Top News

၂၀၂၀ အထွေထွေရွေးကောက်ပွဲတွင် ကယားပြည်နယ် ဒီးမော့ဆိုမဲဆန္ဒနယ်မှ NLD ပါတီကိုယ်စားပြု ဝင်ရောက်ယှဉ်ပြိုင်မည့် ပြည်နယ်လွှတ်တော်ကိုယ်စားလှယ်လောင်း နှစ်ဦးအား ကန့်ကွက်ကြောင်း NLD ပါတီ ဗဟိုကော်မတီထံ စာတင်ထားကြောင်း သတင်းရရှိသည်။

ကယားပြည်နယ်လွှတ်တော် ဒီးမော့ဆို မဲဆန္ဒနယ်အမှတ် (၁) နှင့် (၂) နေရာများတွက် ရွေးချယ်ခံထားရသော လွှတ်တော်ကိုယ်စားလှယ်လောင်း ဦးသိန်းအောင် (ခ) စံရယ်နှင့် ဦးကော်ဖရီခင်ဦး (ခ) ကိုသားကြီးတို့အား ပြည်သူများအား ကိုယ်စားမပြုနိုင်ခြင်းနှင့် အယုံအကြည်မရှိခြင်း၊ ရပ်ကျေး အလုပ်အမှုဆောင်များ၊ ကျေးရွာလူထုတို့နှင့် ချိတ်ဆက်ဆောင်ရွက်နိုင်မှု မရှိခြင်း စသည့် အချက်များကြောင့် အဆိုပါလွှတ်တော် ကိုယ်စားလှယ်နှစ်ဦးအား ရွေးချယ်ခြင်းကို ကန့်ကွက်ရခြင်းဖြစ်ပြီး သြဂုတ် ၃ ရက်တွင် NLD ပါတီ ဗဟိုကော်မတီထံ စာပေးပို့ထားကြာင်း သိရသည်။

“ ပွင့်လင်းမြင်သာမှု မရှိဘူးပေါ့။ ဒါကတစ်ချက် ကိုသားကြီးတို့ ဝင်ရွေးလာတာလည်း မြို့နယ် EC တွေ မသိကြဘူး။ ရပ်ကျေး EC ဆို ပိုဆိုး။ အကုန်လုံး တစ်ယောက်မှကို မသိတာ။ သူတို့ဘာသာသူတို့ ပုံဖော်ပြီးမှ လုပ်သလိုဖြစ်နေတယ်။ ဦးသိန်းအောင်ကျတော့လည်း ပြည်သူနဲ့တွေ့ဆုံမှုက လုံးဝမရှိသလောက်ဖြစ်နေတယ်။ အောက်ခြေကလည်း အသံထွက်နေတယ်။ ဒီလိုကိုယ်စားလှယ်မျိုးက အညံ့ဆုံးတစ်ယောက် ပြန်ပါလာလဲပေါ့။ ရပ်မိရပ်ဖက သူတို့ပဲရွေးတာ။ လုပြီးရွေးကျတော့ သူတို့စိတ်ကြိုက်လူတွေ လျှောက်ခေါ်ကြတာ။ မြို့မိမြို့ဖက သူတို့ အတိုင်အဖောက်နဲ့ညီတော့ သူတို့ပြန်ပါတာပေါ့။ ပါတီဝင်တွေဆိုလည်း သိတောင်မသိဘူး။ ရပ်ကျေးလည်း တစ်ယောက်မှမသိဘူး။ မြို့နယ် EC ကလည်း သူတို့လူလေ။ လူငယ်တွေလည်း တစ်ယောက်မှ မရှိတော့ဘူး။ ကျွန်တော့်လူငယ်တွေ စိတ်ဓာတ်ကျလို့ ဟိုရောက်ဒီရောက် ရောက်ကုန်ပြီ” ဟု NLD ပါတီ လူငယ်ရေးရာကော်မတီဝင် ခွန်းကိုရီက ပြောကြားသည်။

ထို့ပြင် ဦးကော်ရီခင်ဦး (ခ) ကိုသားကြီးမှာ လွိုင်ကော်မြို့တွင်နေထိုင်ပြီး  ဒီးမော့ဆိုမြို့နယ်၏ ဒေသခံမဟုတ်သည့်အတွက် ပြည်သူနှင့် သဟဇာတ ရှိနိုင်မည်မဟုတ်ခြင်း၊ ရပ်ကျေးနှင့် ပြည်သူလူထုမှ မသိရှိသောသူဖြစ်ခြင်း၊ ပါတီဝင်များနှင့် တရားဝင်ချိတ်ဆက် ဆောင်ရွက်မှုမရှိခြင်း၊ ပွင့်လင်းမြင်သာမှု မရှိသည့်အပြင် အုပ်စုဖွဲ့ရွေးချယ်သွားခြင်း စသည့် အကြောင်းအရာများကြောင့်ဖြစ်ပြီး ဦးစဲရယ်သိန်းအောင်မှာမူ လူထုယုံ ကြည်မှုကျဆင်းနေသူဖြစ်ခြင်း၊ လူထုနှင့် ထိတွေ့ရာတွင် အဆင်မပြေခြင်းများကြောင့် ကန့်ကွက်ရခြင်းဖြစ်ကြောင်း ကန့်ကွက်စာတွင် ဖော်ပြထားသည်။

ထိုသို့ကန့်ကွက်ရာတွင် ဒီးမော့ဆိုမြို့နယ် NLD ပါတီ အတွင်းရေးမှူးနှင့် အဖွဲ့ဝင် ခုနစ်ဦး၊ ရပ်ကျေး ကော်မတီဝင်များနှင့် အဖွဲ့ဝင် ၂၆ ဦး၊ NLD ပါတီဝင် နှစ်ဦးနှင့် ပါတီအား ကူညီပေးနေသော ပြည်သူလူထုတို့က လက်မှတ်ရေးထိုး၍ NLD ပါတီ ဗဟိုကော်မတီထံ စာတင်ခဲ့ကြခြင်းဖြစ်သည်။ 

“ ၂၀၁၅ တုန်းက မလွတ်မလပ်နဲ့ မြေပေါ်လည်းလုပ်ရတယ်။ မြေအောက်လည်း လုပ်ရတယ်လေ။ စရဖကလိုက်လိုက်။ ထောက်လှမ်းရေးကလိုက်လိုက်။ အုပ်ချုပ်ရေးမှူးရော၊ ထွေအုပ်ကရောလိုက်လိုက်နဲ့ ကျွန်တော်တို့လုပ်နေခဲ့တာ။ အခုချိန်ကျ မိုးကျရွှေကိုယ်တွေ နောက်ဘယ်လိုပြောမလဲဆို မဖြစ်နိုင်တဲ့ဟာတွေကို ဗဟိုကလည်း ဘယ်သူကောင်း၊ ဘယ်သူဆိုး သူတို့ မသိနိုင်ဘူးပေါ့။ နိုင်ငံရေးကိုလုပ်စားကြတယ်လို့ပဲ ပြောရမလားပေါ့။ ပြည်သူတွေက အသံထွက်ကုန်တယ်။ နိုင်ငံရေးလုပ်တဲ့သူပဲ လိုချင်တယ်တဲ့။ စည်းရုံးရေးဆင်းတဲ့ချိန် သူတို့ရွာတောင် ဝင်ရဲပါ့မလားလို့ ဖြစ်တယ်လေ။ လွိုင်ကော်လူကလည်း ဒီးမော့ဆိုက လူညံ့တွေ ရှိတယ်ဆိုပြီးတော့ ထင်လို့တူမယ်။ လူတော်တွေလည်း ရှိပါတယ်။ ပိုဆိုးတာက တစ်ချက်ရှိတယ်။ ကိုသားကြီးက အောက်ခြေက လူတွေ တစ်ယောက်မှမသိဘူး” ဟု ခွန်းကိုရီးက ပြောဆိုသည်။

လက်ရှိတွင် ကယားပြည်နယ်၌ NLD ပါတီမှ ကိုယ်စားလှယ်လောင်း ရွေးချယ်ခြင်းနှင့်ပတ်သက်၍ ရပ်မိရပ်ဖနှင့် မြို့နယ်ကရွေးချယ်သော မြို့နယ်အတွက်အားကိုးရမည့်သူများ မပါဝင်လာခြင်းနှင့် ယင်းသို့ရွေးချယ်မှုအပေါ် အယုံအကြည်မရှိသောကြောင့် ရှားတောမြို့နယ်၊ ဖရူဆိုမြို့နယ်နှင့် ဖားဆောင်းမြို့နယ်တို့မှ NLD ပါတီ မြို့နယ်ဥက္ကဋ္ဌ၊ အမှုဆောင်နှင့် အတွင်းရေးမှူးအချို့ နုတ်ထွက်စာ တင်ထားကြကြောင်း သိရသည်။