မန်စီးတီးနည်းပြ ဂွါဒီယိုလာက လီဗာပူးလ်အသင်းအား (၁-၃)ဂိုးဖြင့် အရေးနိမ့်ခဲ့သည့်ပွဲတွင် လီဗာပူးလ်ဂိုးဧရိယာအတွင်း လက်ထိဘောများနှင့်ပတ်သက်ပြီး ပယ်နယ်တီမရရှိမှုအပေါ် ပရော်ဖက်ရှင်နယ်ဒိုင်လူကြီးများအဖွဲ့ချုပ်(PGMO)၏အထွေထွေမန်နေဂျာဖြစ်သူ မိုက်ရီလေးကိုသာ မေးရန် တိုက်တွန်းခဲ့သည်။
'' ဒီကိစ္စနဲ့ပတ်သက်ပြီး မိုက်ရီလေးနဲ့ တာဝန်ရှိသူတွေကိုပဲ သွားမေးပါ။ ကျွန်တော့်ကို လာမမေးပါနဲ့။ မိုက်ရီလေးနဲ့ သူ့လူတွေကိုမေးပါ။ ကျွန်တော်ကတော့ ပွဲအကြောင်းပဲပြောဖို့ ဒီကိုလာတာဖြစ်ပါတယ်။ ဘာကြောင့် တစ်နေ့မှာ လက်ထိဘောဖြစ်ပြီး နောက်တစ်နေ့မှာ လက်ထိဘောမဟုတ်တဲ့အကြောင်းတွေ ကျွန်တော် အချိန်တိုင်း အမေးခံနေရပါတယ်။ ကျွန်တော့်ကို မမေးပါနဲ့။ သူတို့ကိုပဲ မေးပါ။ အသင်းက ပြီးခဲ့တဲ့(၂)ရာသီ ချန်ပီယံဖြစ်ခဲ့တဲ့ လမ်းကြောင်းအတိုင်းသွားနေပြီး ဒီအတွက် ဂုဏ်ယူမိပါတယ်။ ပက်(သူ့)လိုလူက စောဒကတက်နေရတာ သက်သောင့်သက်သာမရှိပါဘူး။ လီဗာပူးလ်အသင်းကိုတော့ ဂုဏ်ယူဝမ်းမြောက်ကြောင်း ပြောလိုပါတယ်။ ဒါဟာ ပယ်နယ်တီလား၊ ပယ်နယ်တီမဟုတ်ဘူးလားဆိုတာ ကျွန်တော် အားလုံးမသိပါဘူး။ အနာဂတ်မှာ ဘာတွေဖြစ်လာမလဲဆိုတာကိုလည်း ဘယ်သူမှ မသိပါဘူး။ ဒိုင်လူကြီးအကြီးအကဲတွေကိုပဲ မေးပါ။ မနက်ဖြန်မှာ ကျွန်တော် UEFA အစည်းအဝေးပွဲတက်ရောက်ဖို့ရှိပြီး ဒီအကြောင်း ဆွေးနွေးဖို့ရှိပါတယ်။ ကျွန်တော် ဘာပြောနိုင်မှာလဲ။ ဒီအရာက အသင်းအတွက်တော့ ကောင်းတဲ့အရာမဟုတ်ပါဘူး။ ကျွန်တော်တို့အသင်းဟာ လွန်ခဲ့တဲ့ ၁၀ နှစ်လောက်ကမှ ထိပ်တန်းအဆင့်ကို ရောက်လာတာပါ။ လီဗာပူးလ်လို မဟုတ်ပါဘူး။ လီဗာပူးလ်ကတော့ ဒီအဆင့်မှာ နှစ် ၃၀၊ ၄၀၊ ၅၀ ဒါမှမဟုတ် နှစ် ၆၀ လောက်ရှိနေပါပြီ။ ကျွန်တော်တို့က အသစ်ပါ။ အဖွဲ့အစည်းက ကျွန်တော်တို့အသင်းကို ကူညီသင့်သလို၊ ဒီအတွေ့အကြုံတွေကလည်း အကူအညီပေးပါလိမ့်မယ်။ ဘောလုံးပွဲတွေက ဘဝရဲ့အစိတ်အပိုင်းတစ်ခုပါ။ တစ်ခါတစ်ရံမှာ ကျွန်တော်တို့အတွက်ဖြစ်ပြီး တစ်ခါတစ်ရံမှာတော့ ဆန့်ကျင်ဘက်ဖြစ်နေပါတယ်။ ဒိုင်လူကြီးနဲ့ ဒီဆုံးဖြတ်ချက်တွေနဲ့ပတ်သက်ပြီး တာဝန်ရှိသူတွေကိုမေးပါ။ သူတို့က ကျွန်တော်တို့ထက် ပိုသိပါတယ်'' ဟု ဂွါဒီယိုလာက ပွဲအပြီးတွင် ပြောကြားခဲ့သည်။
ဂွါဒီယိုလာသည် ယင်းပွဲအပြီးတွင် ဒိုင်လူကြီး အိုလီဗာထံ သွားရောက်စကားပြောခဲ့ပြီး ၎င်းတို့နှစ်ဦးအကြား ပြောဆိုမှုများကိုမူ ဖြေကြားရန် ငြင်းဆန်ခဲ့သည်။
ထို့ပြင် ဂွါဒီယိုလာက လီဗာပူးလ်နှင့်ပွဲမှ အသင်း၏ကစားဟန်နှင့် ကစားသမား၏စွမ်းဆောင်ရည်ကိုလည်း ချီးကျူးမှုများ ပြုလုပ်ခဲ့ကြောင်း သိရသည်။
-
မြောက်ဦးမြို့နယ်တွင် တပ်မတော်နှင့် AA အဖွဲ့ အချိန်ကြာမြင့်စွာ တိုက်ပွဲဖြစ်ပွားရာ၌ တပ်မတော်ဘက်က စစ်သည်အချို့ ကျဆုံးပြီး AA ဘက်မှ အလောင်းအချို့နှင့် သေနတ်ခြောက်လက် သိမ်းဆည်းရမိခဲ့ကြောင်း တပ်မတော်ပြောကြား
-
မြောက်ဦးမြို့နယ် လက္ကာကျေးရွာအနီးတွင်ဖြစ်ပွားခဲ့သော တပ်မတော်နှင့် AA အဖွဲ့တိုက်ပွဲအတွင်းAA အလောင်းကိုးလောင်းရရှိခဲ့ပြီး တပ်မတော်က နယ်မြေလုံခြုံရေးဆောင်ရွက်နေကြောင်း သတင်းထုတ်ပြန်
-
မြန်မာနိုင်ငံတွင် ပြည့်စုံသော ဒီမိုကရေစီကို အသွင်ပြောင်းရန်အတွက် ဖွဲ့စည်းပုံအခြေခံဥပဒေ ပြင်ဆင်ရမည် ဖြစ်သော်လည်း လာမည့်နှစ် ရွေးကောက်ပွဲမတိုင်မီ ဖြစ်နိုင်ခြေ မရှိကြောင်း ဒေါ်အောင်ဆန်းစုကြည် ပြောကြား
-
အဲဗာတန်အားရှုံးနိမ့်ခြင်းမှာ ပျင်းရိခြင်းကြောင့်ဟု ဝေဖန်ခဲ့သော မော်ရင်ဟိုကို စပါးကစားသမားများ မကျေမနပ်ဖြစ်နေပြီး စုပေါင်းပုန်ကန်ဖွယ်ရှိ
-
ကိုရိုနာဗိုင်းရပ်စ်ကြောင့် ပရီးမီးယားလိဂ်အသင်းများ ရုပ်သံဝင်ငွေ(၁၀.၇%)စီ ပြန်ပေးရမည်ဖြစ်ပြီး လီဗာပူးလ် အနစ်နာဆုံးဖြစ်
