Top News

၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းအရ မြန်မာနိုင်ငံ၏ လူဦးရေသည် ၅၁ ဒသမ ၃ သန်းကျော်သာရှိပြီး လွန်ခဲ့သည့် (၁၀)နှစ်က လူဦးရေထက် အနည်းငယ်လျော့ကျသွားကြောင်း သိရသည်။

၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်း၏ ရှေ့ပြေးလူဦးရေစာရင်း ထုတ်ပြန်ခြင်း အခမ်းအနားအား ဒီဇင်ဘာ ၃၁ ရက်က နေပြည်တော်ရှိ အပြည်ပြည်ဆိုင်ရာကွန်ဗင်းရှင်းဗဟိုဌာန- ၂ ၌ ကျင်းပခဲ့ပြီး အခမ်းအနားတွင် ဗဟိုသန်းခေါင်စာရင်းကော်မရှင် ဥက္ကဋ္ဌ၊ လူဝင်လူမှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးမြင့်ကြိုင်က ရှေ့ပြေးလူဦးရေစာရင်းအား ထုတ်ပြန်ကြေညာခဲ့သည်။

“မြန်မာနိုင်ငံရဲ့ လူဦးရေပြောင်းလဲလာမှုကို ကြည့်မယ်ဆိုရင် ၁၈၉၁ ခုနှစ် သန်းခေါင်စာရင်းအရ (၇ ဒသမ ၇) သန်းသာရှိခဲ့ပြီး တဖြည်းဖြည်း တိုးပွားလာတာကို တွေ့ရပါတယ်။ ၁၉၀၁ ခုနှစ်တွင် (၁၀ ဒသမ ၅) သန်း၊ ၁၉၂၁ ခုနှစ်တွင် (၁၃ ဒသမ ၂)သန်း၊ ၁၉၇၃ ခုနှစ်တွင် (၂၈ ဒသမ ၉) သန်း၊ ၁၉၈၃ ခုနှစ်တွင် (၃၅ ဒသမ ၃) သန်းအထိ တိုးမြင့်လာပြီး ၂၀၁၄ ခုနှစ်တွင် (၅၁ ဒသမ ၅) သန်းဖြစ်လာခဲ့ပါတယ်။ ၂၀၂၄ ခုနှစ်တွင်မူ စာရင်းမကောက်ယူနိုင်တဲ့ ဒေသတွေအတွက် လူဦးရေပညာအရ စိစစ်ရရှိတဲ့ လူဦးရေအပါအဝင် မြန်မာနိုင်ငံရဲ့လူဦးရေက (၅၁ ဒသမ ၃) သန်း ဖြစ်တာမို့ လွန်ခဲ့တဲ့ ၁၀ နှစ်က လူဦးရေထက် အနည်းငယ် လျော့ကျသွားတာကိုတွေ့ရမှာဖြစ်ပါတယ်” ဗဟိုသန်းခေါင်စာရင်းကော်မရှင် ဥက္ကဋ္ဌ၊ လူဝင်လူမှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးမြင့်ကြိုင်က ပြောကြားသည်။

လူဦးရေပြောင်းလဲခြင်းကို ဖြစ်ပေါ်ရန်အတွက် မွေးဖွားခြင်း၊ သေဆုံးခြင်းနှင့် ရွှေ့ပြောင်းခြင်း ဆိုသည့် အကြောင်းရင်း သုံးရပ်ရှိခြင်းကြောင့် လူဦးရေလျော့ကျလာခြင်း၏ အဓိကအကြောင်းရင်းကို ပင်မအစီရင်ခံစာထုတ်ပြန်ချိန်တွင် လေ့လာ ဖော်ထုတ်သွားမည်ဖြစ်ကြောင်း ပြည်ထောင်စုဝန်ကြီးက ပြောကြားသည်။

ပြည်ထောင်စုဝန်ကြီးက “လူဦးရေအရွယ်အစား ပြောင်းလဲလာခြင်းဟာ စီးပွားရေးကဏ္ဍ အပါအဝင် ပညာရေး၊ ကျန်းမာရေး၊ အလုပ်အကိုင်ဖန်တီးပေးရေးနှင့် အိမ်ရာကဏ္ဍတွေအတွက် မူဝါဒများ ချမှတ်ရာမှာ အလွန်အရေးပါတာကို တွေ့ရပါတယ်။ ၂၀၂၄ ခုနှစ် သန်းခေါင်စာရင်းအချက်အလက်များအရ လူဦးရေ သိပ်သည်းမှုကို လေ့လာကြည့်မယ်ဆိုရင် မြန်မာနိုင်ငံရဲ့ လူဦးရေ သိပ်သည်းမှုဟာ တစ်စတုရန်းကီလိုမီတာမှာ ၇၆ ဦး ရှိတာကို တွေ့ရှိရပါတယ်” ဟု ပြောကြားသည်။

၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်း၏ ရှေ့ပြေးလူဦးရေစာရင်းအရ လူဦးရေအထူထပ်ဆုံးဒေသများဖြစ်သည့်  ရန်ကုန်တိုင်းဒေသကြီး၌ တစ်စတုရန်း ကီလိုမီတာတွင် ၇၁၇ ဦး နေထိုင်ကြပြီး မန္တလေးတိုင်းဒေသကြီး၌ ၂၀၃ ဦးနှင့် နေပြည်တော်ကောင်စီနယ်မြေ၌ ၁၆၀ ဦးဖြစ်ကြောင်းနှင့် လူဦးရေ အကျဲပါးဆုံး ဒေသများဖြစ်သည့် ချင်းပြည်နယ်၏ တစ်စတုရန်း ကီလိုမီတာတွင် ၁၀ ဦး၊ ကချင်ပြည်နယ်နှင့် ကယားပြည်နယ်တို့၌ ၂၅ ဦးစီနှင့် တနင်္သာရီ တိုင်းဒေသကြီး၌ ၃၂ ဦး နေထိုင်ကြသည်ကို တွေ့ရကြောင်း ပြည်ထောင်စုဝန်ကြီးက ပြောကြားသည်။

ပြည်ထောင်စုဝန်ကြီးက “၂၀၂၄ ခုနှစ် သန်းခေါင်စာရင်းအရ ကောက်ယူရရှိခဲ့တဲ့ အိမ်ထောင်စုအရေအတွက်မှာ (၇၇၇၂၀၇၆) စု ဖြစ်ပါတယ်။ ၂၀၂၄ ခုနှစ် သန်းခေါင်စာရင်းအရ မြန်မာနိုင်ငံရဲ့ ပျမ်းမျှအိမ်ထောင်စု အရွယ်အစားမှာ (၃ ဒသမ ၈) ဦး ဖြစ်ပါတယ်။ အိမ်ထောင်စုအရွယ်အစား အကြီးဆုံး တိုင်းဒေသကြီး/ပြည်နယ်တွေကတော့ ကချင်ပြည်နယ်၊ စစ်ကိုင်းတိုင်းဒေသကြီးနဲ့ တနင်္သာရီတိုင်းဒေသကြီးတို့ပဲဖြစ်ပါတယ်။ ပျမ်းမျှအိမ်ထောင်စုအရွယ်အစား အသေးဆုံးကတော့ ချင်းပြည်နယ်၊ ကယားပြည်နယ်နဲ့ မကွေးတိုင်းဒေသကြီးတို့ပဲ ဖြစ်ပါတယ်။ ပျမ်းမျှ အိမ်ထောင်စုအရွယ်အစားက မြို့ပြနဲ့ ကျေးလက်ကြားမှာ သိသာစွာ ကွာဟမှု မရှိကြောင်းတွေ့ရပါတယ်” ဟု ပြောကြားသည်။

၂၀၂၄ သန်းခေါင်စာရင်း၌ အိမ်ထောင်စုမေးခွန်းပုံစံနှင့် အဖွဲ့ အစည်းမေးခွန်းပုံစံ ဆိုသည့် မေးခွန်းပုံစံ နှစ်မျိုးနှင့်ကောက်ယူခဲ့ကြောင်း၊  အိမ်ထောင်စုမေးခွန်းပုံစံ၌ မေးခွန်းပေါင်း (၆၈) ခု ပါဝင်ပြီး အဖွဲ့ အစည်းမေးခွန်းပုံစံ၌ မေးခွန်းပေါင်း (၁၈) ခုပါဝင်ကြောင်း၊ ယခုကောက်ယူခဲ့သည့် သန်းခေါင်စာရင်းမှ လူဦးရေဆိုင်ရာ အချက်အလက်များ၊ ပြည်တွင်း/ပြည်ပ ရွှေ့ပြောင်းသွားလာခြင်း၊ ပညာရေး၊ လုပ်သားအင်အား၊ မွေးဖွားခြင်း၊ မသန်စွမ်းမှု၊ အိမ်အကြောင်းအရာ၊ သေဆုံးခြင်းနှင့် ကိုယ်ဝန်ဆောင်မိခင်သေဆုံးခြင်း စသည့် အချက်အလက်များကို ရရှိမည်ဖြစ်သည့်အတွက် နိုင်ငံတော်အတွက် လိုအပ်မည့် အညွှန်းကိန်းများစွာကို ဖော်ထုတ်ပံ့ပိုးပေးနိုင်မည် ဖြစ်ကြောင်း သိရသည်။

၂၀၂၄ ခုနှစ်၊ သန်းခေါင်စာရင်း အချက်အလက်များဟာ ၂၀၁၉ မှ ၂၀၂၄ အထိ ကြားကာလအတွင်း ဖြစ်ပေါ်ခဲ့တဲ့ အခြေအနေများကို ဖော်ထုတ်ပြသနိုင်မည့် စာရင်းအင်းအချက်အလက်များ ဖြစ်လာမည် ဖြစ်ကြောင်း သိရသည်။

ထို့အပြင် နိုင်ငံတော်အတွက် လိုအပ်သည့် ကဏ္ဍများ၌ အလျင်အမြန်အသုံးပြုနိုင်ရန် ရည်ရွယ်ပြီး ၂၀၂၄ ခုနှစ် သန်းခေါင်စာရင်း ရှေ့ပြေးရလဒ်များကို  ထုတ်ပြန်ပေးခြင်းဖြစ်ကြောင်း၊ ယခုထုတ်ပြန်သည့် အစီရင်ခံစာ၌ လူဦးရေ တစ်မျိုးတည်းကိုသာ မြို့နယ်အလိုက်၊ မြို့ပြ/ကျေးလက်အလိုက် ထုတ်ပြန်ပေးခြင်းဖြစ်ပြီး  အသေးစိတ်ဆန်းစစ်လေ့လာမှုများ၊ စာရင်းအင်းများပါဝင်သည့် ပင်မအစီရင်ခံစာကို ၂၀၂၅ ခုနှစ်အတွင်း ထုတ်ပြန်ပေးသွားမည်ဖြစ်ကြောင်း သိရသည်။