Top News

နယ်ဒေသများမှ ရွှေများ ထွက်ရှိလာခြင်းကြောင့် ရွှေစျေးနှုန်းတက်ရန် အကြောင်းမရှိကြောင်း ရန်ကုန်တိုင်းရွှေလုပ်ငန်းရှင်များအသင်းဥက္ကဌ ဦးမျိုးမြင့်က ပြောကြားသည်။

“လောလောဆယ်မှာ ဒီမှာရွှေစျေးတက်ဖို့က အကြောင်းမရှိပါဘူး။ ရွှေလည်းထွက်နေပါတယ်။ နယ်ကလည်းရွှေတွေအများကြီး ထွက်နေပါပြီ။ ဒါကြောင့်မို့ ရွှေစျေးနှုန်းတက်ဖို့က အခြေအနေမရှိပါဘူး” ဟု ရန်ကုန်တိုင်းဒေသကြီး ရွှေလုပ်ငန်းရှင်များအသင်း ဥက္ကဌ ဦးမျိုးမြင့်က ပြောကြားသည်။

ယခင်က ကောလာဟလသတင်းများ လွှင့်ထုတ်ကာ ရွှေစျေးနှုန်းမြင့်တက်ရန် လုပ်ဆောင်မှုများရှိခဲ့ကြောင်း၊ မြန်မာ့ရွှေစျေးနှုန်းမှာ ကမ္ဘာ့ရွှေစျေးနှုန်း အနိမ့်အမြင့်များပေါ်တွင်သာ မူတည်ကြောင်း ၄င်းက ဆက်လက်ပြောကြားသည်။

“အရင်ကတော့ ကောလာဟလတွေ လွှင့်ထုတ်ပြီး ရွှေစျေးကစားတဲ့ဟာတွေရှိတယ်။ အခုနောက်ပိုင်းတော့ အဲ့ဒါတွေက မရှိတော့တဲ့အခြေအနေဖြစ်ပါတယ်” ဟု ရွှေလုပ်ငန်းရှင်များအသင်း ဥက္ကဌ ဦးမျိုးမြင့်က ပြောကြားသည်။

မြန်မာ့ရွှေစျေးနှုန်းမှာ မကြာမီတွင် တည်ငြိမ်သွားမည့်အခြေအနေတွင်ရှိကြောင်း၊ ရွှေစျေးနှုန်းသတ်မှတ်ရေးကော်မတီက ထုတ်ပြန်သည့် သတ်မှတ်စံချိန်စံညွှန်းများလည်း ထွက်ပေါ်လာပြီဖြစ်ကြောင်း ဦးမျိုးမြင့်က ဆက်လက်ပြောကြားသည်။

“စံချိန်စံညွှန်းနဲ့ ညီတဲ့ ချိန်ခွင်၊ ကတ္တားတွေ ထွက်လာပါပြီ။ ပြီးတော့ ဆော့ဝဲလ်တွေ ပြန်ပြီးတော့ ရေးဆွဲနေပါပြီ။ အဲ့ဒါတွေပြီးသွားလို့ရှိရင် တညီတညွတ်တည်းဖြစ်ပြီးတော့ စျေးနှုန်းလည်းပြန်ပြီး တော့ ညီသွားမှာ ဖြစ်ပါတယ်” ဟု ဦးမျိုးမြင့်က ပြောကြားသည်။

ဇန်နဝါရီ ၁၄ ရက်တွင် ဓာတ်သတ္တု(ရွှေ)ရည်ညွှန်းစျေး  သတ်မှတ်ရေးကော်မတီက သိပ်ဆည်းဆ ၁၉ ဒသမ ၂၅ ဂရမ်/ ကုဗစင်တီမီ တာနှင့်အထက်ရှိ စံချိန်မီရွှေတစ်ကျပ်သား (၁၆ ဒသမ ၃၂၉၃၂၅ ဂရမ်)၏စျေးနှုန်းအနေဖြင့် တစ်ကျပ်သားလျှင် ကျပ် ၅၃၈၀၀၀၀ ဖြစ်ကြောင်း ထုတ်ပြန်ထားသည်။

ပြင်ပရွှေစျေးကွက်တွင် တစ်ကျပ်သားလျှင် ကျပ်သိန်း ၆၀ ကျော်ရှိနေသည်ဟု ပြင်ပရွှေစျေးကွက်မှ သိရသည်။