ကယားပြည်နယ်အပါအဝင် ရွေးကောက်ပွဲဝင်မည့် မဲဆန္ဒနယ်အားလုံးတွင် မဲဆွယ်စည်းရုံးမှုစတင်နေပြီး ဘဏ္ဍာရေး အခက်အခဲသည် အဓိကစိန်ခေါ်မှုဖြစ်ကြောင်း ကယန်းအမျိုးသားပါတီ (KNP) ဥက္ကဋ္ဌ လွီးစီငြိမ်း (ခ) ခွန်းဘီထူး (မယ်စဲ့မြို့နယ် ပြည်သူ့လွှတ်တော်ကိုယ်းစားလှယ်လောင်း) က ပြောကြားသည်။
လက်ရှိတွင် ကယားပြည်နယ် မယ်စဲ့မြို့နယ်တွင် ရွေးကောက်ပွဲဝင်မည့် ကယန်း အမျိုးသားပါတီ (KNP) အနေဖြင့် COVID-19 ကြောင့် Door to Door စနစ်ဖြင့် လူထုအား သွားရောက်တွေ့ဆုံ၍ စည်းရုံးရေး ဆင်းနေရကြောင်း သိရသည်။
“ မဲဆွယ်ဖို့အတွက် ကုန်ကျစာရိတ်တွေလည်း ပိုများလာတယ်ပေါ့။ အထူးသဖြင့် ကားတွေကိုခွဲစီးရသလို တစ်ဖက်မှာက လူထုတွေဘက်ကလာရင်လည်း ခြောက်ပေအကွာ ထိုင်ခိုင်းတာတို့ Mask ဝေတာတို့ Hand Gel ပေးတာတို့၊ ကျွန်တော်တို့ အချိန်တွေလည်း ပိုများတာပေါ့နော်။ အကောင်းဆုံးက လောလောဆယ် Door to Door သွားပြီးတော့မှပေါ့နော်။ ကျွန်တော်တို့ လိုက်တွေ့လိုက်မိတ်ဆက်တာက အထိရောက်ဆုံးအခြေအနေ ဖြစ်နေတယ်ပေါ့နော်” ဟု မယ်စဲ့မြို့နယ် ပြည်သူ့လွှတ်တော်ကိုယ်စားလှယ်လောင်း လွီးစီငြိမ်းက ပြောကြားသည်။
မယ်စဲ့မြို့နယ်တွင် မဲရုံရှစ်ရုံရှိပြီး ဌာနေတိုင်းရင်းသား ကယန်းလူမျိုးများအပြင် ရှမ်းတိုင်းရင်းသားနှင့် အခြားတိုင်းရင်းသားများ နေထိုင်ကြပြီး လူဦးရေမှာ ၆၈၀၀ ကျော်ရှိပြီး မဲပေးခွင့်ရှိသူမှာ ၄၉၀၀ ကျော်ရှိသဖြင့် ၎င်းတို့ထဲမှ ရွှေ့ပြောင်းအလုပ်သမားသည် ရက် ၉၀ နေထိုင်ပြီး မဲပေးမည်ကို စိုးရိမ်ရသည့် မြို့နယ်ဖြစ်ကြောင်း ၎င်းက ဆိုသည်။
“ တိုင်းရင်းသားပါတီတွေ အဓိကစိန်ခေါ်မှုက ငွေကြေးပေါ့။ KySDP (ကယားပြည်နယ်ဒီမိုကရက်တစ်ပါတီ) ဆို ငွေကြေးကြောင့် စာရွက်မရတာကြောင့် ဝေဖို့နောက်ကျတာတွေ့ရတယ်။ စာရွက်ဝေရင်း ဟောပြောဖို့တော့ ကျွန်တော်တို့လုပ်နေတယ်။ ရွှေ့ပြောင်းအလုပ်သမားတော်တော်များများကတော့ သူတို့နေရပ်ကနေ ပြန်မဲထည့်မယ်လို့ ကြားတယ်။ သူတို့မဲထည့်ဖို့ ရှိ မရှိ နောက်ဆုံးသတင်းအချက်အလက်ကို ပြန်မေးရဦးမယ်” ဟု ကယန်းအမျိုးသားပါတီဥက္ကဋ္ဌ လွီးစီငြိမ်း (ခ) ခွန်းဘီထူးက ပြောကြားသည်။
၂၀၂၀ ရွေးကောက်ပွဲတွင် ကယန်းအမျိုးသားပါတီအနေဖြင့် ကယားပြည်နယ်တွင် ကယန်းတိုင်းရင်းသားများ အများဆုံးနေထိုင်ရာ ဒီးမော့ဆိုနှင့် မယ်စဲ့မြို့နယ်တို့၌ ကိုယ်စားလှယ်လောင်း လေးဦး ဝင်ပြိုင်မည်ဖြစ်ကြောင်း သိရသည်။
ကယားပြည်နယ်တွင် ကယန်းအမျိုးသား ပါတီဝင်ရောက်ယှဉ်ပြိုင်သည့် မဲဆန္ဒနယ်များတွင် ကယားပြည်နယ် ဒီမိုကရက်တစ်ပါတီက ယှဉ်ပြိုင်ခြင်းမရှိပေ။
အမျိုးသားဒီမိုကရေစီအဖွဲ့ချုပ် (NLD) ပါတီမှ ကယားပြည်နယ် ဝန်ကြီးချုပ်ဟောင်း ဦးအယ်လ်ဖောင်းရှိုသည် မယ်စဲ့မြို့နယ် ပြည်နယ်လွှတ်တော် မဲဆန္ဒနယ် အမှတ် (၂) တွင် ဝင်ရောက်အရွေးခံမည်ဖြစ်ပြီး မဲဆွယ် လှုပ်ရှားမှုများကို စတင်နေပြီဖြစ်သည်။
ကယန်းအမျိုးသားပါတီသည် ကယန်းတိုင်းရင်းသားများနေထိုင်သည့် နေပြည်တော် ကောင်စီ၊ ကရင်ပြည်နယ်၊ ရှမ်းပြည်နယ်တောင်ပိုင်း စသည့်နေရာများတွင်လည်း ရွေးကောက်ပွဲဝင်ရောက်ယှဉ်ပြိုင်မည်ဖြစ်သည်။
-
မြောက်ဦးမြို့နယ်တွင် တပ်မတော်နှင့် AA အဖွဲ့ အချိန်ကြာမြင့်စွာ တိုက်ပွဲဖြစ်ပွားရာ၌ တပ်မတော်ဘက်က စစ်သည်အချို့ ကျဆုံးပြီး AA ဘက်မှ အလောင်းအချို့နှင့် သေနတ်ခြောက်လက် သိမ်းဆည်းရမိခဲ့ကြောင်း တပ်မတော်ပြောကြား
-
မြောက်ဦးမြို့နယ် လက္ကာကျေးရွာအနီးတွင်ဖြစ်ပွားခဲ့သော တပ်မတော်နှင့် AA အဖွဲ့တိုက်ပွဲအတွင်းAA အလောင်းကိုးလောင်းရရှိခဲ့ပြီး တပ်မတော်က နယ်မြေလုံခြုံရေးဆောင်ရွက်နေကြောင်း သတင်းထုတ်ပြန်
-
မြန်မာနိုင်ငံတွင် ပြည့်စုံသော ဒီမိုကရေစီကို အသွင်ပြောင်းရန်အတွက် ဖွဲ့စည်းပုံအခြေခံဥပဒေ ပြင်ဆင်ရမည် ဖြစ်သော်လည်း လာမည့်နှစ် ရွေးကောက်ပွဲမတိုင်မီ ဖြစ်နိုင်ခြေ မရှိကြောင်း ဒေါ်အောင်ဆန်းစုကြည် ပြောကြား
-
အဲဗာတန်အားရှုံးနိမ့်ခြင်းမှာ ပျင်းရိခြင်းကြောင့်ဟု ဝေဖန်ခဲ့သော မော်ရင်ဟိုကို စပါးကစားသမားများ မကျေမနပ်ဖြစ်နေပြီး စုပေါင်းပုန်ကန်ဖွယ်ရှိ
-
ကိုရိုနာဗိုင်းရပ်စ်ကြောင့် ပရီးမီးယားလိဂ်အသင်းများ ရုပ်သံဝင်ငွေ(၁၀.၇%)စီ ပြန်ပေးရမည်ဖြစ်ပြီး လီဗာပူးလ် အနစ်နာဆုံးဖြစ်
