Top News

တေးသံရှင် ခင်ဘုဏ်း၊ ယုဇန၊ ရှင်ဘုန်းတို့ ပါဝင်တင်ဆက်မည့် Sky Christmas ဂီတဖျော်ဖြေပွဲ ခရစ္စမတ်နေ့တွင် ပြုလုပ်မည်
24htopnews | January 5, 2025 6:12 AM CST

တေးသံရှင် ခင်ဘုဏ်း၊ ယုဇန၊ ရှင်ဘုန်းတို့ ပါဝင်တင်ဆက်သွားမည့် Sky Christmas ဂီတဖျော်ဖြေပွဲကို ဒီဇင်ဘာ ၂၅ ရက်ခရစ္စမတ်နေ့ ညပိုင်းတွင် ရန်ကုန်မြို့ Yangon Yangon Bar ၌ ပြုလုပ်မည်ဖြစ်ကြောင်း သိရသည်။ ဝင်ကြေးအဖြစ် ကျပ်နှစ်သောင်းဟု သတ်မှတ်ထားကြောင်း သိရသည်။ ဖျော်ဖြေပွဲတွင် တေးသံရှင်သုံးဦးက ပရိသတ်များနှင့် အမှတ်တရရှိခဲ့သည့် တေးသီချင်းများအား ရွေးချယ်ဖျော်ဖြေသွားမည်ဖြစ်သည်။

“ခရစ္စမတ်နေ့ ဂီတဖျော်ဖြေပွဲရှိပါတယ်။ ထူးထူးခြားခြားအနေနဲ့ မိန်းကလေးအဆိုတော်သုံးဦးက အမှတ်တရတေးသီချင်းတွေနဲ့ ဖျော်ဖြေတင်ဆက်ကြမှာပါ။ သာယာအေးချမ်းတဲ့ ခရစ္စမတ်ညချမ်းမှာ လှပငြိမ့်ညောင်းတဲ့ ဂီတသံစဉ်တွေနဲ့ ဖြတ်သန်းချင်သူတွေကို လာရောက်အားပေးဖို့ ဖိတ်ခေါ်ပါတယ်။ ဝင်ကြေးကျပ်နှစ်သောင်းလို့ သတ်မှတ်ထားပါတယ်။ ဖျော်ဖြေရေးတွေကို ည ၈ နာရီလောက်မှာ စတင်သွားပါမယ်” ဟု Yangon Yangon Bar မှ တာဝန်ရှိသူတစ်ဦးက ဆိုသည်။

ခရစ္စမတ်နေ့တွင် ဖျော်ဖြေတင်ဆက်မည့် တေးသံရှင် ခင်ဘုဏ်း၊ ယုဇန၊ ရှင်ဘုန်းတို့ မှာ ပရိသတ်များကြားတွင် ထင်ရှားခဲ့သည့် တေးသီချင်းကောင်းများအပြင် မကြာမီက ထွက်ရှိထားသည့် single song အသစ်များကိုလည်း ထည့်သွင်းသီဆိုရန် စီစဉ်ထားကြောင်း သိရသည်။ သီချင်းတိုက် ပြင်ဆင်မှုများအား မကြာမီစတင်ပြုလုပ်မည်ဖြစ်ကြောင်း သိရသည်။

ပါဝင်တင်ဆက်မည့် တေးသံရှင်သုံးဦးမှာ ဂီတလုပ်ငန်းများအား ဖြည်းဖြည်းမှန်မှန် ဆက်လက်လုပ်ကိုင်နေသူများဖြစ်ပြီး ပရိသတ် အခိုင်အမာရရှိထားသူများလည်းဖြစ်သည်။ Yangon Yangon Bar တွင် ရက်အလိုက် မတူကွဲပြားသည့် ဂီတဖျော်ဖြေရေးများအား စီစဉ်ထားရာ၌ ယခုဖျော်ဖြေပွဲသည်လည်း တစ်ခုအပါအဝင်ဖြစ်သည်။ ဖျော်ဖြေရေးအစီအစဉ်များအား ကြိုတင်ကြေညာပေးလျက်ရှိကာ Yangon Yangon Facebook တွင် ဝင်ရောက်ကြည့်ရှုနိုင်မည်ဖြစ်ကြောင်း သိရသည်။

 


READ NEXT
Cancel OK