Top News

၂၀၂၄ ခုနှစ်အတွင်း ပရိသတ်စိတ်ဝင်စားမှုနှင့် ရေပန်းစားသည့်ဖြစ်ရပ်တစ်ခုအဖြစ် ထိုင်းနိုင်ငံတွင် ကျင်းပခဲ့သည့် အလှမယ်ပြိုင်ပွဲတစ်ခုတွင် မြန်မာကိုယ်စားပြုအလှမယ် သဲစုညိမ်း၏ ဖြစ်ရပ်လည်း အပါအဝင်တစ်ခုဖြစ်သည်။

နိုင်ငံတကာအလှမယ်ပြိုင်ပွဲတစ်ခုဖြစ်သည့် Miss Grand International ပြိုင်ပွဲ၏ 2024 Grand Final မှာ 2nd Runner-Up ဆုရရှိသည်အထိ အောင်မြင်မှုရရှိခဲ့ပြီးနောက် အဆိုပါဆုပြန်လည်ရုပ်သိမ်းခံရခြင်းဖြစ်သည်။

Miss Grand International 2024 ပြိုင်ပွဲတွင် အလှမယ်သဲစုညိမ်းရရှိခဲ့သည့် 2nd Runne-Up ဆုကို ရုပ်သိမ်းကြောင်း Miss Grand International Organization က အောက်တိုဘာ ၂၈ ရက်တွင် ထုတ်ပြန်ခဲ့သည်။

 2nd Runner-Up ဆုရှင် အလှမယ်သဲစုညိမ်းအနေဖြင့် မသင့်လျော်သော အပြုအမူများနှင့် စည်းကမ်းချိုးဖောက်မှုများကြောင့် ရုပ်သိမ်းရန် ဆုံးဖြတ်ခဲ့ခြင်းဖြစ်ကြောင်း အဆိုပါထုတ်ပြန်ချက်တွင် ဖော်ပြခဲဲ့သည်။

အောက်တိုဘာ ၂၅ ရက်က ထိုင်းနိုင်ငံ ဘန်ကောက်မြို့ရှိ MGI Hall ၌ ကျင်းပခဲ့သည့် အဆိုပါပြိုင်ပွဲတွင် အလှမယ်သဲစုညိမ်းသည် Top 5 Finalist ထဲရောက်ရှိခဲ့ပြီး ပြိုင်ဆိုင်မှုပြင်းထန်ခဲ့ကာ မြန်မာနိုင်ငံနှင့် ထိုင်းနိုင်ငံရှိ ပရိသတ်များ၊ လူမှုကွန်ရက်များတွင် အားပေးဝန်းရံမှုများစွာရှိခဲ့ကြသော်လည်း အလှမယ်သဲစုညိမ်းမှာ 2nd Runner-Up ဆုဖြင့်သာ ပြိုင်ပွဲပြီးဆုံးခဲ့သည်။

သို့သော် ယင်းပြိုင်ပွဲပြီးဆုံးပြီးနောက် အလှမယ်သဲစုညိမ်း စတိတ်စင်အောက်သို့ ဆင်းလာစဉ် အဆိုပါပြိုင်ပွဲ၏ မြန်မာနိုင်ငံကိုယ်စားပြု National Director က 2nd Runner-Up ဆုရရှိသည့် သရဖူနှင့် စလွယ်တို့ကို ဖယ်ရှားကာ အလှမယ်သဲစုညိမ်းလည်း ငိုယိုနေသည့်ဗီဒီယိုဖိုင်များ လူမှုကွန်ရက်တွင် ထွက်ပေါ်လာခဲ့ပြီး ဝေဖန်မှုများ၊ သုံးသပ်မှုများဖြင့် အလှမယ်ပရိသတ်များအကြား ပျံ့နှံ့ထင်ရှားခဲ့သည်ကို တွေ့ရှိရသည်။

အစောပိုင်းတွင် ယင်းသရဖူပြန်လည်အပ်နှံမည်ဖြစ်ကြောင်း သတင်းများထွက်ပေါ်လာခဲ့ပြီး မြန်မာနိုင်ငံကိုယ်စားပြု National Director က ယင်းပြိုင်ပွဲတွင် ဖြစ်ပွားခဲ့သည့် ဖြစ်ရပ်နှင့်ပတ်သက်၍ လူမှုကွန်ရက် Facebook တွင် ရှင်းလင်းပြောကြားမှုများ ပြုလုပ်ခဲ့သည်။

National Costume နှင့် Country’s Power of The Year ဟူသော အကောင်းဆုံးဆုတို့ကို ဆွတ်ခူးခြင်းမရှိဖြစ်ခဲ့ပြီးနောက် မိမိသည် လုယူခံရသည်ဟု ခံစားရသောကြောင့် မိမိ၏ဆုကို လက်လွှတ်လိုက်ပြီဟု သဲစုညိမ်းက အင်စတာဂရမ်တွင် တိုက်ရိုက်လွှင့်ခဲ့သော ဗီဒီယိုတွင် ပြောကြားခဲ့သည်။

ထို့နောက် Miss Grand International ပြိုင်ပွဲ၏ Facebook Page တွင် Miss Grand International 2024 ၏ winner ဆုကို အိန္ဒိယအလှမယ် Rachel Gupta၊ 1st Runner Up ဆုကို ဖိလစ်ပိုင်အလှမယ် Christine Juliane Ooiaza၊ 3rd Runner Up ဆုကို ပြင်သစ်အလှမယ် Safietou Kabengele နှင့် 4th Runner Up ဆုကို ဘရာဇီးလ်အလှမယ် Tallinn Hartman တို့ရရှိခဲ့ကြောင်းနှင့် 2ne Runner Up ဆု ရရှိသူ၏ အမည်ကိုမူ ဖော်ပြထားခြင်းမရှိတော့ပေ။

ယင်းနောက် အလှမယ်သဲစုညိမ်း၏ 2nd Runner Up ဆုကို ရုပ်သိမ်းကြောင်း အောက်တိုဘာ ၂၈ ရက်တွင် အဆိုပါအဖွဲ့အစည်းက ထုတ်ပြန်ခဲ့သည်။ ထို့ပြင် Miss Grand International ဥက္ကဋ္ဌ နာဝပ်အစ်ဆာရာ ဂရီဆေးလ်က သဲစုညိမ်းဆုပြန်ပေးမည်ဟူသော ဆုံးဖြတ်ချက်ကို လက်ခံခဲ့ပြီး Miss Grand Myanmar နှင့်လည်း လက်တွဲဖြုတ်လိုက်သည်ဟု ဘန်ကောက်တွင် ပြုလုပ်ခဲ့သည့် သတင်းစာရှင်းလင်းပွဲတွင် ပြောကြားခဲ့သည်။