Top News

စိတ်ကူးယဉ်သိပ္ပံအာကာသ ဇာတ်ကားသစ် Star Wars: The Rise of Skywalker ကို ဒီဇင်ဘာ ၁၆ ရက်တွင် လော့စ်အိန်ဂျလိစ်၌ ပွဲဦးထွက် ပြသခဲ့သည်။

Star Wars သုံးတွဲဆက်ဇာတ်ကား၏ တတိယမြောက်ဇာတ်ကားဖြစ်သော ယင်းဇာတ်ကားတွင် ကယ်ရီဖစ်ရှာ၊ မက်ဟာမေးလ်၊ အဒမ်ဒရိုက်ဘာ၊ ဒေစီရစ်ဒလေ၊ အော်စကာအိုက်ဇက်၊ လူပီတာညောင်အို၊  John Boyega ၊ ကာရီရပ်ဆဲလ်တို့က အဓိကဇာတ်ကောင်များအဖြစ် ပါဝင်ထားသည်။

ဒီဇင်ဘာ  ၂၀ ရက်တွင် အမေရိကန်၌ ဖြန့်ချိမည့် ယင်းဇာတ်ကားအတွက် ကြိုတင်လက်မှတ်များကို အောက်တိုဘာ ၂၁ ရက်က စတင်ရောင်းချခဲ့သည်ဟု Lucasfilm က ထုတ်ပြန်ခဲ့သည်။ ဒါရိုက်တာ ဂျေဂျေအေဘရမ် ရိုက်ကူးသည့် ယင်းဇာတ်ကားသည် ပွဲဦးထွက်ဝင်ငွေ ဒေါ်လာ ၂၀၅ သန်းခန့် ရရှိနိုင်ခြေရှိသည်ဟု ရုပ်ရှင်ဝေဖန်သူများက ခန့်မှန်းခဲ့သည်။ ယင်းဇာတ်ကားသည် ရုပ်ရှင်သမိုင်းတွင် ပွဲဦးထွက်လက်မှတ်ရောင်းချမှု ဝင်ငွေအများဆုံးရရှိိသည့် ဇာတ်ကားများထဲတွင် ပါဝင်နိုင်ခြေရှိသည်ဟုလည်း ခန့်မှန်းခဲ့သည်။

“ Star Wars: The Rise of Skywalker ဇာတ်ကားကို ကြည့်ရင် စိတ်လှုပ်ရှားမှု ၅၀ ရာခိုင်နှုန်းနဲ့ ထိတ်လန့်မှု ၅၀ ရာခိုင်နှုန်းကို ခံစားရမယ်လို့ ကျွန်တော်ပြောချင်ပါတယ်” ဟု ဂျေဂျေအေဘရမ်က  ပြောကြားခဲ့့သည်။

ဂျေဂျေအေဘရမ်သည် Star Wars ဇာတ်ကားများ ရိုက်ကူးမှုအတွက် Lucas ထုတ်လုပ်ရေး၏ ယုံကြည်အားထားမှုကို ရရှိခဲ့သည့် ဒါရိုက်တာတစ်ဦးလည်းဖြစ်သည်။ ၎င်းရိုက်ကူးခဲ့သည့် The Force Awakens ဇာတ်ကားသည်  မြောက်အမေရိကလက်မှတ် ရောင်းချမှုဝင်ငွေစာရင်းတွင် စံချိန်သစ်တင်ခဲ့ပြီး ဝင်ငွေ ဒေါ်လာ နှစ်ဘီလျံကျော် ရရှိခဲ့သည်။

အေဘရမ်သည် The Rise if Skywalker တွင် ဇာတ်ကားတွင် ကွယ်လွန်သူ သရုပ်ဆောင် ကယ်ရီဖစ်ရှာ၏ Princess Leia ဇာတ်ကောင်ကို အဓိကကျသည့် ဇာတ်ကောင်တစ်ခုအဖြစ် ရိုက်ကူးခဲ့သည်။ Leia ဇာတ်ကောင်အတွက် The Force Awakens ဇာတ်ကားရိုက်ကူးရာတွင် အသုံးမပြုခဲ့သည့် ဇာတ်ဝင်ခန်းများနှင့် ယင်းဇာတ်ကားတွင် ပါဝင်ခဲ့သည့် ဇာတ်ဝင်ခန်းတို့ကို ပြန်လည်တည်းဖြတ် အသုံးပြုခဲ့သည်ဟု ၎င်းက ပြောကြားခဲ့သည်။

Star Wars ဇာတ်ကားများတွင် Princess Leia ဇာတ်ကောင်ဖြင့် အောင်မြင်ခဲ့သည့် ကယ်ရီဖစ်ရှာသည် The Force Awakens ဇာတ်ကားရိုက်ကူးပြီးနောက် ၂၀၁၆ ခုနှစ်တွင် ကွယ်လွန်ခဲ့သည်။