း ရှိ၊မရှိ စစ်ဆေးသွားမည်ဟု ထုတ်ပြန်ထားသည်။

အားကစားခန်းမများ၊ ရေကူးကန်များ၊ မာကျောက်ကစားရုံများနှင့် အခြားအဆောက်အအုံအတွင်း ဖျော်ဖြေရေးနေရာများတွင်လည်း လာရောက်သူများအနေဖြင့် ၄၈ နာရီအတွင်း ဗိုင်းရပ်စ်ကူးစက်ခံရခြင်းမရှိကြောင်း စစ်ဆေးချက် ပြသနိုင်ရမည်ဖြစ်သည်ဟု ဆိုသည်။

ချန်ဒူးမြို့တွင် စက်တင်ဘာ ၁၉ ရက်၌ နေ့အလိုက်ဗိုင်းရပ်စ်ကူးစက်မှုဖြစ်စဉ်အသစ် မတွေ့ရှိကြောင်း ထုတ်ပြန်ထားသည်။

တောင်ပိုင်းနည်းပညာမြို့ဖြစ်သည့် ရှန်ကျန်းနှင့် ဂူယန်းအပါအဝင် အခြားမြို့အများအပြားတွင် သတ်မှတ်ထားသည့် Lockdown များ ချမှတ်ထားပြီး မကြာသေးမီသတင်းပတ်များအတွင်း ခရီးသွားလာမှုကန့်သတ်ချက်များ ထုတ်ပြန်ထားသည်။

စက်တင်ဘာ ၁၈ ရက်တွင် ကွီကျိုးပြည်နယ်၌ ကွာရန်တင်းအဆောက်အအုံသို့ သွားရောက်နေသည့် ဘတ်စ်ကားတစ်စီးအဝေးပြေးလမ်းပေါ်တွင်တိမ်းမှောက်မှု ဖြစ်ပွားခဲ့ပြီး လူ ၂၇ ဦးသေဆုံးခဲ့သည်။