Top News

လီဗာပူးလ်နည်းပြ အာနယ်ဆလော့က နော်တင်ဟမ်ဖောရက်စ်အသင်းသည် ပရီးမီးယားလိဂ်ချန်ပီယံဆုကို မျှော်မှန်းနိုင်သည့် အသင်းတစ်သင်းဖြစ်သည်ဟု သုံးသပ်ပြောကြားခဲ့သည်။

လီဗာပူးလ်အသင်းသည် ယခုတစ်ပတ်ကြားရက်တွင် ယှဉ်ပြိုင်ကစားမည့် ပရီးမီးယားလိဂ်ပွဲစဉ်၌  နော်တင်ဟမ်အသင်းနှင့် ရင်ဆိုင်ရမည်ဖြစ်သောကြောင့် အာနယ်ဆလော့က ပြိုင်ဘက်အသင်းနှင့် ပတ်သက်၍ ယခုကဲ့သို့ ပြောကြားခဲ့ခြင်းဖြစ်သည်။

''အမှတ်ပေးဇယားက အဆုံးအဖြတ်ပေးနိုင်တယ်လို့ ကျွန်တော် အမြဲပြောခဲ့ပါတယ်။ လက်ရှိအချိန်မှာ ဖောရက်စ်က အာဆင်နယ်၊ ချယ်လ်ဆီး၊ မန်စီးတီးတို့နဲ့အတူ ကျွန်တော်တို့ရဲ့ ပြိုင်ဘက်အသင်းတစ်သင်းအဖြစ် ရှိနေတာပါ။ သူတို့ရဲ့ ကစားပုံနဲ့ သူတို့ရဲ့ ရလဒ်တွေကို ကြည့်ရင် သူတို့ဟာ အခုလို သတ်မှတ်ခံရဖို့ ထိုက်တန်ပါတယ်။ ကျွန်တော်တို့ အလွန်ခက်ခဲတဲ့ စိန်ခေါ်မှုကို ရင်ဆိုင်ရမှာပါ''ဟု အာနယ်ဆလော့က ပြောကြားခဲ့သည်။

လက်ရှိအချိန်၌ နော်တင်ဟမ်အသင်းသည် ပရီးမီးယားလိဂ်အမှတ်ပေးဇယား တတိယနေရာတွင် ဒုတိယနေရာမှ အာဆင်နယ်အသင်းနှင့် အမှတ်တူ ရပ်တည်နေပြီး တစ်ပွဲလျော့ကစားထားသည့် လီဗာပူးလ်နှင့် (၆)မှတ်သာ ကွာဟနေသည်။

နော်တင်ဟမ်အသင်းသည် ပြိုင်ပွဲစုံ(၇)ပွဲဆက် အနိုင်ရရှိထားပြီး အင်္ဂါနေ့ (ယနေ့)တွင် အိမ်ကွင်း၌ လီဗာပူးလ်အသင်းနှင့် ယှဉ်ပြိုင်ကစားရမည်ဖြစ်သည်။

ထို့ပြင် ၎င်းတို့သည် ပထမအကျော့တွင် လီဗာပူးလ်ကို အဝေးကွင်း၌ (၁-၀)ဂိုးဖြင့် အနိုင်ရထားသည့်အတွက် အာနယ်ဆလော့က သတိထားရမည့် ပြိုင်ဘက်အသင်းအဖြစ် သတ်မှတ်ထားခြင်းဖြစ်ကြောင်း သိရသည်။