Top News

အမေရိကန်အနေဖြင့် ထိုင်ဝမ်အား တရုတ်၏ ကျူးကျော်မှုရန်မှ ကာကွယ်ပေးမည်ဟူသော သမ္မတဂျိုးဘိုင်ဒင်၏ မှတ်ချက်စကားသည် ထိုင်ဝမ်ကျွန်းနှင့်ပတ်သက်၍ အမေရိကန်၏ မူဝါဒကို အကြီးအကျယ် ချိုးဖောက်လိုက်ခြင်းပင်ဖြစ်ကြောင်း တရုတ်အစိုးရက စက်တင်ဘာ ၁၉ ရက်တွင် တုံ့ပြန်ပြောကြားခဲ့သည်။

အမေရိကန်သည် ၁၉၇၉ ခုနှစ်တွင် ထိုင်ဝမ်နှင့် တရားဝင်သံတမန်ဆက်ဆံရေး ဖြတ်တောက်ခဲ့ပြီး တရုတ်ကို ပြောင်းလဲအသိအမှတ်ပြုခဲ့သော်လည်း တစ်ချိန်တည်းတွင် ထိုင်ဝမ်အား ထောက်ခံအားပေးမှုများကို အခိုင်အမာ ဆက်လက်လုပ်ဆောင်ခဲ့သည်။

CBS ရုပ်သံ၏ 60 Minutes အစီအစဉ်၌ အမေရိကန်တပ်ဖွဲ့ဝင်များက ထိုင်ဝမ်ကို အကာအကွယ်ပေးခြင်းပြုမပြု မေးမြန်းရာတွင် သမ္မတဘိုင်ဒင်က ကာကွယ်ပေးမည်ဟု ပြန်လည်ဖြေကြားခဲ့ပြီး မကြုံဖူးလောက်သည့် တိုက်ခိုက်မှုရှိလာမည်ဆိုပါက ထိုင်ဝမ်ကို အကာအကွယ်ပေးသွားမည်ဟု ၎င်းက ပြောကြားခဲ့သည်။

ထို့အပြင် ထိုင်ဝမ်အနေဖြင့် ၎င်း၏လွတ်လပ်ရေးနှင့်ပတ်သက်ပြီး ၎င်းတို့ဘာသာ ဆုံးဖြတ်မည်ဖြစ်ကာ အမေရိကန်က ထိုင်ဝမ်၏ သီးခြားလွတ်လပ်မှုနှင့်ပတ်သက်၍ တိုက်တွန်းအားပေးခြင်းမရှိကြောင်း ၎င်းက ထပ်မံပြောကြားခဲ့သည်။

သမ္မတဘိုင်ဒင်၏ ပြောကြားချက်အပေါ် တရုတ်နိုင်ငံဘက်က စက်တင်ဘာ ၁၉ ရက်၌ ဒေါသတကြီးတုံ့ပြန်ခဲ့သည်။

“အဲဒီမှတ်ချက်စကားဟာ ထိုင်ဝမ်ရဲ့ လွတ်လပ်ရေးကို အားပေးထောက်ခံမှာ မဟုတ်ဘူးဆိုတဲ့ အမေရိကန်ရဲ့ အရေးပါတဲ့ ကတိကဝတ်ကို အကြီးအကျယ်ချိုးဖောက်လိုက်တာပဲဖြစ်ပြီး ထိုင်ဝမ်ရဲ့ ခွဲထွက်ရေးအင်အားစုတွေကို မှားယွင်းစွာ အချက်ပြလိုက်တာပဲဖြစ်တယ်” ဟု တရုတ်နိုင်ငံခြားရေးဝန်ကြီးဌာနပြောခွင့်ရ မော်နင်က ပုံမှန်သတင်းစာရှင်းလင်းပွဲတွင် ပြောကြားခဲ့သည်။

မိမိတို့အနေဖြင့် ငြိမ်းချမ်းစွာ ပြန်လည်ပေါင်းစည်းနိုင်ရေး အလားအလာအတွက် စိတ်ရင်းအမှန်ဖြင့် အကြီးမားဆုံးကြိုးပမ်းအားထုတ်မှုများ လုပ်ဆောင်သွားရန် ဆန္ဒရှိပါကြောင်းလည်း ၎င်းကဆိုသည်။

“တစ်ချိန်တည်းမှာပဲ မိမိတို့အနေနဲ့ နိုင်ငံပြိုကွဲစေဖို့ ရည်ရွယ်တဲ့ ဘယ်လိုလုပ်ရပ်မျိုးကိုမဆို လုံးဝသည်းခံမှာမဟုတ်သလို မိမိတို့မှာ လိုအပ်တဲ့ အစီအမံအားလုံးကို ရွေးချယ်လုပ်ဆောင်နိုင်တဲ့ အခွင့်အရေးရှိနေပါတယ်” ဟု ၎င်းက ထပ်မံပြောကြားခဲ့သည်။

အမေရိကန်သမ္မတ ဂျိုးဘိုင်ဒင်၏ အဓိကမဟာမိတ်ဖြစ်သော အောက်လွှတ်တော်ဥက္ကဋ္ဌ နန်စီပယ်လိုစီ ထိုင်ဝမ်သို့ မကြုံစဖူးလာရောက်ခဲ့ပြီးနောက်တွင် အမေရိကန်နှင့် တရုတ်နိုင်ငံအကြား တင်းမာမှုများ ပိုမိုမြင့်တက်လာခဲ့သည်။

ပြီးခဲ့သည့် သီတင်းပတ်က အမေရိကန်ဆီးနိတ်လွှတ်တော် နိုင်ငံခြားဆက်ဆံရေးကော်မတီသည်လည်း ထိုင်ဝမ်အား ဒေါ်လာဘီလျံပေါင်းများစွာရှိသည့် စစ်ရေးအကူအညီများ တိုက်ရိုက်ပေးအပ်နိုင်ရေးနှင့် အပြန်အလှန်ဆက်ဆံမှုများကို ပိုမိုတရားဝင်ဖြစ်စေရေးအတွက် ပထမအဆင့် ခြေလှမ်းကိုစတင်ခဲ့သည်။ မကြာသေးမီကလည်း အမေရိကန်သည် သင်္ဘောဖျက်ဒုံးကျည် အစင်း ၆၀၊ ဝေဟင်မှ ဝေဟင်ပစ်ဒုံးကျည် အစင်း ၁၀၀ အပါအဝင် ဒေါ်လာတစ်ဘီလျံကျော်တန်ကြေးရှိ စစ်လက်နက်များ ရောင်းချဖွယ်ရှိသည့် အစီအစဉ်ကို အတည်ပြုခဲ့သည်။