Top News

COVID-19 ရောဂါကူးစက်ပျံ့နှံ့မှုကို ထိန်ချုပ်ရန် Stay at Home (မိမိအိမ်တွင်နေထိုင်ရန်) ကြေညာထားသည့်မြို့နယ်များအား ယင်းအစီအစဉ်ပယ်ဖျက်ကြောင်း  ဧပြီ ၉ ရက်တွင် ကျန်းမာရေးနှင့်အားကစားဝန်ကြီးဌာနက အမိန့်ထုတ်ပြန်သည်။

ကျန်းမာရေးနှင့် အားကစားဝန်ကြီးဌာသည် လတ်တလောအသက်ရှုလမ်းကြောင်းဆိုင်ရာ ရောဂါ COVID-19 ကြိုတင်ကာကွယ်ရေးလုပ်ငန်းများကို ဆောင်ရွက်လျက်ရှိရာ ၂၀၂၀ ပြည့်နှစ် စက်တင်ဘာ ၁၉ ရက်တွင် ရန်ကုန်တိုင်းဒေသကြီးအတွင်းရှိမြို့နယ်အားလုံး(ကိုးကိုးကျွန်းမြို့နယ်မပါ)တွင်လည်းကောင်း၊ ၂၀၂၀ ပြည့်နှစ် စက်တင်ဘာ ၂၅ ရက်၌ မန္တလေးတိုင်းဒေသကြီးရှိ မဟာအောင်မြေ၊ ချမ်းအေးသာစံ၊ အမရပူရမြို့နယ်တို့တွင်လည်းကောင်း၊ ပဲခူးတိုင်းဒေသကြီး ပဲခူးမြို့နယ်တွင်လည်းကောင်း၊ ဧရာဝတီတိုင်းဒေသကြီး ပုသိမ်မြို့နယ်တွင်လည်းကောင်း၊ အောက်တိုဘာ ၁၉ ရက်တွင် ကချင်ပြည်နယ် ဖားကန့်မြို့နယ်တွင်လည်းကောင်း၊  ဒီဇင်ဘာ ၂၆ ရက်တွင် မန္တလေးတိုင်းဒေသကြီး အောင်မြေသာစံ၊ ချမ်းမြသာစည်၊ ပြည်ကြီးတံခွန်၊ ပုသိမ်ကြီးမြို့နယ်တို့တွင်လည်းကောင်း ရောဂါကူးစက်ပျံ့နှံ့မှုကို ပိုမိုထိရောက်စွာ ထိန်းချုပ်နိုင်ရန်အတွက် သက်ဆိုင်ရာမြို့နယ်အသီးသီးမှ ပြည်သူများအနေဖြင့် မိမိအိမ်တွင်နေထိုင်ရန် Stay at Home အမိန့်များထုတ်ပြန်ခဲ့ခြင်းဖြစ်သည်။

လက်ရှိတွင် Stay at Home အဖြစ် သတ်မှတ်ထုတ်ပြန်ခဲ့သော တိုင်းဒေသကြီးများနှင့် ပြည်နယ်အတွင်းရှိ မြို့နယ်များတွင် COVID-19 ရောဂါဓာတ်ခွဲအတည်ပြုလူနာ ထပ်မံတွေ့ရှိမှု လျော့နည်းလာခြင်း၊ တစ်ဦးမှတစ်ဦးသို့ အစုလိုက်ကူးစက်ဖြစ်ပွားမှု လျော့နည်းလာခြင်းတို့ကြောင့် အထက်ဖော်ပြပါ တိုင်းဒေသကြီး/ပြည်နယ်အတွင်းရှိ ပြည်သူများအနေဖြင့် ၂၀၂၁ ခုနှစ် ဧပြီ ၁၀ ရက် နံနက် ၄ နာရီအချိန်မှစ၍ မိမိနေအိမ်တွင်နေထိုင်ရန် Stay at Home အစီအစဉ်တွင် အကျုံးဝင်ခြင်းမှပယ်ဖျက်ကြောင်း ကျန်းမာရေးနှင့်အားကစားဝန်ကြီးဌာနက ထုတ်ပြန်သည် အမိန့်စာတွင်ဖော်ပြပါရှိသည်။