Top News

သဘာဝဘေးအန္တရာယ်အကြောင်း ရိုက်ကူးထားသည့် Ashfall ဇာတ်ကားကို ကိုရီးယား၌ မဖြန့်ချိမီ ပြည်ပနိုင်ငံ ၉၀ သို့ ရောင်းချခဲ့သည်ဟု CJ Entertainment က ထုတ်ပြန်ခဲ့သည်။

ဒါရိုက်တာ Lee Hae- Jun နှင့် Kim Byung-soe တို့ရိုက်ကူးပြီး လီဗြောင်ဟွန်း၊ ဟာဂျောင်ဝူး၊ ဆူဇီနှင့် Ma Dong-seok တို့ အဓိကဇာတ်ကောင်များအဖြစ် ပါဝင်သည့် ယင်းဇာတ်ကားကို အမေရိကန်တွင် ဒီဇင်ဘာ ၂ဝနှင့် ထိုင်ဝမ်တွင် ဒီဇင်ဘာ ၂၄ ရက်၌ ဖြန့်ချိမည်ဖြစ်သည်။ ဟောင်ကောင်၊ စင်ကာပူ၊ အင်ဒိုနီးရှား၊ သြစတြေးလျနှင့် ဗီယက်နမ်တို့တွင် ဇန်နဝါရီလ၌ ဖြန့်ချိမည်ဖြစ်သည်။ ယင်းဇာတ်ကားကို ဘာလင်ရုပ်ရှင်စျေးကွက်တွင်လည်း ရောင်းချနိုင်ရန် မျှော်မှန်းထားသည်ဟု CJ Entertainment က ထုတ်ပြန်ခဲ့သည်။

Ashfall ဇာတ်ကားသည် Baekdu တောင်ရှိ မီးတောင်တစ်လုံးပေါက်ကွဲခဲ့ပြီးနောက် ယင်းဒေသတွင် နောက်ထပ်မီးတောင်ပေါက်ကွဲမှုများ ဖြစ်လာနိုင်သည်ဆိုသော ခန့် မှန်းချက်များနှင့်အတူ ကိုရီးယားကျွန်းဆွယ်တွင် ဝရုန်းသုန်းကားအခြေအနေများ ဖြစ်ပေါ်ခဲ့ပြီးနောက် ဖြစ်လာနိုင်ခြေရှိသည့် ဘေးအန္တရာယ်များကို ကာကွယ်မှုများလုပ်ဆောင်သည့်အကြောင်း ရိုက်ကူးထားခြင်းဖြစ်သည်။ ယင်းဇာတ်ကားတွင် တောင်ကိုရီးယားနှင့် မြောက်ကိုရီးယားနှစ်နိုင်ငံမှ အရာရှိနှစ်ဦး၏ ပူးပေါင်းဆောင်ရွက်မှုနှင့် ခင်မင်ရင်းနှီးမှုအကြောင်းကိုလည်း အသားပေးရိုက်ကူးထားသည်။

ကိုရီးယားထိပ်တန်းသရုပ်ဆောင်များပါဝင်ပြီး ဒေါ်လာ ၁၇ သန်းကျော် ကုန်ကျခံရိုက်ကူးထားသည့် ယင်းဇာတ်ကားသည် ထုတ်လုပ်ရေးကုမ္ပဏီ Dexter Studios အတွက် ၂၀၁၉ ခုနှစ်တွင် မျှော်မှန်းထားမှု အများဆုံးဇာတ်ကားတစ်ကားဖြစ်သည်။ Dexter Studios သည် လက်မှတ်ရောင်းချမှု ဝင်ငွေစာရင်းတွင် ဝက်ဝက်ကွဲအောင်မြင်ခဲ့သည့် Along With the Gods ဇာတ်ကားကို ထုတ်လုပ်သည့်ကုမ္ပဏီလည်းဖြစ်သည်။

Ashfall ဇာတ်ကားတွင် မီးတောင်ပေါက်ကွဲမှုဖြစ်ပြီး မြို့ပြကို ပျက်စီးမှုဖြစ်ပေါ်ခဲ့သည့် ဇာတ်ဝင်ခန်းများအတွက် ကွန်ပျူတာအထူးပြုလုပ်ချက်များကို အသုံးပြုခဲ့သည်ဟု ဒါရိုက်တာများက ပြောကြားခဲ့သည်။ တောင်ကိုရီးယား၌ ဒီဇင်ဘာ ၁၉ ရက်တွင်ဖြန့်ချိမည့် ယင်းဇာတ်ကားအတွက် ကြိုတင်လက်မှတ်စောင်ရေ ၂၉၀၀၀၀ ရောင်းချထားပြီးဖြစ်သည်ဟု ကိုရီးယားမီဒီယာများက ဖော်ပြခဲ့သည်။