Top News

၃၆ ကြိမ်မြောက် ထီဖွင့်ပွဲ၌ ကျပ်သိန်း ၁၀၀ တစ်ဆုအပါအဝင် ဆုမဲ တစ်ထောင်ကျော် ထုတ်ယူရန် ကျန်ရှိနေပြီး ဖေဖော်ဝါရီ ၂၈ ရက်အထိ ထုတ်ယူခြင်းမရှိပါက အခွန်ဘဏ္ဍာအဖြစ် သိမ်းဆည်းမည်။

၃၆ ကြိမ်မြောက် ထီဖွင့်ပွဲ၌ ကျပ်သိန်း ၁၀၀ တစ်ဆုအပါအဝင် ဆုမဲ တစ်ထောင်ကျော် ထုတ်ယူရန် ကျန်ရှိနေပြီး ဖေဖော်ဝါရီ ၂၈ ရက်အထိ ထုတ်ယူခြင်းမရှိပါက အခွန်ဘဏ္ဍာအဖြစ် သိမ်းဆည်းမည်ဖြစ်ကြောင်း ဖေဖော်ဝါရီ ၁ ရက်တွင် စီမံကိန်းနှင့် ဘဏ္ဍာရေးဝန်ကြီးဌာန ပြည်တွင်းအခွန်များဦးစီးဌာန အောင်ဘာလေသိန်းဆုဌာနခွဲက ထုတ်ပြန်သည်။  

၂၀၂၂ ခုနှစ် မတ် ၁ ရက်တွင် ဖွင့်လှစ်ခဲ့သော ၃၆ ကြိမ်မြောက် ကျပ် ၁၀၀၀ တန် အောင်ဘာလေသိန်းဆုဖွင့်ပွဲတွင် ဆုမဲ ၁၃၆၉၄ ဆု ခွဲဝေချီးမြှင့်ခဲ့ရာ ဆုမဲ ၁၁၃၅ ဆုကို ယနေ့တိုင် တောင်းခံခြင်းမရှိသေးကြောင်း တွေ့ရှိရသည်ဟု ထုတ်ပြန်ချက်တွင် ပါရှိသည်။ 

အဆိုပါလာရောက်ထုတ်ယူခြင်းမရှိသော ကျပ်သိန်း ၁၀၀ ဆု တစ်ဆု၊ ကျပ် ၁၀ သိန်း ခုနစ်ဆု၊ ကျပ်သုံးသိန်း ရှစ်ဆု၊ ကျပ်နှစ်သိန်း ၄၅ ဆု၊ ကျပ်တစ်သိန်း ၃၄၇ ဆု၊ ကျပ်ငါးသောင်းဆု ၇၂၇ ဆု စသည့်ဆုရလက်မှတ်များကို ၂၀၂၃ ခုနှစ် ဖေဖော်ဝါရီ ၂၈ ရက်အထိ ရန်ကုန်မြို့နှင့် မန္တလေးမြို့ရှိ အောင်ဘာလေသိန်းဆုဌာနခွဲရုံးများသို့ တင်ပြ၍ ဆုငွေများကို တောင်းခံနိုင်ကြောင်း ထုတ်ပြန်ချက်တွင် ဖော်ပြထားသည်။ 

အဆိုပါလာရောက်ထုတ်ယူခြင်းမရှိသည့် ဆုမဲများအား ဖေဖော်ဝါရီ ၂၈ ရက်အထိ ထုတ်ယူခြင်းမရှိပါက အခွန်ဘဏ္ဍာအဖြစ် သိမ်းယူသွားမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်တွင်းအခွန်များဦးစီးဌာန အောင်ဘာလေသိန်းဆုဌာနခွဲက ထုတ်ပြန်သည်။ 

၂၀၂၃ ခုနှစ် ဖေဖော်ဝါရီ ၁ ရက်တွင် ကျင်းပသည့် ၄၇ ကြိမ်မြောက် ကျပ် ၁၀၀၀ တန် အောင်ဘာလေသိန်းဆုဖွင့်ပွဲအတွက် ထီလက်မှတ်များကို က အက္ခရာမှ အစဉ်လိုက် ည ထိ စုစုပေါင်းအက္ခရာ ၁၀ လုံးနှင့် ထီစာအုပ် ၄၇၄၂၈၀ အုပ် ရောင်းချနိုင်ခဲ့ကြောင်း သိရသည်။ 

ဆက်လက်ပြီး ထီလက်မှတ်များရောင်းချရငွေမှာ ကျပ်သန်း ၄၇၄၂ ဒသမ ၈၀၀ ဖြစ်သဖြင့် ရာခိုင်နှုန်း ၇၀ ခွဲဝေချီးမြှင့်မည့် ထီဆုငွေမှာ ကျပ်သန်း ၃၃၁၉ ဒသမ ၉၆၀ ဖြစ်ကြောင်း၊ အဆိုပါခွဲဝေချီးမြှင့်ပေးမည့် ထီဆုငွေများမှာ အထူးဆုကြီးစနစ်တွင် ကျပ်သိန်းငါးထောင် တစ်ဆုနှင့် ကျပ်သိန်းတစ်ထောင် တစ်ဆုသာပါဝင်ပြီး ဆုတစ်ဆုချင်းစနစ်တွင် ကျပ်သိန်းငါးရာ သုံးဆု၊ ကျပ်သိန်းနှစ်ရာ ခုနစ်ဆု၊ ကျပ်သိန်းတစ်ရာ ရှစ်ဆု၊ ကျပ်သိန်းငါးဆယ် ကိုးဆု၊ ကျပ်သိန်းနှစ်ဆယ် ၁၂ဆု၊ ကျပ်ဆယ်သိန်း ၁၁ ဆုနှင့် ဝေဝေဆာဆာပဒေသာဆုမဲစနစ်တွင် ကျပ်သုံးသိန်း ၃၀ ဆု၊ ကျပ်နှစ်သိန်း ၃၀၀ ဆု၊ ကျပ်တစ်သိန်း ၇၀၀၀ ဆု၊ ကျပ်ငါးသောင်း ၁၀၀၀၀ ဆု၊ ကျပ်တစ်သောင်းဆု ၁၀၀၀၀၀ စသည့်ဆုမဲများ ချီးမြှင့်မည်ဖြစ်ကြောင်း သိရသည်။

ယင်းအပြင် ဘဏ္ဍာသိမ်းရငွေမှ ကျပ်သန်း ၁၆၇ ဒသမ ၀၀၀ ကိုလည်း ကျပ် ၁၀ သိန်း လေးဆု၊ ကျပ်သုံးသိန်း ၁ဝဆု၊ ကျပ်နှစ်သိန်း ၃၀၀ ဆု၊ ကျပ်တစ်သိန်း ၁၀၀၀ ဆုကိုလည်း ထပ်မံချီးမြှင့်ပေးမည်ဖြစ်ကြောင်း သိရသည်။