Top News

မန်ယူအသင်းနည်းပြသစ် ရန်းနစ်က အသင်းအား ပွဲကိုထိန်းချုပ်ကစားနိုင်သည့် အသင်းအဖြစ် တည်ဆောက်သွားမည်ဖြစ်ပြီး ကိုယ်ပိုင်နည်းဗျူဟာဖြင့် ကစားနိုင်အောင် ကြိုးစားသွားမည်ဟု ပြောကြားသည်။ 

    

ရန်းနစ်သည် ဒီဇင်ဘာ ၃ ရက်တွင် မန်ယူနည်းပြအဖြစ် ပထမဆုံးအကြိမ်ပြုလုပ်သည့် သတင်းစာရှင်းလင်းပွဲ၌ ယင်းကဲ့သို့ ပြောကြားခဲ့ခြင်းဖြစ်သည်။ 

မန်ယူအသင်းသည် ယခုရာသီ ပရီးမီးယားလိဂ်တွင် ရလဒ်များဆိုးရွားနေခြင်းကြောင့် နည်းပြ ဆိုးလ်ရှားကို ရာထူးမှထုတ်ပယ်ခဲ့ပြီး ၎င်းနေရာတွင် ရန်းနစ်ကို ခြောက်လစာချုပ်ဖြင့် အစားထိုး ခန့်အပ်ခဲ့ခြင်းဖြစ်သည်။ 

    

ရန်းနစ်က "မန်ယူအသင်းအနေနဲ့ အနာဂတ်မှာ ပွဲကိုထိန်းချုပ်ကစားပြီး ကိုယ်ပိုင် နည်းဗျူဟာနဲ့ ကစားနိုင်တဲ့အသင်းဖြစ်လာမယ်လို့ ကျွန်တော် ထင်ပါတယ်။ ဒါမှ အသင်းလိုက် စွမ်းဆောင်ရည်ပိုကောင်းလာမှာဖြစ်သလို ကစားသမားတွေအနေနဲ့ စုစုစည်းစည်းနဲ့ကစားပြီး အသင်းရဲ့စိတ်ဓာတ်ပိုင်းလည်း တိုးတက်လာပါလိမ့်မယ်။ အဲဒီလိုလုပ်ဖို့က မလွယ်သလို ကျွန်တော့်အနေနဲ့ အချိန်တိုအတွင်း လုပ်နိုင်မှာလည်း မဟုတ်ပါဘူး။ ဒါပေမဲ့ ကျွန်တော့်ရဲ့ အဓိကရည်မှန်းချက်က မန်ယူအသင်းကို ပွဲကိုထိန်းချုပ်ကစားနိုင်တဲ့ အ သင်းဖြစ်အောင် တည်ဆောက်ဖို့ပါပဲ"ဟု ပြောကြားခဲ့သည်။ 

    

ထို့ပြင် ရန်းနစ်က ဆိုးလ်ရှား နည်းပြရာထူးမှ ထုတ်ပယ်ပြီးနောက် မန်ယူအသင်းကို ယာယီနည်းပြအဖြစ် ကိုင်တွယ်ခဲ့သည့် မိုက်ကယ်ကာရစ်အား ၎င်းင်း၏နည်းပြအဖွဲ့တွင် ဆက်ထိန်းထားရန် ကြိုးပမ်းခဲ့သော်လည်း မအောင်မြင်ခဲ့ကြောင်း ဝန်ခံခဲ့သည်။