ကိုရိုနာဗိုင်းရပ်စ် ကာကွယ်ဆေးကို အားလုံးအတွက် ရရှိလာခဲ့လျှင် ကမ္ဘာတစ်ဝန်းစီးပွားရေး ပြန်လည်နာလန်ထူမှု ပို၍ မြန်ဆန်လာမည်ဖြစ်ကြောင်း ကမ္ဘာ့ကျန်းမာရေးအဖွဲ့ ဥက္ကဋ္ဌ တက်ဒရိုအာဒါနွန်ဂီဘရီရေဆုက သြဂုတ် ၆ တွင် ပြောကြားခဲ့သည်။
အမေရိကန်တွင် ကျင်းပသော အာရှ-ပစိဖိတ် လုံခြုံရေးဖိုရမ် Aspen Security Forum ၏ အွန်လိုင်းဆွေးနွေးပွဲတွင် ပြောကြားခဲ့သော တက်ဒရိုက ကာကွယ်ဆေးနှင့် အခြားနည်းပညာများ မျှဝေခြင်းက ကမ္ဘာကို နာလန်ပြန်ထူလာစေရန် အထောက်အကူဖြစ်စေမည်ဖြစ်ကြောင်း၊ စီးပွားရေး ပြန်လည်နာလန်ထူမှု လျင်မြန်စေနိုင်ပြီး ကိုရိုနာဗိုင်းရပ်စ်ကြောင့် ထိခိုက်မှုကို လျော့ကျစေနိုင်ကြောင်း ပြောကြားခဲ့သည်။
ကမ္ဘာ့နိုင်ငံများ၊ ဆေးဝါးသုတေသနပညာရှင်များက ထိရောက်သော ကာကွယ်ဆေး ရရှိရန် အပြိုင်အဆိုင် ကြိုးပမ်းနေကြပြီး ကာကွယ်ဆေးကို ရနိုင်သရွေ့ များများရရန် ကြိုတင်မှာယူနေမှုကို ရည်ညွှန်း၍ တက်ဒရိုက နိုင်ငံချစ်စိတ်ရှိသော ကာကွယ်ဆေးသည် ကမ္ဘာကို အထောက်အကူပေးမည် မဟုတ်ကြောင်း ပြောကြားခဲ့သည်။
ကိုရိုနာဗိုင်းရပ်စ်သည် ၂၀ ရာစုအစောပိုင်း နောက်ပိုင်း အကြီးမားဆုံး ကျန်းမာရေးဆိုင်ရာ အရေးပေါ်အကျပ်အတည်းဖြစ်ကြောင်း၊ ကာကွယ်ဆေးရရှိရန် အပြည်ပြည်ဆိုင်ရာက ကြိုးပမ်းမှုသည် မကြုံစဖူးဖြစ်ကြောင်း တက်ဒရိုက သြဂုတ် ၃ တွင် ပြောကြားခဲ့သေးသည်။
ကိုရိုနာဗိုင်းရပ်စ်ကို ထိန်းချုပ်ရန် ထိုအခြေအနေကို ဆုပ်ကိုင်ပြီး ကမ္ဘာလုံးဆိုင်ရာ ညီညွှတ်မှုကို တက်ဒရိုက တောင်းဆိုခဲ့သည်။
“အားလုံး ဘေးမကင်းမချင်း ဘယ်နိုင်ငံမှ ဘေးကင်းမှု ရှိမှာမဟုတ်ပါဘူး” ဟု တက်ဒရိုက လုံခြုံရေးဖိုရမ်တွင် ပြောကြားခဲ့သည်။
WHO ၏ အရေးပေါ်ဆိုင်ရာ ဒါရိုက်တာ မိုက်ရိုင်ရန်ကို ရုရှားကာကွယ်ဆေးနှင့် ပတ်သက်၍ မေးမြန်းခဲ့ရာ မည်သည့် ကာကွယ်ဆေးမဆို ဘေးကင်းမှုနှင့်ထိရောက်မှု ရှိ၊ မရှိသေချာစေရန်အတွက် စမ်းသပ်မှုဆိုင်ရာ အချက်အလက်များ လိုအပ်ကြောင်း ၎င်းက ဆွေးနွေးပွဲတွင် ပြောကြားခဲ့သည်။
အမေရိကန်သည် နိုဝင်ဘာ ၃ ရွေးကောက်ပွဲမတိုင်မီ ကိုရိုနာဗိုင်းရပ်စ်ကာကွယ်ဆေးတစ်မျိုး ရရှိနိုင်ခြေရှိကြောင်း အမေရိကန်သမ္မတဒေါ်နယ်ထရန့်က သြဂုတ် ၆ တွင် ပြောကြားခဲ့ရာ အိမ်ဖြူတော်ကျန်းမာရေး အတိုင်ပင်ခံများ ခန့်မှန်းထားသည်ထက်ပင် စောနေခဲ့သည်။
ကာကွယ်ဆေးများ စမ်းသပ်နေဆဲဖြစ်ပြီး မည်သည့်ကာကွယ်ဆေးမျှ အတည်မပြုနိုင်သေးသော်လည်း ကိုရိုနာဗိုင်းရပ်စ် ကာကွယ်ဆေး၏စျေးနှင့်ပတ်သက်ပြီး အရိပ်အမြွက် ထွက်ပေါ်ခဲ့ပြီဖြစ်သည်။
မက်ဆာချူးဆက်အခြေစိုက် အမေရိကန်ဇီဝနည်းပညာ ကုမ္ပဏီ Moderna သည် ၎င်း၏ ကာကွယ်ဆေးကို တစ်လုံးလျှင် ၃၂ ဒေါ်လာနှင့် ၃၇ ဒေါ်လာကြား စျေးနှင့် နိုင်ငံခြား နိုင်ငံအချို့နှင့် သဘောတူညီချက် ရယူထားကြောင်း သတင်းများက ဆိုခဲ့သည်။
-
မြောက်ဦးမြို့နယ်တွင် တပ်မတော်နှင့် AA အဖွဲ့ အချိန်ကြာမြင့်စွာ တိုက်ပွဲဖြစ်ပွားရာ၌ တပ်မတော်ဘက်က စစ်သည်အချို့ ကျဆုံးပြီး AA ဘက်မှ အလောင်းအချို့နှင့် သေနတ်ခြောက်လက် သိမ်းဆည်းရမိခဲ့ကြောင်း တပ်မတော်ပြောကြား
-
မြောက်ဦးမြို့နယ် လက္ကာကျေးရွာအနီးတွင်ဖြစ်ပွားခဲ့သော တပ်မတော်နှင့် AA အဖွဲ့တိုက်ပွဲအတွင်းAA အလောင်းကိုးလောင်းရရှိခဲ့ပြီး တပ်မတော်က နယ်မြေလုံခြုံရေးဆောင်ရွက်နေကြောင်း သတင်းထုတ်ပြန်
-
မြန်မာနိုင်ငံတွင် ပြည့်စုံသော ဒီမိုကရေစီကို အသွင်ပြောင်းရန်အတွက် ဖွဲ့စည်းပုံအခြေခံဥပဒေ ပြင်ဆင်ရမည် ဖြစ်သော်လည်း လာမည့်နှစ် ရွေးကောက်ပွဲမတိုင်မီ ဖြစ်နိုင်ခြေ မရှိကြောင်း ဒေါ်အောင်ဆန်းစုကြည် ပြောကြား
-
အဲဗာတန်အားရှုံးနိမ့်ခြင်းမှာ ပျင်းရိခြင်းကြောင့်ဟု ဝေဖန်ခဲ့သော မော်ရင်ဟိုကို စပါးကစားသမားများ မကျေမနပ်ဖြစ်နေပြီး စုပေါင်းပုန်ကန်ဖွယ်ရှိ
-
ကိုရိုနာဗိုင်းရပ်စ်ကြောင့် ပရီးမီးယားလိဂ်အသင်းများ ရုပ်သံဝင်ငွေ(၁၀.၇%)စီ ပြန်ပေးရမည်ဖြစ်ပြီး လီဗာပူးလ် အနစ်နာဆုံးဖြစ်
