Top News

အမေရိကန်ပြည်ထောင်စု ၊ လော့စ်အိန်ဂျလိစ်တွင် ၂၀၂၅ ခုနှစ် ၊ ဇန်နဝါရီ ၅ ရက် ညပိုင်းက ကျင်းပခဲ့သည့်  ရွှေကမ္ဘာလုံး ဆုပေးပွဲတွင် အဓိကဆုကြီးဖြစ်သည့် အကောင်းဆုံး ဒရာမာဇာတ်ကားဆုကို The Brutalist က ဆွတ်ခူးသွားပြီး ယင်းဇာတ်ကားထဲမှ အက်ဒရီယန် ဘရော့ဒီက အကောင်းဆုံးဒရာမာ ဇာတ်ဆောင်မင်းသားဆု ၊ရိုက်ကူးသူ ဘရက်ဒီ ကောဘတ်က အကောင်းဆုံးဒါရိုက်တာဆုတို့ ရယူသွားသည်။

ဆလီနာဂိုးမတ်ဇ် ပါဝင်ပြီး ဆန်ခါတင် စာရင်းထွက်လာစဉ်က ဆု ၁၀ ဆုဖြင့် ဦးဆောင်ခဲ့သည့် မှုခင်းဇာတ်မြူး ရုပ်ရှင်Emilia Perez က တစ်ကယ့်ရလာဒ်တွင် ဆုလေးဆုဖြင့်သာ ကျေနပ်လိုက်ရပြီး အကောင်းဆုံး ဇာတ်မြူး ဇာတ်ကားဆု ၊ အကောင်းဆုံး နိုင်ငံခြားဇာတ်ကားဆု ၊ ဇိုဝီဆယ်လ်ဒါးနားက ဇာတ်ပို့မင်းသမီးဆု ၊ မူရင်းသီချင်း ဆုတို့ ဆွတ်ခူးခဲ့သည်။

အကောင်းဆုံး အန်နီမေးရှင်း ဇာတ်ကားဆုကို  Flow က ရသွားပြီး အအောင်မြင်ဆုံး ရုံတင်ဇာတ်ကားဆုကို အဆိုတော် အာရီယန်နာ ဂရန်ဒီပါသည့် Wicked က ရသွားသည်။

ဒရာမာဇာတ်ဆောင် မင်းသမီးဆုကို  I’m Still Here ဇာတ်ကားမှ ဖာနန်ဒါ ထောရက်စ်ကရပြီး ဇာတ်မြုးဇာတ်ဆောင် မင်းသမီးဆုကို The Substance ဇာတ်ကားမှ ဒမ်မီမောက ရသွားသည်။ အကောင်းဆုံး ဇာတ်ညွှန်းဆုကို Conclave ဇာတ်ကားက ရသည်။

အကောင်းဆုံး ဒရာမာရုပ်သံ ဇာတ်လမ်းတွဲ ဆုအတွက် ဂျပန်ရာဇဝင် ဇာတ်လမ်းတွဲ Shogun ကို ရွေးချယ်လိုက်ပြီး Shogun က စုစုပေါင်းဆုလေးဆု ရလိုက်သည်။ ဇာတ်မြူး ဇာတ်လမ်းတွဲဆုကို  Hacks ကရသည်။

Squid Game Season 2 သည် မထုတ်လွှင့်မီကတည်းက ရွှေကမ္ဘာလုံး ဆုပေးပွဲ ဆန်ခါတင် စာရင်းတွင် အကောင်းဆုံး ဒရာမာရုပ်သံ ဇာတ်လမ်းတွဲ ဆုလျာထားခံရသော်လည်း ဆုနှင့်လွဲခဲ့သဖြင့် ဆုပေးပွဲ တက်ရောက်လာသည့် မင်းသားလီဂျောင်ဂျေးနှင့် ဒါရိုက်တာတို့ လက်ဗလာဖြင့် ပြန်သွားရသည်။ ၂၀၂၁ ရွှေ ကမ္ဘာလုံး ဆုပေးပွဲတွင် Squid Game Season 1 မှ ၀ါရင့်မင်းသားကြီး အိုယုံဆူက ဇာတ်ပို့မင်းသားဆု ရယူပေးထားသည်။

ရွှေကမ္ဘာလုံး ဆုပေးပွဲသည် ဆုပေးပွဲ ရာသီ၏ ပထမဆုံး ဆုပေးပွဲကြီးဖြစ်ပြီး အော်စကာ ဆုပေးပွဲ၏ ဆုရှင်များ ကို ကြိုတင်ခန့်မှန်းနိုင်သည့် ဆုပေးပွဲအဖြစ် သတ်မှတ်ကြသည်။