Top News

နိုင်ငံ​တော်စီမံအုပ်ချုပ်​ရေး​ကောင်စီဥက္ကဋ္ဌ၊ တပ်မ​တော်ကာကွယ်​ရေးဦးချုပ်၏ ဖိတ်​ခေါ်ချက်အရ ငြိမ်းချမ်း​ရေး ​ဆွေး​​နွေးရန်အတွက် အမျိုးသားဒီမိုကရက်တစ်မဟာမိတ်အဖွဲ့(NDAA)၊ ရှမ်းပြည်တိုးတက်​ရေးပါတီ(SSPP)၊ "ဝ"ပြည် ​သွေးစည်းညီညွှတ်​ရေးပါတီ(UWSP) ငြိမ်းချမ်း​ရေးကိုယ်လှယ်အဖွဲ့တို့၏ ​တွေ့ဆုံ​ဆွေး​နွေးမှုတွင် ပြည်နယ်ရရှိ​ရေး UWSP ၏ ​တောင်းဆိုမှု၊ NDAA ​၏ ကိုယ်ပိုင်အုပ်ချုပ်ခွင်ရရှိ​ရေး​တောင်းဆိုမှုနှင့် ပင်လုံပါအချက်များ အ​ကောင်အထည်​ဖော်​ရေး SSPP ၏ ​တောင်းဆိုမှုများကို မူအားဖြင့် သ​ဘောတူခဲ့​ကြောင်း နိုင်ငံ​တော်စီမံအုပ်ချုပ်​ရေး​ကောင်စီ​ပြော​ရေးဆိုခွင့်ရှိသူ ဗိုလ်ချုပ်​ဇော်မင်းထွန်းက ​ပြောကြားသည်။

စက်တင်ဘာ ၂၆ ရက်က နိုင်ငံ​တော်စီမံအုပ်ချုပ်​ရေး​ကောင်စီဥက္ကဋ္ဌ၊ တပ်မ​တော်ကာကွယ်​ရေးဦးချုပ် ဗိုလ်ချုပ်မှူးကြီး​ မင်း​အောင်လှိုင်နှင့် အမျိုးသားဒီမိုကရက်တစ်မဟာမိတ်အဖွဲ့(NDAA) ဒုတိယဥက္ကဋ္ဌ ဦးစန်း​ပေ့၊ ရှမ်းပြည်တိုးတက်​ရေးပါတီ(SSPP) ဒုတိယဥက္ကဋ္ဌ(၂) စပ်ခွန်ဆိုင်၊ "ဝ"ပြည် ​သွေးစည်းညီညွှတ်​ရေးပါတီ(UWSP) ဒုတိယဥက္ကဋ္ဌ ဦး​လော့ယာကုတို့ ဦး​​​ဆောင်သည့် ငြိမ်းချမ်း​​ရေးကိုယ်စားလှယ်အဖွဲ့တို့ ​​နေပြည်​တော်တွင် ​တွေ့ဆုံ​ဆွေး​နွေးခဲ့​ကြောင်း သိရသည်။

“ဆွေးနွေးတဲ့ နေရာမှာတော့ UWSP "ဝ" အဖွဲ့အနေနဲ့ကတော့ နိုင်ငံတော်ကနေ ခွဲမထွက်ရေးမူကို လက်ကိုင်ထားတဲ့အကြောင်း၊ ပြီးရင်တော့ ဒေသတွင်း တည်ငြိမ်ရေးနဲ့ ဖွံ့ဖြိုးတိုးတက်ရေးကို အလေးထား ဆောင်ရွက်နေတဲ့အကြောင်း၊ ဒါပြောဆိုခဲ့ပါတယ်။ ပြီးရင် သူတို့အနေနဲ့တော့ ယခင်အပတ်တုန်းက ကျွန်တော်တို့ ပြောတဲ့အတိုင်းပဲ၊ သူတို့ရဲ့ အဆိုပြုချက်ပေါ့၊ ဆန္ဒကတော့ ပြည်နယ်ရရှိရေးပေါ့၊ ပြည်နယ် ရရှိရေးအတွက် ဆောင်ရွက်လိုတဲ့အကြောင်းကို သူတို့ပြောဆိုခဲ့တာ ရှိပါတယ်။ မိုင်းလားအဖွဲ့အနေနဲ့ကလည်း (၃၃) နှစ်ကြာလောက်ရှိပြီ၊ သူတို့ ပစ်ခတ်တိုက်ခိုက်မှု ရပ်စဲထားတာ။ သူတို့ဒေသမှာလည်း ဖွံ့ဖြိုးတိုးတက်မှု ရှိတယ်။ ဒါကြောင့်မလို့ (၃၃) နှစ်ကြာ ပစ်ခတ်တိုက်ခိုက်မှုရပ်စဲထားတာ၊ ငြိမ်းချမ်းရေးနံ့ပတ်သက်ပြီး သူတို့ ခိုင်မာအောင် ဆောင်ရွက်နေတဲ့အကြောင်း ပြောပါတယ်။ ပြီးရင်တော့ နိုင်ငံတော်ကနေပြီး ဘယ်တော့မှ ခွဲမထွက်ဆိုတာ လက်ကိုင်ထားတဲ့အကြောင်း ပြောဆိုခဲ့တာ ရှိပါတယ်။ သူတို့အနေနဲ့ကလည်း ကိုယ်ပိုင်အုပ်ချုပ်ခွင့်ရဒေသ ရရှိရေးအတွက် ဒါ သူတို့ရဲ့ ဆန္ဒသဘောထား ပြောဆိုခဲ့တာ ရှိပါတယ်။ ပြီးရင် SSPP အဖွဲ့အနေနဲ့ကတော့ ပင်လုံစာချုပ်ပါ အခွင့်အရေးများကို အကောင်အထည်ဖော်ဖို့တို့၊ တိုင်းရင်းသားအားလုံး တန်းတူရည်တူ အခွင့်အရေး ရရှိဖို့ဟာတွေ တောင်းဆိုခဲ့တာ ရှိပါတယ်" ဟု ဗိုလ်ချုပ်​ဇော်မင်းထွန်းက ​ပြောကြားသည်။

ထိုသို့တွေ့ဆုံ​ရာတွင် နစကဥက္ကဋ္ဌအ​နေနှင့် တိုင်းရင်းသားလက်နက်ကိုင်အဖွဲ့အစည်းများ၏ ​တောင်းဆိုချက်များ၊ ​ဒေသနှင့် တိုင်းပြည်အတွက် အမှန်တကယ်လိုအပ်သည့်ကိစ္စရပ်များအား ပွင့်လင်းမြင်သာစွာ ​ဆွေး​နွေးသွားရန် ​ပြောကြားခဲ့ပြီး တက်​​ရောက်လာသည့် တိုင်းရင်းသားအဖွဲ့အစည်းများကလည်း အစိုးရ၏ နိုင်ငံရေးဆွေးနွေးမှု၊ ပြည်တွင်းငြိမ်းချမ်းရေးနှင့် ဖွံ့ဖြိုးတိုးတက်ရေး ဖော်ဆောင်နိုင်ရန် ကမ်းလှမ်းခဲ့မှုအပေါ်ထောက်ခံကြိုဆိုသည့် သဘောထားများကို ​ပြောဆိုခဲ့ကြ​ကြောင်း သိရသည်။

ဗိုလ်ချုပ်​ဇော်မင်းထွန်းက “ကျွန်တော်တို့ရဲ့ သွားမှာကိုက ဒီမိုကရေစီနဲ့ဖက်ဒရယ်စနစ်ကို အခြေခံတဲ့ ပြည်ထောင်စုတည်ဆောက်ရေး ဖြစ်ပါတယ်။ ဒါကြောင့်မလို့ ကျွန်တော်တို့က ဒီမိုကရေစီနဲ့ဖက်ဒရယ်စနစ်ကို အခြေခံတဲ့ ပြည်ထောင်စုတည်ဆောက်နေတဲ့အချိန်မှာ လိုအပ်တဲ့ အခြေခံအချက်အလက်တွေ၊ ဆန္ဒသဘောထားတွေကို ပွင့်ပွင့်လင်းလင်း ပြောနိုင်ဖို့ ဆောင်ရွက်ရခြင်း ဖြစ်ပါတယ်။ ဒီလိုဆောင်ရွက်တဲ့နေရာမှာ ခုနကပြောတဲ့ဟာတွေပေါ့၊ တိုင်းရင်းသားလက်နက်ကိုင်အဖွဲ့အစည်း တော်တော်များများ၊ ဆွေးနွေးပြီးတဲ့ တိုင်းရင်းသားလက်နက်ကိုင်အဖွဲ့အစည်းတွေနဲ့လည်း ပြောဆိုခဲ့တယ်။ ဒီမိုကရေစီနဲ့ ဖက်ဒရယ်ကို အခြေခံတဲ့ ပြည်ထောင်စုတည်ဆောက်ရေးကတော့ ဒါသဘောတူ လက်ခံပြီးဖြစ်တယ်။ အဲ့လိုလက်ခံတဲ့နေရာမှာ ဒါခုနကပြောသလို သူတို့ရဲ့ ဆန္ဒသဘောထားတွေပေါ့၊ ဒါ ပြည်နယ်ရရှိဖို့တို့၊ ပြည်နယ်တောင်းဆိုမှုတို့၊ ကိုယ်ပိုင်အုပ်ချုပ်ခွင့်ရဒေသတို့၊ ဒါမျိုးတွေဆိုတာက ကျွန်တော်တို့က ဖွဲ့စည်းပုံအခြေခံဥပဒေအရကတော့ လွှတ်တော်အစုအဖွဲ့က သွားရမှာကို။ ဒါကြောင့်မလို့ ကျွန်တော်တို့က တွေ့ဆုံတိုင်းမှာလည်း ဒါတွေသည် လွှတ်တော်ကနေ သွားရမှာဖြစ်တယ်။ တပ်မတော်အနေနဲ့ လွှတ်တော်အစုအဖွဲ့ကနေ ပေါ်ပေါက်လာလို့ရှိရင် ကျွန်တော်တို့ သဘောတူညီထားတဲ့ ကိစ္စရပ်တွေကို တပ်မတော်အနေနဲ့ ရပ်တည်ထောက်ခံပြီး ဆောင်ရွက်သွားမယ်" ဟု ​ပြောကြားသည်။

တိုင်းရင်းသားများ၏ ဆန္ဒ၊ တိုင်းရင်းသားများ၏အကျိုးကို ​ဆောင်ရွက်နိုင်ရန်အတွက် လွှတ်​တော်စင်မြင့်၊ နိုင်ငံရေးစင်မြင့်​ပေါ်တွင် တိုင်းရင်းကိုယ်စားလှယ်များ ပါဝင်လာရန် လိုအပ်​ကြောင်း၊ ယင်းသို့ ပါဝင်လာနိုင်ရန်အတွက်လည်း တပ်မ​တော်အ​နေနှင့် ​ဆောင်ရွက်​ပေးသွားမည်ဖြစ်​ကြောင်း ဗိုလ်ချုပ်​ဇော်မင်းထွန်းက ​ပြောကြားသည်။

ဗိုလ်ချုပ်​ဇော်မင်းထွန်းက “ဒါနဲ့ပတ်သက်ပြီးတော့ နိုင်ငံတော်စီမံအုပ်ချုပ်ရေးကောင်စီဥက္ကဌအနေနဲ့ကလည်း အားလုံးပြည်ထောင်စုအကျိုးကို ရှေးရှု့ပြီးတော့ ရေရှည်မျှော်တွေးပြီး စဉ်းစားဆောင်ရွက်ရမှာ ဖြစ်တဲ့အကြောင်းတွေ၊ တိုင်းရင်းသားအားလုံး ညီညီညွတ်ညွတ်နဲ့ စုပေါင်းဆောင်ရွက်သွားရမှာ ဖြစ်တဲ့အကြောင်းတွေ ပြောဆိုခဲ့ပါတယ်။ တပ်မတော်အနေနဲ့ကတော့ ကျွန်တော်တို့ ယခင်ကတည်းက ပြောခဲ့ပြီးသားဖြစ်တယ်။ ကျွန်တော်တို့ ဆွေးနွေးတဲ့အခါမှာ ပါတီစုံဒီမိုကရေစီစနစ် ခိုင်မာစွာရပ်တည်ရေး၊ ကျင့်သုံးရေး၊ ပြီးရင်ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုတည်ဆောက်ရေး၊ ဒါတွေနဲ့ပတ်သက်ပြီးတော့ အခြေခံသဘောတူညီချက်များ ရယူခဲ့ပြီးဖြစ်ပါတယ်” ဟု ​ပြောကြားသည်။

နစက ဥက္ကဋ္ဌနှင့် အမျိုးသားဒီမိုကရက်တစ်မဟာမိတ်အဖွဲ့(NDAA)၊ ရှမ်းပြည်တိုးတက်​ရေးပါတီ(SSPP)၊ "ဝ"ပြည် ​သွေးစည်းညီညွှတ်​ရေးပါတီ(UWSP) ငြိမ်းချမ်း​ရေး ကိုယ်လှယ်အဖွဲ့တို့၏ ​​ယခုတစ်ကြိမ် ​တွေ့ဆုံ​ဆွေး​နွေးမှုတွင် ​ဆွေး​နွေးမှုများနှင့်ပတ်သက်၍ ပိုပြီးပွင့်လင်းလာသလို ပိုပြီးအ​သေးစိတ်လာ​ကြောင်းလည်း ဗိုလ်ချုပ်ဇော်မင်းထွန်းက ​ပြောကြားသည်။