Top News

ပြီးခဲ့သည့် သီတင်းပတ်ကုန်က ဂျပန်နိုင်ငံသို့ တိုင်ဖွန်းမုန်တိုင်း Nanmadol ဝင်ရောက်ခဲ့ပြီးနောက် လူနှစ်ဦးသေဆုံးကာ အသက်ရှင်သည့်လက္ခဏာ မပြသည့် လူနှစ်ဦးကိုလည်း တွေ့ရှိရကြောင်း ဂျပန်အစိုးရ ပြောခွင့်ရက စက်တင်ဘာ ၂၀ ရက်တွင် ပြောကြားခဲ့သည်။

အဆိုပါတိုင်ဖွန်းမုန်တိုင်းကြောင့် စက်တင်ဘာ ၁၈ ရက် ညပိုင်းက နိုင်ငံအနောက်တောင်ပိုင်း ကာဂိုရှီးမားမြို့တွင် မြေပြိုမှုဖြစ်ပွားခဲ့ကာ ကျူရှုကျွန်းအနှံ့အပြားတွင်လည်း မိုးသည်းထန်စွာရွာသွန်းခဲ့ပြီး ထို့နောက်တွင် ၎င်းမုန်တိုင်းသည် အနောက်ဘက်ကမ်းရိုး တန်းတစ်လျှောက် ဆက်လက်ရွေ့လျားနေသည်ဟု သိရသည်။

စက်တင်ဘာ ၂၀ ရက် နံနက်ပိုင်းတွင်မူ အဆိုပါမုန်တိုင်းကို extratropical ဆိုင်ကလုန်းအဖြစ် အဆင့်လျှော့ချသတ်မှတ်လိုက်ပြီး ၎င်းမုန်တိုင်းသည် အရှေ့မြောက်ဘက် ကမ်းရိုးတန်းကို ဖြတ်ကျော်လျက် ပင်လယ်ပြင်ဆီသို့ ဦးတည်လျက်ရှိသည်။

မုန်တိုင်းအရှိန်ကြောင့် သစ်ပင်များလဲပြိုခြင်း၊ ပြတင်းမှန်များ ပျက်စီးခြင်းတို့ ဖြစ်ပေါ်ခဲ့ပြီး လူနှစ်ဦးသေဆုံးခဲ့သည့် မိယာဇာခိစီရင်စု၏ နေရာအချို့တွင်လည်း ၂၄ နာရီအတွင်း တစ်လတာ မိုးရေချိန်နှင့်ညီမျှသည့် မိုးရွာသွန်းမှုများ ဖြစ်ပေါ်ခဲ့သည်။

ဂျပန်အစိုးရပြောခွင့်ရ ဟိရိုခါဇုမာဆုနိုကလည်း အသက်ရှင်သည့် လက္ခဏာမပြသည့် နောက်ထပ်လူနှစ်ဦးကို တွေ့ရှိထားကြောင်း ပြောကြားခဲ့သည်။ ဂျပန်နိုင်ငံတွင် သေမှုသေခင်းစစ်ဆေးရေး အရာရှိက သေဆုံးကြောင်း တရားဝင်အတည်မပြုမီတွင် ယင်းအသုံးအနှုန်းကို သုံးနှုန်းပြောဆိုလေ့ရှိသည်။ အာဏာပိုင်များက ပျောက်ဆုံးနေသူတစ်ဦးကိုလည်း လိုက်လံရှာဖွေနေသည်ဟု ၎င်းက ဆိုသည်။

မုန်တိုင်းဝင်ရောက်မှုကြောင့် အနည်းဆုံး ၁၁၄ ဦးထက်မနည်း ဒဏ်ရာရရှိခဲ့ပြီး ၎င်းတို့အနက်မှ ၁၄ ဦးမှာ ဒဏ်ရာပြင်းထန်ကြောင်း သိရသည်။ စက်တင်ဘာ ၂၀ ရက် အစောပိုင်းအထိ နိုင်ငံတစ်ဝန်းရှိ အိမ်ခြေ ၁၄၀၀၀၀ ခန့် ဓာတ်အားပြတ်တောက်လျက်ရှိကာ အများစုမှာ ကျူရှုကျွန်းမှဖြစ်သည်။

ကျူရှုကျွန်းတောင်ပိုင်း တနဲဂါရှိမကျွန်းရှိ ဂျပန်အာကာသ စူးစမ်းလေ့လာရေး အေဂျင်စီ၏ အာကာသစခန်းတွင် နံရံထိခိုက်ပျက်စီးမှု ဖြစ်ပွားခဲ့ပြီး ဒုံးပျံယာဉ် တပ်ဆင်ရာ၌ အသုံးပြုသည့် အဆိုပါအဆောက်အအုံ၏ အပျက်အစီးပမာဏကိုမူ တွက်ချက်နေဆဲဖြစ်ကြောင်း သိရသည်။

မုန်တိုင်းပိုမိုအားကောင်းခဲ့သည့် စက်တင်ဘာ ၁၉ ရက်က ဂျပန်နိုင်ငံတောင်ပိုင်း ကျူရှုကျွန်းမကြီးပေါ်ရှိ မိယာဇာခိစီရင်စုတွင် လူနှစ်ဦးသေဆုံးခဲ့ကြောင်း မီးသတ်နှင့်သဘာဝဘေးအန္တရာယ် စီမံခန့်ခွဲရေးဌာနက ပြောကြားသည်။ မိယာကိုနိုဂျိုမြို့ရှိ မွေးမြူရေးခြံတစ်ခု၌ ရေမြုပ်နေသော ကားတစ်စီးထဲတွင် အမျိုးသားတစ်ဦးကို တွေ့ရှိခဲ့ပြီး မိမာတမြို့တွင်လည်း မြေပြိုမှုဖြစ်ပွားခဲ့သည့် နေရာအောက်တွင် နောက်တစ်ဦးကို ထပ်မံတွေ့ရှိခဲ့ကြောင်း သိရသည်။

စက်တင်ဘာ ၂၀ ရက်တွင် သယ်ယူပို့ ဆောင်ရေးစနစ်အများစုကို ပုံမှန်အတိုင်း ပြန်လည်ပြေးဆွဲခဲ့ပြီး ကျည်ဆန်ရထားနှင့် ကုန်းလမ်းသယ်ယူပို့ဆောင်ရေး စနစ်အများစုလည်း ပြန်လည်ပြေးဆွဲနေပြီဖြစ်ကာ နိုင်ငံအရှေ့မြောက်ပိုင်းတွင်မူ လေယာဉ်ခရီးစဉ်အများအပြားကို ပျံသန်းပြေးဆွဲခြင်း မပြုခဲ့ပေ။ ဂျပန်သည် လတ်တလောတွင် တိုင်ဖွန်းမုန်တိုင်းရာသီနှင့် ကြုံတွေ့နေရပြီး နှစ်စဉ်တိုင်ဖွန်းမုန်တိုင်း ၂၀ လုံးခန့် ဝင်ရောက်လေ့ရှိသည်။

ရာသီဥတုပြောင်းလဲမှုကြောင့် မုန်တိုင်းကျရောက်မှုများ ပိုမိုပြင်းထန်လာပြီး အပူလှိုင်းကျရောက်ခြင်း၊ မိုးခေါင်ခြင်းနှင့် ရုတ်တရက်ရေကြီးရေလျှံခြင်းတို့ မကြာခဏဖြစ်ပွားလာကာ ပိုမိုပြင်းထန်လာသည်ဟု သိပ္ပံပညာရှင်များက ပြောကြားထားသည်။