Top News

ပဲခူးမြို့တွင် လုံခြုံရေးတပ်ဖွဲ့ဝင်များ၏ ပစ်ခတ်ဖြိုခွဲမှုအတွင်း သေဆုံးမှုဖြစ်စဉ်နှင့် နေအိမ်စွန့်ခွာထွက်ပြေးမှု ဖြစ်စဉ်များရှိနေကြောင်း သိရသည်။

ပဲခူးတွင် ဆက်တိုက် ပစ်ခတ်ဖြိုခွဲမှု အတွင်း သေဆုံး ဒဏ်ရာရမှုများရှိကြောင်း အခင်းဖြစ်ပွါးမှုအနီး ဒေသခံများ၏ ပြောကြားချက်အရ သိရသည်။

ဧပြီ ၉ ရက်နေ့ နံနက်၅နာရီမှစတင်၍ ပစ်ခတ်မှုများအတွင်း ထိခိုက်သေဆုံးမှုများရှိခဲ့ခြင်း ဖြစ်သည်ဟုလည်း ဆိုကြသည်။

ဧပြီလ၉ ရက်နေ့နံနက်ပိုင်းတွင် လုံ​ခြုံ​ရေးတပ်ဖွဲ့များက ဆံတော်တွင်းလမ်းမ နှင့် မဂ္ဂတစ် လမ်းမတန်းများရှိ အကာအရံများ ပိတ်ဆို့ထားသော သဲအိတ်များ ဝါးကပ် များကို ပစ်ခတ်ရှင်းလင်းမှုအတွင်း သေဆုံးမှုအချို့လည်း ရှိခဲ့သည်။

ထို့ပြင်ကျည်ထိမှန်ထားသူအချို့ ကို ပြန်လည် သယ်ယူခွင့်မရသည့် အခြေအနေများ ရှိခဲ့ကြောင်းလည်း အခင်းဖြစ် ရပ်ကွက်နေသူအချို့၏ပြောကြားချက်အရ သိရသည်။

ရပ်ကွက်အတွင်းရှိနေအိမ်များသို့ ဝင်ရောက်ဖမ်းဆီးမှုများရှိနေသဖြင့် ဟုဆိုကာ ​​​ဒေသခံအချို့နီးစပ်ရာ တောရွာများသို့ပြောင်းရွေ့မှုများလည်း ရှိနေသည်ဟုဆိုသည်။

“ရင်ခွဲရုံကို လတ်တလော ရောက်လာတာတော့ ၅ လောင်း ရှိတယ်၊ သေဆုံးတဲ့အရေအတွက်ကတော့ များတယ်လို့ ပြောနေကြတယ်"ဟုဒေသခံ ရပ်ကွက်သားတစ်ဦးကပြောကြားသည်။

ထိခိုက်သေဆုံးမှု စာရင်း အသေးစိတ် အချက်အလက်ကိုမူ မြေပြင်အခြေအနေအရ ယနေ့နံနက်ပိုင်းအချိန်ထိ အတည်ပြုနိုင်ခြင်း မရှိသေးပေ။

ပဲခူးပစ်ခတ်ဖြိုခွဲမှု ဖြစ်စဉ်နှင့် ပတ်သက်၍  ကုလသမဂ္ဂကလည်း စောင့်ကြည့်လျက်ရှိကြောင်း မြန်မာဆိုင်ရာ ကုလသမဂ္ဂရုံးက  ယမန်နေ့ ညပိုင်းက ထုတ်ပြန်ထားသည်။

ဆူပူအကြမ်းဖက်အဖွဲ့၏ ကျည်စစ်ကျည်မှန် အသုံးပြုတန်ပြန်တိုက်ခိုက်မှုကြောင့် လုံခြုံရေး တပ်ဖွဲ့ဝင် ၂ ဦး ထိခိုက်ဒဏ်ရာရရှိခဲ့ပြီး ဆူပူအကြမ်းဖက်အဖွဲ့မှ အမျိုးသား ၁ ဦးမှာ သေဆုံးကာ  အမျိုးသား ၂ ဦးမှာ ထိခိုက်ဒဏ်ရာရရှိခဲ့သည်။

ပဲခူးမြို့ပေါ်ဖြစ်စဥ်များနှင့်ပတ်သက်၍ ဧပြီ ၉ ရက်တွင် တပ်မတော်သတင်းမှန်ပြန်ကြားရေးအဖွဲ့က သတင်းထုတ်ပြန်ထားရာတွင် ဧပြီ ၉ ရက်တွင် လုံခြုံရေးတပ်ဖွဲ့ဝင်များ ပါဝင်သောပူးပေါင်းအဖွဲ့သည် ပဲခူးမြို့ပေါ်ရပ်ကွက်များအတွင်း  လမ်းမ၊ လမ်းသွယ်များပေါ်တွင် ပြုလုပ်ထားရှိသော အတားအဆီးများအား လိုက်လံ ရှင်းလင်းဖယ်ရှားနေစဉ် နံနက် ၅ နာရီအချိန်ခန့်တွင် ရှင်စောပုရပ်ကွက်၊ မဂ္ဂတစ်လမ်းနှင့် ဆိုရှယ်လစ် (၁)လမ်းထောင့်ရှိ အတားအဆီးအား ဖယ်ရှားနေစဉ် ဆူပူသူ အင်အား ၃၀ ဦးခန့်မှ လက်လုပ်သေနတ်၊ လေးခွ၊ ဂျင်ကလိ၊ လက်ပစ်ဗုံးတို့ဖြင့် ပစ်ပေါက်ခဲ့သဖြင့် လုံခြုံရေးတပ်ဖွဲ့ဝင် များက အဓိကရုဏ်းနှိမ်နင်းရေးလက်နက်များဖြင့် ခြောက်လှန့်ပစ်ခတ်လူစုခွဲခဲ့ရာ နံနက် ၇ နာရီ အချိန်တွင် လူစုကွဲသွားခဲ့ပြီး ဆူပူသူများပစ်ပေါက်ခဲ့သည့် လက်ပစ်ဗုံး အမျိုးအစား (စိစစ်ဆဲ) နှစ်လုံးမှာ ပေါက်ကွဲမှုမရှိသဖြင့် လုံခြုံရေးတပ်ဖွဲ့ဝင်များက ဖောက်ခွဲ ဖျက်ဆီးခဲ့ ကြောင်း ဖော်ပြထားသည်။

အလားတူ နံနက် ၈ နာရီအချိန်ခန့်တွင် နန်းတော်ရာရပ်ကွက်၊ ဆံတော်တွင်းလမ်းမပေါ်ရှိ အတားအဆီးများအား ရှင်းလင်းဖယ်ရှားနေစဉ် ဆူပူသူအင်အား ၈၀ ဦးခန့်မှ လက်လုပ်သေနတ်၊ လေးခွ၊ ဂျင်ကလိများဖြင့် အကြမ်းဖက်ရန်ပြုပစ်ခတ်ခဲ့သဖြင့် လုံခြုံရေးတပ်ဖွဲ့ဝင် များက ခြောက်လှန့်ပစ်ခတ်လူစုခွဲခဲ့ရာ နံနက် ၈ နာရီ ၂၀ မိနစ်အချိန်တွင် လူစုကွဲသွားခဲ့ပြီး ဆူပူသူများက လက်လုပ်သေနတ်များဖြင့် ပစ်ခတ်မှုကြောင့် လုံခြုံရေးတပ်ဖွဲ့ဝင် နှစ်ဦးတွင် ခဲသီးဖောက်ဝင်ဒဏ်ရာများရရှိခဲ့ကြောင်း သတင်းထုတ်ပြန်ချက်တွင်ပါရှိသည်။

  ထို့အတူ နံနက် ၁၀ နာရီအချိန်တွင် အတားအဆီးများအားရှင်းလင်းစဉ် နန်းတော်ရာ ရပ်ကွက်၊ စက်ပိုင်း ၄ လမ်းရှိ "ခင်"အလှပြင်ဆိုင်အား သတင်းအရ ဝင်ရောက်ရှာဖွေခဲ့ရာ  လက်လုပ်သေနတ်များ၊ လက်လုပ်မိုင်းများ၊ ဂျင်ကလိများ၊ လေးကိုင်း၊ မြှားတံများ၊ လက်လုပ်ဒိုင်းများနှင့် အခြားဆက်စပ်ပစ္စည်းများအား သိမ်းဆည်းရမိခဲ့ပြီး ၎င်းဆိုင်အနီးရှိ အတားအဆီးအား ရှင်းလင်းစဉ် သဲအိတ်များအောက်တွင် လက်လုပ်မိုင်း နှစ်လုံးအား ဝါယာကြိုးဖြင့် တွဲဆက်၍ ထောင်ထားသည်ကို တွေ့ရှိရသဖြင့် လုံခြုံရေးတပ်ဖွဲ့ဝင်များက အသက်မဲ့ပြုလုပ်ဖယ်ရှားရှင်းလင်းခဲ့ကြောင်း၊ နံနက် ၉ နာရီခွဲအချိန်တွင် ပုဏ္ဏားစုရပ်ကွက်၊ မှော်ကန် ၁၅ လမ်းထိပ်တွင် အတားအဆီးများအား ဆက်လက်ရှင်းလင်းနေစဉ် ဆူပူသူ အင်အား ၅၀ ဦးခန့်ကလက်လုပ်သေနတ်၊ မီးပုလင်း၊ လေးခွ၊ ဂျင်ကလိများဖြင့် အကြမ်းဖက်ရန်ပြုပစ်ခတ်တိုက်ခိုက် ခဲ့သဖြင့် လုံခြုံရေးတပ်ဖွဲ့ဝင်များက ခြောက်လှန့်ပစ်ခတ်လူစုခွဲခဲ့ရာ နံနက် ၉ နာရီ ၄၅ မိနစ်အချိန်တွင် လူစုကွဲသွားခဲ့ကြောင်း သတင်းထုတ်ပြန်ချက်တွင်ပါရှိသည်။

 ထို့ပြင် လုံခြုံရေးတပ်ဖွဲ့ဝင်များက အတားအဆီးများအား ဆက်လက်ရှင်းလင်းခဲ့ရာ နံနက် ၉ နာရီ ၅၀ မိနစ်အချိန်ခန့်တွင် နန်းတော်ရာရပ်ကွက်၊ ဆံတော်တွင်းလမ်းမအရောက် ဓာတ်မီးတိုင်တစ်တိုင်အနီး သံပိုက်လုံးဖြင့် ပြုလုပ်ထားသော လက်လုပ်မိုင်း တစ်လုံးအား တွေ့ရှိရ သဖြင့် လုံခြုံရေးတပ်ဖွဲ့ဝင်များက အသက်မဲ့ပြုလုပ်ဖယ်ရှားရှင်းလင်းခဲ့ရကြောင်း၊ ဖော်ပြပါအတားအဆီးများအား ဖယ်ရှားရှင်းလင်းရာတွင် အခိုင်အမာပြု လုပ်ထားမှုများကြောင့် လူအင်အားဖြင့် ဖယ်ရှားရှင်းလင်းခြင်းအပြင် ယာဉ်ကြီး/ ယန္တယားများအသုံးပြုဖယ်ရှား ရှင်းလင်း ခဲ့ရကြောင်း၊  အထက်ပါ​ဖြစ်စဥ်များတွင်ဆူပူသူများ၏ တိုက်ခိုက်မှုကြောင့် လုံခြုံရေး တပ်ဖွဲ့ဝင် နှစ် ဦး ထိခိုက်ဒဏ်ရာရရှိခဲ့ပြီး ဆူပူသူများအနက် အမျိုးသား တစ် ဦး သေဆုံးပြီး အမျိုးသား နှစ်ဦးမှာ ထိခိုက်ဒဏ်ရာရရှိခဲ့ကြောင်းသတင်းထုတ်ပြန်ချက်အရသိရသည်။