Top News

COVID-19 ကပ်ရောဂါဆိုင်ရာ ကန့် သတ်ချက်များကို ထပ်မံဖြေလျှော့ရေးနှင့်ပတ်သက်၍ မကြာမီ ဆုံးဖြတ်ချက်ချသွားမည်ဖြစ်ကြောင်း ဟောင်ကောင်ခေါင်းဆောင်က စက်တင်ဘာ ၂၀ ရက်တွင် ပြောကြားခဲ့သည်။

ဘဏ္ဍာရေးဗဟိုချက် ဟောင်ကောင်ကို နှစ်နှစ်ကျော်ကြာ ပြင်ပကမ္ဘာနှင့် အဆက်အသွယ် ပြတ်တောက်စေခဲ့သည့် ကွာရန်တင်းစည်းမျဉ်းများကို ဟောင်ကောင်ဒေသခံများ နှင့် စီးပွားရေးလုပ်ငန်းများက အပြစ်တင်ထားသည်။

“ကျွန်တော်တို့အနေနဲ့ မကြာခင်မှာ ဆုံးဖြတ်ချက်ချသွားမှာဖြစ်ပြီး အများပြည်သူကို ကြေညာသွားမှာပါ” ဟု ဟောင်ကောင်အုပ်ချုပ်ရေးမှူး ဂျွန်လီက သတင်းထောက်များကို ပြောကြားခဲ့သည်။

“ကျွန်တော်တို့ဟာ ကမ္ဘာပေါ်က တခြားနေရာအသီးသီးနဲ့ ကူးလူးဆက်ဆံချိတ်ဆက်သွားဖို့ ဆန္ဒရှိနေပါတယ်။ ကျွန်တော်တို့အနေနဲ့ စနစ်တကျနဲ့ ပြန်ဖွင့်သွားချင်ပါတယ်” ဟု ၎င်းက ထပ်မံပြောကြားခဲ့သည်။

တရုတ်အစိုးရ အဆင့်မြင့်တာဝန်ရှိသူတစ်ဦးက ကပ်ရောဂါဆိုင်ရာ ကန့်သတ်ချက်များ ဖြေလျှော့ရေးကို ထောက်ခံကြောင်း အရိပ်အမြွက် ပြသခဲ့ပြီးနောက်တွင် ဟောင်ကောင်ခေါင်းဆောင်က ယခုကဲ့သို့ ပြောကြားခဲ့ခြင်းဖြစ်သည်။

“ဟောင်ကောင်ရဲ့ ကပ်ရောဂါထိန်းချုပ်ရေး အစီအမံတွေကို ဟောင်ကောင်အစိုးရက အခြေအနေနဲ့ လိုက်လျောညီထွေဖြစ်အောင် ချိန်ညှိပြင်ဆင်တာ၊ မွမ်းမံတာတွေလုပ်ဆောင်တာဟာ လုပ်ရိုးလုပ်စဉ်ပဲဖြစ်တယ်” ဟု တရုတ်အစိုးရ၏ ဟောင်ကောင်နှင့် မကာအိုရေးရာဌာန ဒုတိယညွှန်ကြားရေးမှူး ဟွမ်လျို့ချွမ်က ပေကျင်းမြို့တွင် ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

ပြိုင်ဘက် စီးပွားရေးဗဟိုချက်ဒေသများ ပြန်ဖွင့်နေချိန်တွင် ဟောင်ကောင်သည် တရုတ်ပြည်မကြီး၏ ကိုဗစ်ကင်းစင်ရေး မဟာဗျူဟာကို ကပ်ရောဂါကာလ တစ်လျှောက်လုံးတွင် တစ်စိုက်မတ်မတ် ကျင့်သုံးခဲ့ခြင်းကြောင့် စီးပွားရေးအပေါ် ထိခိုက်မှုများဖြစ်ပေါ်ခဲ့ကာ ပညာရှင်ဆုံးရှုံးမှု ပြဿနာသည်လည်း ပိုမိုကြီးထွားလာခဲ့သည်။

နိုင်ငံတကာမှ ဝင်ရောက်လာသူများအနေဖြင့် မဖြစ်မနေ ဟိုတယ်ကွာရန်တင်း သုံးရက်ဝင်ရခြင်း၊ နေရာအများစုတွင် နှာခေါင်းစည်းတပ်ရခြင်း၊ စီးပွားရေးလုပ်ငန်းများ ဖွင့်လှစ်လည်ပတ်မှုအပေါ် ကန့်သတ်ထားခြင်းနှင့် အများသူငါ သွားလာရာနေရာများတွင် လူလေးဦးထက်ပို၍ စုဝေးခြင်းမပြုရန် တားမြစ်ခြင်း အစရှိသည့် စည်းမျဉ်းများကိုလည်း ဟောင်ကောင်အစိုးရက ဆက်လက်ချမှတ်ထားသည်။

တရုတ်အစိုးရက ရွေးချယ်တင်မြှောက်ထားသည့် လုံခြုံရေးအကြီးအကဲဟောင်း လီသည် ယခုနှစ်ဇူလိုင်လထဲတွင် ဟောင်ကောင်အုပ်ချုပ်ရေးမှူးအဖြစ် စတင်တာဝန်ယူခဲ့ပြီး ကိုရိုနာဗိုင်းရပ်စ်ကူးစက်မှုများကို ထိန်းချုပ်လျက် ဟောင်ကောင်ကို ပြန်ဖွင့်သွားမည်ဟု ကတိပြုထားသည်။

၎င်းသည် ဟိုတယ်ကွာရန်တင်းဝင်ရသည့် ကာလကို ခုနစ်ရက်မှ သုံးရက်သို့ လျှော့ချပေးခဲ့သော်လည်း ဟောင်ကောင်ဒေသခံများ၊ စီးပွားရေးအသင်းအဖွဲ့များနှင့် ကျန်းမာရေး ကျွမ်းကျင်သူများ၏ ကျယ်ကျယ်ပြန့်ပြန့် ဝေဖန်မှုများနှင့် ရင်ဆိုင်နေရသည်။ ဒေသန္တရအစိုးရအနေဖြင့် ကွာရန်တင်းစည်းမျဉ်းများကို ရုပ်သိမ်းခွင့်ပြုလိုက်ပြီဖြစ်ကြောင်း ဟောင်ကောင်မီဒီယာများက မကြာသေးမီက ရေးသားဖော်ပြခဲ့သော်လည်း အစိုးရကမူ အတည်ပြုခြင်းမရှိသေးပေ။