Top News

ရီးယဲလ်မက်ဒရစ်အသင်း၏ နည်းပြဖြစ်သူ ဇီဒန်းက တတိယတန်းကလပ် အယ်လ်ကိုယာနိုအသင်းကို ရှုံးနိမ့်ကာ ဘုရင့်ဖလားပြိုင်ပွဲမှ ထွက်ခဲ့ရခြင်းအတွက် မိမိတွင် အပြည့်အဝတာဝန်ရှိသည်ဟုဆိုခဲ့ပြီး၊ ကစားသမားများကိုမူ ချီး ကျူးပြောဆိုမှုများ ပြုလုပ်ခဲ့သည်။

    

ဇီဒန်း၏အသင်းသည် ဘုရင့်ဖလားပြိုင်ပွဲမှ စောစော စီးစီးထွက်ခွာရသည်မှာ (၂)နှစ်ဆက်ဖြစ်ပြီး၊ ဘန်ရှူးစတား နည်းပြခဲ့စဉ်က တတိယတန်းကလပ်အသင်းတစ်သင်းကို ရှုံးနိမ့်ကာ ဘုရင့်ဖလားပြိုင်ပွဲမှ ထွက်ခဲ့ရပြီးနောက်ပိုင်း ယခုနှစ်တွင် တတိယတန်းကလပ်အသင်းတစ်သင်းကို ရှုံးနိမ့်ကာ ပထမဆုံးအကြိမ် ထွက်ခဲ့ရခြင်းလည်းဖြစ်သည်။ 

ဇီဒန်းက ယင်းရှုံးပွဲနှင့်ပတ်သက်ပြီး "ကျွန်တော်တို့အသင်း ရှုံးပြီးတိုင်းမှာ ကျွန်တော် အမြဲပြောခဲ့သလိုပဲ ဒီရှုံးပွဲအတွက် ကျွန်တော် အပြည့်အဝတာဝန်ယူပါတယ်။ ပြီးတော့ ကျွန်တော် တည်တည်ငြိမ်ငြိမ်ပါပဲ။ ကစားသမားတွေက ဒီပွဲကို အနိုင်ရချင်ခဲ့သလို၊ နိုင်ပွဲရဖို့အတွက်လည်း အစွမ်းကုန်ကြိုးစားခဲ့ကြပါတယ်။ ဒါပေမဲ့ တစ်ခါတစ်လေတော့ ဘောလုံးမှာ ခြားနားတဲ့အခြေအနေတွေ ဖြစ်လာတတ်ပါတယ်။ ကျွန် တော်တို့အသင်းသာ ဒုတိယဂိုး၊ တတိယဂိုးတွေ သွင်းနိုင်ခဲ့ရင် အခြေအနေက တစ်မျိုးဖြစ်သွားမှာပါ။ ဒါပေမဲ့ သူတို့အသင်းဂိုးသမားက အရမ်းကောင်းတဲ့ကာကွယ်မှု (၂)ကြိမ်၊ (၃)ကြိမ်လောက် လုပ်နိုင်ခဲ့ပြီးနောက် အခြေအနေကပြောင်း လဲသွားပါတယ်"ဟု ပြောကြားခဲ့သည်။

    

စပိန်နာမည်ကျော်ဂျာနယ်လစ်တစ်ဦးဖြစ်သူ ဟိုဆေးလူးဝစ်ဆန်းချက်ဇ်ကမူ ဇီဒန်းသည် သူ၏ ရာထူးအတွက် ဖိအားများနေသည်ဟု မီဒီယာများက ဖော်ပြနေသော်လည်း ရီးယဲလ်မက်ဒရစ်အသင်းသည် ရာသီမကုန်မချင်း ရာထူးမှ ထုတ်ပယ်မည်မဟုတ်ဟု ဆိုခဲ့သည်။ 

ထို့ပြင် ဇီဒန်းကလည်း လက်ရှိတွင် ရလဒ်များဆိုးရွားနေသော်လည်း မိမိအနေဖြင့် အသင်းကစားသမားများ၏ ထောက်ခံမှုကို ရရှိထားဆဲဖြစ်ကြောင်း ပြောကြားခဲ့သည်။