Top News

ဟောင်ကောင်၏ လစ်ဘရယ်ကျသော သင်ရိုးညွှန်းတမ်းများသည် ပြီးခဲ့သောနှစ်တွင် အကြမ်းဖက်မှုလည်း ပါဝင်သည့် ဆန္ဒပြမှုများကို အားကောင်းစေခဲ့သည်ဟု စောဒကတက်လျက် ပေကျင်းလိုလားသည့် ဟောင်ကောင်အုပ်ချုပ်ရေးမှူးက ဟောင်ကောင် ပညာရေးစနစ်ကို အလုံးစုံပြုပြင်ပြောင်းလဲမည်ဟု မေ ၁၁ တွင် ကတိပြုခဲ့သည်။

လတ်တလောအသုံးပြုနေသော အလယ်တန်းသင်ရိုးညွှန်းတမ်းသည် အမိုးမပါသော ကြက်ခြံနှင့်တူကြောင်း အုပ်ချုပ်ရေးမှူး ကာရီလမ်က ခိုင်းနှိုင်းခဲ့ပြီး ၎င်း၏အစိုးရသည် ပြုပြင်ပြောင်းလဲရေး အစီအစဉ်များကို မကြာမီထုတ်ပြန်မည်ဟု ပြောကြားခဲ့သည်။

အနာဂတ်တွင် လစ်ဘရယ်နှင့်ဆိုင်သော လေ့လာမှုဘာသာရပ်များကို ကိုင်တွယ်မှုနှင့်ပတ်သက်၍ မိမိတို့သည် အများပြည်သူထံ ယခုနှစ်အတွင်း ရှင်းရှင်းလင်းလင်း ထုတ်ပြန်သွားမည်ဖြစ်ကြောင်း မေ ၁၁ ထုတ် အစိုးရလိုလားသည့် သတင်းစာ Ta Kung Pao နှင့် အင်တာဗျူးတွင် လမ်က ပြောကြားခဲ့သည်။

စာသင်ခန်းများတွင် ကျောင်းဆရာများအား ၎င်းတို့၏ နိုင်ငံရေးဘက်လိုက်မှုကို ခွင့်ပြုထားသည်ဟု ခံစားရပြီး ယခုအခါ အစိုးရ၏ ကျယ်ပြန့်သော ကြီးကြပ်မှုလိုအပ်နေပြီဖြစ်ကြောင်း လမ်က ပြောကြားခဲ့သည်။

ပြီးခဲ့သောနှစ်တွင် လူငယ်များဦးဆောင်သော အကြမ်းဖက်မှုများ မကြာခဏပါဝင်သည့် ဆန္ဒပြမှုများသည် ခုနစ်လဆက်တိုက်ဖြစ်ပွားခဲ့ပြီး လူသန်းနှင့်ချီက လမ်းပေါ်ထွက်ခဲ့ကြသည်။ ထိုဆန္ဒပြမှုများအတွင်း လူ ၈၀၀၀ ကျော် ဖမ်းဆီးခံခဲ့ရပြီး ယင်းတို့အနက် ၁၇ ရာခိုင်နှုန်းမှာ အလယ်တန်းကျောင်းသားများ ဖြစ်သည်။

ထိုဆန္ဒပြမှုများအား ရဲတပ်ဖွဲ့၏ နှိမ်နင်းမှုကို အမှီအခိုကင်းသော စုံစမ်းစစ်ဆေးမှု ပြုလုပ်ရန် သို့မဟုတ် အားလုံးလွှမ်းခြုံသော မဲပေးမှုစနစ်ပြုလုပ်ရန် တောင်းဆိုမှုများကို လမ်က တင်းခံခဲ့သည်။

ဟောင်ကောင်တွင် ဖြစ်ပွားနေသော သဘောထားကွဲလွဲမှုများကို ကုစားပေးမည်ဟု လမ်က နှစ်သစ်ကူးတွင် ကတိပြုခဲ့သော်လည်း ပြန်လည်ရင်ကြားစေ့ရေး သို့မဟုတ် နိုင်ငံရေးဆိုင်ရာ ဖြေရှင်းနည်းအတွက် လမ်းကြောင်းကို ဦးတည်သည့် ကမ်းလှမ်းမှုကို ၎င်း၏ အစိုးရက မပြုလုပ်သေးပေ။

နိုင်ငံတကာ၏ အာရုံကို ဆွဲဆောင်နိုင်ခဲ့သော မြို့တစ်မြို့ဖြစ်စေသည့် လွတ်လပ်ခွင့်များကို ပေကျင်းက တစ်စတစ်စနှင့် ဖယ်ထုတ်နေမှုကို စိုးရိမ်နေကြသည့် ဟောင်ကောင်ပြည်သူများကို လမ်၏ မှတ်ချက်များက ဒေါသထွက်စေသည်။

တရုတ်အစိုးရ၏ ကျောထောက်နောက်ခံပြုမှုဖြင့် ဟောင်ကောင်အစိုးရသည် တရုတ်နိုင်ငံတော်သီချင်းအား စော်ကားမှုသည် ဥပဒေနှင့်မညီကြောင်း သတ်မှတ်သော ဥပဒေကြမ်းတစ်ခုကို ပြဋ္ဌာန်းနိုင်ရန် တွန်းအားပေးနေသည်။ အစဉ်အလာရှိသော သြဇာကြီး ပုဂ္ဂိုလ်များအား လိုလားသူများကလည်း နိုင်ငံတော် အဖျက်အမှောင့်လုပ်ရပ်များအား ဆန့်ကျင်ရေးဥပဒေပြဋ္ဌာန်းရန်အတွက် လှုံ့ဆော်နေကြသည်။

တရုတ်ထံမှ ဒီမိုကရေစီနှင့် ကိုယ်ပိုင်အုပ်ချုပ်ခွင့် တိုးမြှင့်ရရှိရန်အတွက် အထူးသဖြင့် ဟောင်ကောင်လူငယ်များအကြား တောင်းဆိုမှုကြီးထွားလာခြင်းကို ဟန့်တားရန် ဥပဒေကြမ်းအသစ်က လိုအပ်ကြောင်း ဟောင်ကောင်အစိုးရက ထုတ်ပြန်ခဲ့သည်။

သို့သော် ထိုဥပဒေများသည် လွတ်လပ်စွာပြောဆိုခွင့်ကို အားလျော့စေမည်ဖြစ်ပြီး ကြီးထွားလာသော သဘောထားကွဲပြားမှုများကို ကုစားပေးနိုင်မည်မဟုတ်ကြောင်း အတိုက်အခံများက ထောက်ပြခဲ့ကြသည်။

ဟောင်ကောင်တွင် ပြည်မကြီးတရုတ်တွင် မရရှိနိုင်သော ပညာရပ်ဆိုင်ရာ လွတ်လပ်ခွင့်များပေးထားသည့် အာရှ၏အကောင်းဆုံးကျောင်းနှင့် တက္ကသိုလ်အချို့ရှိသည်။

စာသင်ကျောင်းများအား မည်သည့် သင်ကြားနည်းဖြင့် သင်ကြားမည်ကို ရွေးချယ်ခွင့်ပြုသော ဆန်းစစ်ဝေဖန်နိုင်သည့် တွေးခေါ်မှု အားကောင်းစေမည့်နည်းလမ်းတစ်ခုဖြင့် လစ်ဘရယ်ဆိုင်ရာ သင်ရိုးများကို ၂၀၀၉ ခုနှစ်တွင် မိတ်ဆက်ခဲ့သည်။

သို့သော် ထိုသင်ရိုးများကို မျိုးချစ်စိတ်ဓာတ် ပိုမိုရှင်သန်စေမည့် ပညာရေးကို လိုလားသော တရုတ်အစိုးရမီဒီယာနှင့် ပေကျင်း ထောက်ခံသည့် နိုင်ငံရေးသမားများက မလိုလားကြပေ။

ဟောင်ကောင်အား မည်သို့လည်ပတ်ရန်နှင့် ပတ်သက်၍ အကြံဉာဏ်ပေးမှုတွင် ကျယ်ပြန့်သော ကဏ္ဍမှ ပါဝင်ခွင့်ကို ဟောင်ကောင်ရှိ ပေကျင်း၏ ရုံးများက ပြီးခဲ့သောလတွင် ကြေညာခဲ့ရာ ဖွဲ့စည်းပုံအခြေခံဥပဒေဆိုင်ရာ အချင်းများမှုဖြစ်ပေါ်ခဲ့စဉ် ဖမ်းဆီးမှုများနှင့် တရားစွဲဆိုမှုများသည် အရှိန်မလျော့ သွားခဲ့ပေ။