Top News

ကိုရိုနာဗိုင်းရပ်စ် ကပ်ဘေးကြောင့် ဥရောပ သမဂ္ဂ၏ စီးပွားရေး ပြန်လည်ထူထောင်နိုင်ရေးအတွက် ထောက်ပ့ံပေးရန် ယူရိုဘီလျံ ၅၀၀ (ဒေါ်လာ ၅၄၅ ဘီလျံ) တန်ဖိုးရှိ ကယ်ဆယ်ရေး အစီအစဉ်ကို ပြင်သစ်နှင့် ဂျာမနီတို့က မေ ၁၈ တွင် အဆိုပြုခဲ့ကြသည်။

သဘောထား ကွဲလွဲမှုများအား ဘေးဖယ်ထားလျက် ပြင်သစ်နှင့် ဂျာမနီတို့က ဥရောပ၏ ဗဟိုချက်အဖြစ် မပျက်မယွင်း ရှိနေဆဲဖြစ်ကြောင်း သက်သေပြရန် ပြင်သစ်သမ္မတ အီမန်နျူရယ်မက်ခရွန်နှင့် ဂျာမနီဝန်ကြီးချုပ် အင်ဂျလာမာကယ်တို့က ဗီဒီယိုကွန်ဖရင့်ဖြင့် အစည်းအဝေး ပြုလုပ်ပြီးနောက် မကြုံစဖူး ကယ်ဆယ်ရေး အစီအစဉ်ကို ကြေညာခဲ့ခြင်း ဖြစ်သည်။

ပြင်သစ်-ဂျာမနီတို့၏ အဆိုပြုချက်များသည် ရည်မှန်းချက်ကြီးမားပြီး သတ်သတ် မှတ်မှတ်ရှိကာ ကြိုဆိုကြောင်း ဥရောပဗဟိုဘဏ်ဥက္ကဋ္ဌ ခရစ္စတင်းလာဂါဒီက ဥရောပ၏ အဓိက သတင်းစာများကို ပြောကြားခဲ့သည်။

ဥရောပစီးပွားရေးသည် ဒုတိယကမ္ဘာစစ်နောက်ပိုင်း အကြီးမားဆုံး စိန်ခေါ်မှု ရင်ဆိုင်နေရစဉ် ဥရောပသမဂ္ဂက ဗိုင်းရပ်စ်ကူးစက် ပျံ့နှံ့မှုအား ကနဦး တုံ့ပြန်မှုများသည် လုံလောက်မှု မရှိခဲ့ကြောင်းနှင့် ကျန်းမာရေးကဏ္ဍတွင် ပိုမိုနီးကပ်စွာ ပူးပေါင်းဆောင်ရွက်ရန် လိုအပ်ကြောင်း မက်ခရွန်က လက်ခံခဲ့သည်။

ဥရောပသမဂ္ဂ၏ အမည်အောက်ရှိ စျေးကွက်မှ ချေးယူခြင်းဖြင့် ထောက်ပံ့ပေး မည့် ယူရိုဘီလျံ ၅၀၀ သည် အဖွဲ့ဝင် ၂၇ နိုင်ငံ ရှိ အဆိုးရွားဆုံး အထိနာခဲ့သော ကဏ္ဍများ နှင့် ဒေသများအား စီးဝင်စေမည်ဖြစ်ကြောင်း ပြင်သစ်နှင့် ဂျာမနီတို့၏ ပူးတွဲကြေညာချက်တွင် ဖော်ပြခဲ့သည်။

ယင်းသည် မျှတမှုရှိရုံသာမက ယခုအခါ ထိုရန်ပုံငွေရရှိရန်အတွက် လုပ်ဆောင်ရန်လည်း လိုအပ်နေကြောင်း၊ ယင်းနောက် မိမိတို့သည် အနာဂတ် ဥရောပဘတ်ဂျက် အများအပြားမှတစ်ဆင့် တဖြည်းဖြည်းချင်း ပြန်ပေး၍ရမည် ဖြစ်ကြောင်း မာကယ်က ပြောကြားခဲ့သည်။

ထိုအစီအစဉ်၏ ရည်မှန်းချက်သည် ဥရောပအား ပိုမိုစည်းလုံး ညီညွတ်စွာဖြင့် အကျပ်အတည်းမှ လွတ်မြောက်စေရန် ဖြစ်ကြောင်း မာကယ်က ပြောကြားခဲ့ပြီး ထိုအဆိုပြုချက်သည် သတ္တိရှိမှုဖြစ်ကြောင်း ပြောကြားခဲ့သည်။

ထိုထောက်ပံ့မှုမှ အကျိုးကျေးဇူး ခံစားရမည့် နိုင်ငံများသည် ထိုငွေများအား ပြန်ပေးရန် လိုအပ်မည် မဟုတ်ကြောင်း မက်ခရွန်က ပြောကြားခဲ့ပြီး ထိုငွေများသည် ချေးငွေများ မဟုတ်ကြောင်း အလေးပေး ပြောကြားခဲ့သည်။

ထိုအဆိုပြုချက် အစီအစဉ်အား ဥရောပသမဂ္ဂ၏ အခြားနိုင်ငံများက သဘောတူလျှင် ယင်းရန်ပုံငွေသည် အဖွဲ့၏ ဘဏ္ဍာရေးဆိုင်ရာ ရှေ့မတိုးသာ နောက်မဆုတ်သာ အခြေအနေကို ချိုးဖျက်ဖွယ်ရှိသည်။

ဂျာမနီကဲ့သို့ မြောက်ပိုင်းအဖွဲ့ဝင် နိုင်ငံများကမူ ဘတ်ဂျက်နည်းလမ်းအရ ဘုံကြွေးမြီ အစီအစဉ်ကို ယခုအချိန်အထိ ပြင်းပြင်းထန်ထန် ပယ်ချထားဆဲဖြစ်သည်။

သို့သော် ထိုအစီအစဉ်အား ချက်ချင်းကန့်ကွက်မှု ဖြစ်ပေါ်ခဲ့ပြီး သြစတြီးယားဝန်ကြီးချုပ် ဆီဘက်ရှန်ကားဇ်က မည်သည့် အကူအညီမဆို ချေးငွေပုံစံ ဖြစ်ရမည်ဖြစ်ပြီး ထောက်ပံ့မှုပုံစံဖြစ်၍ မရကြောင်း အခိုင်အမာ ပြောကြားခဲ့သည်။

ယူရိုဇုန်စီးပွားရေး တစ်ခုလုံးသည် ယခု နှစ်တွင် ၇.၇ ရာခိုင်နှုန်း ကျုံ့သွားမည်ဟု ခန့်မှန်းထားပြီး အီတလီနှင့် ဂရိတို့ကဲ့သို့ တောင်ပိုင်းအဖွဲ့ဝင်နိုင်ငံများတွင် အဆိုးရွားဆုံး ထိခိုက်မည်ဟု မျှော်လင့်ရသည်။

ဗိုင်းရပ်စ်ကူးစက်သူ အရေအတွက် ကျဆင်းလာနေစဉ် ဥရောပသည် Lockdown စီမံချက်များအား ရုပ်သိမ်းပေးနိုင်ရန် အရှိန်မြှင့် ကြိုးပမ်းနေကြသည်။

အီတလီတွင် မတ်အစောပိုင်းနောက်ပိုင်း ပထမဆုံးအကြိမ်အဖြစ် ဗိုင်းရပ်စ်ကြောင့် နေ့စဉ်သေဆုံးသူ အရေအတွက်သည် ၁၀၀ အောက်သို့ ကျဆင်းခဲ့စဉ် ဗာတီကန်ရှိ St Peter’s Basilica နှင့် အေသင်ရှိ Acropolis တို့ကို ပြန်လည်ဖွင့်လှစ်ခဲ့ကြပြီး ဥရောပ၏ဆိုင်များ၊ စားသောက်ဆိုင်များနှင့် ခရစ်ယာန် ဘုရားကျောင်း အများအပြားလည်း ပြန်ဖွင့်ခဲ့ကြသည်။

ဗင်းနစ်မြို့တွင် ဂွန်ဒိုလာလှေများကို ပြန်လည်ပြေးဆွဲနေပြီး လှေထိုးသမားများက လက်အိတ်များနှင့် နှာခေါင်းစည်းများ တပ်ထားကြသည်။ သို့သော် ထိုမြင်ကွင်းအား ဒေသခံများက ကြိုဆိုခဲ့ကြသည်။

ယင်းသည် သတင်းကောင်း ဖြစ်ကြောင်း၊ လူတိုင်းက ပုံမှန်အခြေအနေသို့ ဖြစ်နိုင်သမျှ မြန်မြန်ပြန်သွားရန် လိုလားနေသည့် သင်္ကေတ တစ်ခုဖြစ်ကြောင်း၊ သို့သော် ဗိုင်းရပ်စ်အား အပြီးတိုင် နှိမ်နင်းရန်အတွက် သတိဖြင့် နေထိုင်မှုများကို လျှော့ချ၍မရကြောင်း မြို့ကောင်စီဝင် တစ်ဦးဖြစ်သူ ဂျီယိုဗန်နီဂူစတိုက ပြောကြားခဲ့သည်။