Top News

၂၀၂၀ ရွေးကောက်ပွဲတွင် တနင်္သာရီတိုင်းဒေသကြီး အမျိုးသားလွှတ်တော်မဲဆန္ဒနယ် အမှတ် (၉) ၌ တစ်သီးပုဂ္ဂလ ကိုယ်စားလှယ်လောင်း အဖြစ်  ဝင်ရောက်ယှဉ်ပြိုင်မည်ဖြစ်ပြီး  ပိုင်ဆိုင်မှုများကို မဲဆန္ဒရှင်များအား ချပြမည်ဟု ဒေါက်တာညိုညိုသင်းက ပြောကြားသည်။

ရန်ကုန်မြို့၊ မဟာဗန္ဓုလလမ်းနှင့် ဗိုလ်အောင်ကျော်လမ်းထောင့်ရှိ အိုလံပစ်တာဝါရှိ Myanmar Press Freedom Centre တွင် သြဂုတ် ၄ ရက်က ဒေါက်တာညိုညိုသင်းက ရွေးကောက်ပွဲ ယှဉ်ပြိုင်မည့် မဲဆန္ဒနယ်ကို  သတင်းစာရှင်းလင်းပွဲ ပြုလုပ် ပြောကြားခဲ့ခြင်းဖြစ်သည်။

"ကျွန်မအနေနဲ့ကတော့ ၂၀၂၀ ရွေးကောက်ပွဲမှာ ပါဝင်ယှဉ်ပြိုင်မယ်။ ပါဝင်ယှဉ်ပြိုင်ဖို့ဆိုတဲ့နေရာမှာ A Plan ၊ B Plan ၊ C Plan ချထားခဲ့တယ်။ ဒီနေ့ ကြေညာချင်တာကတော့ ကျွန်မအနေနဲ့ ၂၀၂၀ ရွေးကောက်ပွဲကို ဝင်ပါမယ်။ တစ်သီးပုဂ္ဂလအနေနဲ့ ဝင်မှာ ဖြစ်ပါမယ်။ ဘယ်ကနေ ဝင်မလဲဆိုရင် တနင်္သာရီတိုင်းကနေ ဝင်မှာ ဖြစ်ပါတယ်။ အမျိုးသားလွှတ်တော် မဲဆန္ဒနယ် အမှတ်(၉)ကနေ ဝင်ပြီးတော့ ယှဉ်ပြိုင်မှာ ဖြစ်ပါတယ်။ ရွေးကောက်ပွဲဝင်တဲ့အခါ ပြည်သူလူထုကို ကျွန်မပေးနိုင်တဲ့ ကတိက ပထမအနေနဲ့ကတော့ ကျွန်မရဲ့ ပိုင်ဆိုင်မှုစာရင်းကို မဲပေးမယ့် ပြည်သူလူထုထံကို တိုက်ရိုက်တင်ပြပြီး မဲတောင်းခံသွားမှာ ဖြစ်ပါတယ်။" ဒေါက်တာညိုညိုသင်းက ပြောကြားသည်။

ထိုသို့ မဲဆန္ဒရှင်ပြည်သူများထံသို့ ပိုင်ဆိုင်မှုစာရင်း တင်ပြ၍ မဲတောင်းခံခြင်းကို ဆောင်ရွက်ရခြင်းမှာ မြန်မာနိုင်ငံ၏ အဂတိလိုက်စားမှု တိုက်ဖျက်ရေးသည် နိုင်ငံတကာညွှန်းကိန်း အဆင့်အတန်းတွင် အဆင့် ၁၃၀ ဖြစ်နေကြောင်း၊ ယခုကဲ့သို့ အဂတိလိုက်စားမှု ထူပြောသော နိုင်ငံတွင် နိုင်ငံရေး အာဏာကို ရယူမည့် ကိုယ်စားလှယ်များသည် မိမိ၏ ပိုင်ဆိုင်မှုကို ပြည်သူလူထုထံ ချပြသင့်သည်ဟူသော သတင်းစကားကို ပေးချင်ကြောင်း ၎င်းက ပြောကြားသည်။

ထို့ပြင် ၎င်း ဝင်ရောက်ယှဉ်ပြိုင်မည့် မဲဆန္ဒနယ်သည် တနင်္သာရီတိုင်းတွင် ဒုတိယအဆင်းရဲဆုံး မဲဆန္ဒနယ်ဖြစ်ပြီး ယင်းမဲဆန္ဒနယ်အား ရွေးချယ်ရခြင်းသည် ထိုဒေသတွင် နိုင်ငံရေးအရ နိုးကြားမှု ရှိစေချင်၍ ဖြစ်ကြောင်း  ဒေါက်တာညိုညိုသင်းက ပြောကြားသည်။

" တစ်တိုင်းပြည်လုံးမှာ အထူးသဖြင့် နယ်တွေမှာ ပြည်သူလူထုက အနီသိတယ်။ အစိမ်းသိတယ်။ ဒီနှစ်ခုပဲ သိတယ်။ သူတို့မှာ ရွေးချယ်ခွင့် မရှိဘူးလို့ ယူဆထားကြတယ်။ ကျွန်မက ဒီလိုပြည်သူလူထုကို သတင်းစကား ပေးချင်တယ်။ ပြည်သူလူထုမှာ ရွေးချယ်ခွင့်ရှိပါတယ်။ အနီလည်းမဟုတ်တဲ့ အစိမ်းလည်းမဟုတ်တဲ့ သန့်ရှင်းတဲ့ နိုင်ရေးသမားတွေကို ရွေးချယ်ခွင့် ရှိနေတယ်။ ဖြောင့်မတ်တဲ့ နိုင်ငံရေးသမားတွေကို ပြည်သူလူထု ရွေးချယ်ခွင့် ရှိနေတယ် မိမိနဲ့ တစ်သားတည်း ရပ်မယ့် နိုင်ငံရေး သမားတွေကို ရွေးချယ်ခွင့်ရှိနေတယ်ဆိုတာကို သတင်းစကားပေးလိုတယ်" ဟု ဒေါက်တာညိုညိုသင်းက ပြောကြားသည်။

ယင်းပြင် ရွေးကောက်ပွဲတွင် အနိုင်ရရှိပါက  ၎င်းရရှိမည့် လစာငွေ၏ ထက်ဝက်ကို ဒေသဖွံ့ဖြိုးရေး လုပ်ငန်းများအတွက် လစဉ် ပြန်လည်လှူဒါန်းပေးကာ သုံးစွဲမည်ဖြစ်ကြောင်းနှင့် ရွေးကောက်တွင် အနိုင်ရခဲ့ခြင်း မရှိပါကလည်း နိုင်ငံရေး မျိုးစေ့ချထားခြင်းကြောင့် တနင်္သာရီဒေသတွင် ပေါ်ပေါက်လာသော နိုင်ငံရေး မျိုးဆက်သစ်များကို စုစည်းပြီး တပ်ပေါင်းစုပုံစံ ဖွဲ့စည်း၍ ဒီမိုကရေစီ တတိယအင်အားစုစစ်စစ်ကို မွေးထုတ်ရန် အစီအစဉ်များစွာ ချထားကြောင်း ဒေါက်တာညိုညိုသင်းက ဆိုသည်။

 နိုင်ငံရေးသမားဆိုသည်မှာ ရွေးကောက်ပွဲကို မဖြစ်မနေ ဖြတ်သန်းရပြီး နိုင်ငံရေး သမားအများစုသည် လက်ရှိအချိန်တွင် NLD အားကောင်းနေချိန်ဖြစ်၍ရွေးကောက်ပွဲဝင်ရန် တွန့်ဆုတ်ကြကြောင်း၊ အတွေ့အကြုံရရန်အတွက်သာ ရည်ရွယ်ပြီး ရွေးကောက်ပွဲဝင်ကြသူ များကြောင်း နှင့် အနိုင်ရမည်ဟု ကြိမ်းသေမျှော်လင့်ပြီး ဝင်ရဲသော နိုင်ငံရေးသမားသည် ရှားပါးနေသည့်အချိန်ဖြစ်ကြောင်း ၄င်းက ပြောကြားသည်။ 

ဒေါက်တာညိုညိုသင်းသည် ၂၀၁၀ အထွေထွေရွေးကောက်ပွဲတွင် ဒီမိုကရက်တစ်ပါတီ (မြန်မာ) မှနေ၍ ရန်ကုန်တိုင်းဒေသကြီးလွှတ်တော် ဗဟန်းမြို့နယ် အမှတ် (၂) မဲဆန္ဒနယ်တွင် ဝင်ရောက်ယှဉ်ပြိုင် အနိုင်ရခဲ့သည်။

ထို့နောက် လွှတ်တော်ကိုယ်စားလှယ် သက်တမ်းအတွင်း ပါတီမှ နုတ်ထွက်ပြီး တစ်သီးပုဂ္ဂလ ကိုယ်စားလှယ်အဖြစ် ဆက်လက် ရပ်တည်ခဲ့သည်။

၂၀၁၅ အထွေထွေ ရွေးကောက်ပွဲတွင် NLD ပါတီကိုယ်စားပြု ဝင်ရောက်ယှဉ်ပြိုင်ရန် စီစဉ်ခဲ့သော်လည်း ပယ်ချခံခဲ့ရပြီးနောက် တစ်သီးပုဂ္ဂလ လွှတ်တော်ကိုယ်စားလှယ်လောင်းအဖြစ် ဗဟန်းမြို့နယ် ပြည်သူ့လွှတ်တော် ကိုယ်စားလှယ်နေရာကို ယှဉ်ပြိုင်ခဲ့ပြီး ရှုံးနိမ့်ခဲ့သည်။