Top News

အိန္ဒိယတွင် ကိုရိုနာဗိုင်းရပ်စ် ကူးစက်ခံရသူအရေအတွက် ၉၀,၀၀၀ ကျော် ရှိလာသည့်အပြင် ရဲများနှင့် သောင်တင်နေသည့် ရွှေ့ပြောင်းလုပ်သားများအကြား ပဋိပက္ခ ထပ်မံဖြစ်ပွားခဲ့ပြီးနောက် နိုင်ငံတစ်ဝန်း Lockdown ချထားမှုများကို မေ ၃၁ ရက်အထိ သက်တမ်းတိုးကြောင်း မေ ၁၇ ရက်တွင် ထုတ်ပြန်ခဲ့သည်။

ဗိုင်းရပ်စ် ကူးစက်မှုအရေအတွက် နည်းပါးသည့် ဒေသများတွင် စည်းမျည်းအချို့ကို ဖြေလျှော့ပေးသွားမည် ဖြစ်သော်လည်း စာသင်ကျောင်းများ၊ စျေးဝယ်စင်တာများနှင့် အခြားအများပြည်သူဆိုင်ရာ နေရာများကို အများအားဖြင့် ဆက်လက် ပိတ်ထားမည် ဖြစ်ကြောင်း ပြည်ထဲရေးဝန်ကြီးဌာနမှ ထုတ်ပြန်သည့် အမိန့်အရ သိရသည်။

လမ်းညွှန်ချက်အသစ်များတွင် Lockdown ချထားမှု ကန့်သတ်ချက်များနှင့် ပတ်သက်ပြီး အတော်သင့်များသော ဖြေလျှော့ပေးမှုများကို ခွင့်ပြု‌ထားကြောင်း ပြည်ထဲရေးဝန်ကြီးဌာနက ထုတ်ပြန်ခဲ့သည်။

လူအများအပြား စုဝေးမှုများကို ပိတ်ပင်ထားဆဲ ဖြစ်သော်လည်း ဗိုင်းရပ်စ်ကူးစက်မှု မြင့်မားမှုကြောင့် ကန့်သတ် ထိန်းချုပ်ထားသည့်ဇုန်များ ပြင်ပတွင် အခြားလှုပ်ရှားသွားလာမှုများကို ခွင့်ပြုပေးမည် ဖြစ်ကြောင်း၊ ကုန်သွယ်ရေးနှင့် စက်မှုလုပ်ငန်ကို နိုင်ငံအတွင်းရှိ နေရာအများအပြားတွင် ပြန်လည် ဖွင့်လှစ်ရန် ခွင့်ပြုပေးမည် ဖြစ်ကြောင်း ယင်းအမိန့်တွင် ဖော်ပြထားသည်။

ကန့်သတ် ထိန်းချုပ်ထားသည့် ဇုန်များတွင် ချမှတ်မည့် ဆုံးဖြတ်ချက်များကို ခရိုင်အာဏာပိုင်များက ဆုံးဖြတ်ပေးလိမ့်မည်ဟု ပြည်ထဲရေးဝန်ကြီးဌာန၏ အမိန့်တွင် ဖော်ပြထားသည်။

အိန္ဒိယတွင် ဗိုင်းရပ်စ်ကူးစက်ခံရသည့် အရေအတွက်သည် ပြီးခဲ့သည့်နှစ် နှောင်းပိုင်းတွင် ဗိုင်းရပ်စ် စတင်ပျံ့နှံ့ခဲ့သည့် တရုတ်နိုင်ငံထက် ပိုမိုများပြားလာပြီ ဖြစ်သည်။ ဗိုင်းရပ်စ်ကြောင့် သေဆုံးသူ အရေအတွက်သည် ၃,၀၂၉ ဦးရှိသော်လည်း တရုတ်နိုင်ငံတွင် သေဆုံးခဲ့သည့် အရေအတွက် ၄,၆၀၀ ထက် လျော့နည်းခဲ့သည်။ အမေရိကန်နှင့် ဥရောပနိုင်ငံအချို့တွင် ဗိုင်းရပ်စ်ကြောင့် သေဆုံးမှု အရေအတွက်သည် ပိုမိုမြင့်မားနေသည်။

မတ် ၂၅ ရက်တွင် စတင်မိတ်ဆက်ခဲ့ပြီး အကြိမ်များစွာ သက်တမ်းတိုးခဲ့သည့် အိန္ဒိယ၏ Lockdown စီမံချက်သည် မေ ၁၇ ရက် သန်းခေါင်တွင် သက်တမ်းကုန်ဆုံးခဲ့သည်။

ထိန်းချုပ်ကန့်သတ်မှုများသည် အသက်ရှင်သန်ရန်အတွက် နေ့စဉ် လုပ်အားခအပေါ် အမှီပြုနေရသည့် သန်းနှင့်ချီသော အိန္ဒိယနိုင်ငံသားများအတွက် အကျပ်အတည်းတစ်ခု ဖြစ်ပေါ်စေခဲ့သည်။

အလုပ်အကိုင်မရှိမှုနှင့်အတူ  အနည်းငယ်သာရှိသည့် အများပြည်သူ သယ်ယူပို့ဆောင်ရေးကြောင့် မြို့ပြရောက် ရွှေ့ပြောင်းလုပ်သားများသည် မွေးရပ်မြေကျေးရွာများသို့ပြန်ရန် ကြိုးပမ်းခဲ့ပြီး အလွန်ပင်ပန်း ခက်ခဲသော ခရီးလမ်းကို ခြေလျင်သွားရောက်ခြင်း (သို့မဟုတ်) ကုန်တင်ကားများနောက်တွင် ကားကြုံလိုက်စီးခြင်းများ လုပ်ဆောင်ခဲ့ရသည်။

ရွှေ့ပြောင်းလုပ်သားများကို နေရပ်သို့ ပြန်လည် ပို့ဆောင်ပေးမည့်ဟုဆိုသော အထူးရထားနှစ်စီး ခရီးစဉ်ကို ဖျက်သိမ်းခဲ့သောကြောင့် မေ ၁၇ ရက်တွင် အနောက်ဘက် ဂူဂျရတ်ပြည်နယ်ရှိ Rajkot ‌ဒေသတွင် ရွှေ့ပြောင်းလုပ်သား ၁,၅၀၀ ကျော်သည် လမ်းများကို ပိတ်ဆို့ခြင်း၊ ယာဉ်တစ်ဒါဇင်ကျော်ကို ဖျက်ဆီးခြင်းများ ပြုလုပ်ခဲ့သည့်အပြင် ရဲများကို ကျောက်ခဲများဖြင့် ပစ်ပေါက်ခဲ့သည်။

ရွှေ့ပြောင်းလုပ်သားများကို လူစုခွဲရန်အတွက် ရဲများက တုတ်ဖြင့် ရိုက်ခဲ့ရကြောင်း၊ ယင်းသို့ လူစုခွဲရာတွင် ရဲဝန်ထမ်းအများအပြား ထိခိုက်ဒဏ်ရာရရှိခဲ့ကြောင်း Shapar အရပ်ရှိ ရဲအရာရှိတစ်ဦးက ရိုက်စ်တာသို့ ပြောကြားခဲ့သည်။

“အလုပ်သမားတွေက အကြမ်းဖက်မှု ရည်ရွယ်ချက်နဲ့ စုဝေးခဲ့တာ မဟုတ်ပါဘူး။ ရထားနှစ်စီး ဒါမှမဟုတ် သုံးစီးကို အချိန်ရွှေ့ဆိုင်းဖို့ စီစဉ်ခဲ့တာကို ရထားခရီးစဉ်တွေ ဖျက်သိမ်းလိုက်ပြီဆိုပြီး သူတို့က နားလည်မှုလွဲခဲ့ပြီး မတတ်သာတဲ့အဆုံး အကြမ်းဖက်မှု လုပ်လိုက်တာမျိုးပါ”ဟု Rajkot ဒေသ၏ ရဲမှူးကြီး ဘယ်ရမ်မီနာက ပြည်တွင်းမီဒီယာများကို ပြောကြာခဲ့သည်။

အကြမ်းဖက်မှုတွင် ပါဝင်သည့်သူများကို ဖော်ထုတ်ခဲ့ကြောင်း ၎င်းကပြောကြားခဲ့သည်။

မေ ၁၆ ရက်တွင် အိန္ဒိယမြောက်ပိုင်း၌ ကုန်တင်ကားတစ်စီး တိုက်မှုကြောင့် နေအိမ်ပြန်ရန် ကြိုးစားသည့် ရွှေ့ပြောင်းလုပ်သား ၂၃ ဦးထက်မနည်း သေဆုံးခဲ့သည်။ မေ ၈ ရက်တွင် ရထားကြိတ်ခံရမှုကြောင့် ရွှေ့ပြောင်းအလုပ်သမား ၁၆ ဦး သေဆုံးခဲ့သည်။ ကိုရိုနာဗိုင်းရပ်စ် ထိန်းချုပ်ရန် Lockdown ချထားမှုတွင် အလုပ်အကိုင် ဆုံးရှုံးခဲ့ရသည့် ယင်းရွှေ့ပြောင်း အလုပ်သမားများသည် မွေးရပ်မြေသို့ လမ်းလျှောက်ပြန်စဉ် ရထားလမ်းပေါ်တွင် အိပ်ပျော်နေသဖြင့် ရထားကြိတ်ခံခဲ့ရခြင်း ဖြစ်သည်ဟု ရဲတပ်ဖွဲ့က ထုတ်ပြန်ခဲ့သည်။