Top News

မြန်မာရွှေ့ပြောင်းလုပ်သားများ၏ ဘဏ်အကောင့်များကို ရာဇဝတ်မှုများတွင် အသုံးပြုနေသည့် ထိုင်းနိုင်ငံသား ဂိုဏ်းခေါင်းဆောင်တစ်ဦးအား ဖမ်းဆီးရမိခဲ့သည်ဟု ထိုင်းနိုင်ငံရှိ The Nation သတင်းဌာနက ဖော်ပြသည်။

Chitisan အမည်ရှိ အဆိုပါထိုင်းနိုင်ငံသားကို ဇန်နဝါရီ ၉ ရက်က ထိုင်းနိုင်ငံ နခွန်ပထုန်ခရိုင်တွင် ဖမ်းဆီးရမိခဲ့ခြင်းဖြစ်သည်ဟု သတင်းတွင် ဖော်ပြထားသည်။

မြန်မာနိုင်ငံသား ရွှေ့ပြောင်းလုပ်သား ၄၅ ဦးက ၎င်းတို့၏ ဘဏ်အကောင့်များ အလွဲသုံးစားပြုလုပ်ခံနေရသဖြင့် ပိတ်ပေးရန် မြန်မာသံရုံးမှတစ်ဆင့် တိုင်ကြားချက်များကို ထိုင်းအာဏာပိုင်များက လက်ခံရရှိခဲ့ပြီးနောက် အဆိုပါထိုင်းနိုင်ငံသားကို လအတန်ကြာစောင့်ကြည့်ခဲ့ပြီးနောက် ဖမ်းဆီးခဲ့ခြင်းဖြစ်သည်။

ရဲတပ်ဖွဲ့၏ အဆိုအရ Chitisan သည် မြန်မာအပါအဝင် နိုင်ငံခြားအလုပ်သမားများအား ဘဏ်စာရင်းဖွင့်ရန် သွေးဆောင်ပြီး ဆင်းမ်ကတ်များ မှတ်ပုံတင်ရာ၌ လွယ်ကူချောမွေ့စေရန် ပံ့ပိုးပေးခဲ့ကြောင်း၊ အကောင့်ဖွင့်ရခြင်းမှာ ၎င်းတို့၏ လစဉ်လုပ်အားခများ ရရှိရန်အတွက်ဖြစ်ကြောင်း၊ အကောင့်ဖွင့်ပြီးနောက် အဆိုပါဘဏ်အကောင့်များကို ဂိုဏ်းများက ယူဆောင်သွားပြီး အွန်လိုင်းစျေးဝယ်လိမ်လည်မှု၊ အွန်လိုင်းလောင်းကစားနှင့် ခေါ်ဆိုမှုစင်တာလိမ်လည်မှုများကဲ့သို့သော ရာဇဝတ်မှုများအတွက် အသုံးပြုနေကြောင်း ရဲတပ်ဖွဲ့၏ ထုတ်ပြန်ချက်ကို ကိုးကားပြီး သတင်းတွင်ဖော်ပြထားသည်။

အဆိုပါလိမ်လည်အကောင့်များတွင် မြန်မာနိုင်ငံသား ရွှေ့ပြောင်းလုပ်သားများ မသိရှိဘဲ ထိုင်းဘတ်ငွေ နှစ်ဘီလျံကျော်လည်ပတ်နေပြီး အချို့သော မြန်မာလုပ်သားများမှာ တရားစွဲခံရသည့်ဖြစ်စဉ်များလည်းရှိကြောင်း အဆိုပါသတင်းတွင် ဖော်ပြထားသည်။

ပြီးခဲ့သည့် နှစ်ကလည်း ထိုင်းအာဏာပိုင်များအနေဖြင့် မြန်မာလုပ်သားများ၏ ငွေစာရင်းများကို အသုံးပြုကာ ရာဇဝတ်မှုလုပ်ငန်းများတွင် အသုံးချခံရမှုများနှင့် ပတ်သက်ပြီး ဖမ်းဆီးရမိခဲ့သည်။

ယခင်နှစ်က အဆိုပါဘဏ်အကောင့်များကို ဖမ်းဆီးရမိခဲ့ရာတွင် လည်ပတ်နေသည့်ငွေမှာ ထိုင်းဘတ်ငွေ သန်း ၃၀၀ နီးပါးရှိနေသည်ကို တွေ့ရပြီး အယုဒ္ဓယ၊ နသွန်ဘူရီနှင့် နသွန်ပထုံဒေသများတွင် ဖမ်းဆီးရမိခဲ့သည်ဟု ထိုင်းအာဏာပိုင်များက ထုတ်ပြန်ခဲ့သည်။

ယင်းသို့ ဘဏ်အကောင့်များကို အလွဲသုံးစားပြုလုပ်ကာ ရာဇဝတ်မှုများတွင် အသုံးပြုနေခြင်းများနှင့် ပတ်သက်ပြီး မြန်မာသံရုံးကလည်း သတိပေးချက်များ ထုတ်ပြန်ခဲ့သည်။

အွန်လိုင်းလောင်းကစားလုပ်သူများ၊ ငွေကြေးခဝါချသူများက ထိုင်းရောက် မြန်မာလုပ်သားအချို့၏ ဘဏ်စာရင်းနှင့် ဘဏ်စာအုပ်များကို ကြားခံအသုံးချနေသဖြင့် ဖမ်းဆီးခံရခြင်း၊ ဖမ်းဝရမ်းထုတ်ခံရခြင်းများ ကြုံတွေ့နေရကြောင်း ဘန်ကောက်မြို့ရှိ ထိုင်းနိုင်ငံဆိုင်ရာ မြန်မာသံရုံးက ထုတ်ပြန်သည်။

PJ နိုင်ငံကူးလက်မှတ်ကိုင်ဆောင်ထားသော MoU မြန်မာလုပ်သားများမှာ ထိုင်းနိုင်ငံသို့ ရောက်ရှိချိန်တွင် MoU ကုမ္ပဏီများက စီစဉ်ပေးသည့်ဘဏ်များ၌ ဘဏ်စာရင်းဖွင့်လှစ်ခြင်း၊ ဘဏ်စာအုပ်ပြုလုပ်ခြင်းတို့ကို ဆောင်ရွက်ရပြီး ယင်းသို့ပြုလုပ်ချိန်တွင် ဘဏ်လုပ်ငန်းစဉ်များနှင့် မရင်းနှီးသည့် မြန်မာလုပ်သားအချို့က MoU ကုမ္ပဏီမှ ကိုယ်စားလှယ်အချို့၏ ပြောကြားချက်များအတိုင်း လိုက်ပါဆောင်ရွက်ရခြင်း၊ ဘဏ်စာရင်းနှင့် ဘဏ်စာအုပ်ကို ကိုယ်စားလှယ်အချို့က ထိန်းသိမ်းထားခြင်းတို့ကို ကြုံတွေ့ခဲ့ရသည်ဟု သံရုံးကထုတ်ပြန်သည်။

အဆိုပါမြန်မာလုပ်သားအချို့၏ ဘဏ်စာရင်းနှင့် ဘဏ်စာအုပ်ထိန်းသိမ်းထားသူ ကိုယ်စားလှယ်များက အွန်လိုင်းမှတစ်ဆင့် လောင်းကစားလုပ်သူများ၊ ငွေကြေးခဝါချလိုသူများထံ မြန်မာလုပ်သားများ၏ ဘဏ်စာရင်းနှင့် ဘဏ်စာအုပ်များကို အခကြေးငွေရယူပြီး ပေးအပ်ခဲ့ခြင်းများရှိခဲ့သည်ဟု မြန်မာသံရုံးက ထုတ်ပြန်သည်။

ယင်းသို့အသုံးချခံရသည့် ဘဏ်စာရင်းများတွင် ငွေကြေးဝင်/ထွက်မှုများခြင်း၊ စုဆောင်းငွေများပြားခြင်း စသည့်မသင်္ကာဖြစ်ဖွယ်ကိစ္စများကြောင့် သက်ဆိုင်ရာ ထိုင်းအာဏာပိုင်အဖွဲ့အစည်းများက ဘဏ်စာရင်းစာအုပ်ပိုင်ရှင် မြန်မာလုပ်သားများကို ဆင့်ခေါ်ဝရမ်းထုတ်ခြင်း၊ ဖမ်းဝရမ်းထုတ်ခြင်း၊ အချုပ်ထောင်တွင် ချုပ်နှောင်ထားခံရခြင်း၊ ထွက်ပြေးတိမ်းရှောင်ခြင်း စသည့်ဖြစ်စဉ်များ တွေ့ကြုံနေရသဖြင့် ဖြေရှင်းပေးလျက်ရှိသည်ဟု မြန်မာသံရုံးက ထုတ်ပြန်သည်။