Top News

ငြိမ်းချမ်းစွာ ဆန္ဒထုတ်ဖော်သော ပြည်သူများအား အကြမ်းဖက် ပစ်ခတ်ဖြိုခွဲမှုသည် ရာဇဝတ်ပြစ်မှုမြောက်သော ဆောင်ရွက်ချက်ဖြစ်၍ ပြင်းထန်စွာ ကန့်ကွက်ရှုတ်ချကြောင်း ပြည်ထောင်စုလွှတ်တော် ကိုယ်စားပြုကော်မတီ (CRPH) က ဖေဖော်ဝါရီ ၁၀ ရက်တွင် ထုတ်ပြန်သည်။

ဖေဖော်ဝါရီ ၉ ရက်က နေပြည်တော် သပြေကုန်းအဝိုင်း အနီးတွင် တပ်မတော် အာဏာရယူမှု ဆန့်ကျင်ဆန္ဒပြ သူများအား ရဲတပ်ဖွဲ့က ဖြိုခွင်းခြင်းကြောင့် အမျိုးသမီး တစ်ဦး၏ ဦးခေါင်း အပြင်းအထန် ဒဏ်ရာရခဲ့ပြီး အခြားသော ဒဏ်ရာရရှိသူများလည်း ရှိခဲ့ကြောင်း သိရသည်။

ဤပစ်ခတ်မှုကို ကျူးလွန်သော ရဲတပ်ဖွဲ့ တာဝန်ရှိသူနှင့်တကွ တာဝန်ရှိခေါင်းဆောင်များအား ဥပဒေနှင့်အညီ အရေးယူ အပြစ်ပေးနိုင်ရေး ဆက်လက် ဆောင်ရွက်သွားမည်ဟု ပြည်ထောင်စုလွှတ်တော် ကိုယ်စားပြုကော်မတီ (CRPH) က ထုတ်ပြန်သည်။

ဖေဖော်ဝါရီ ၉ ရက်က နေပြည်တော်၊ မန္တလေးနှင့် အခြားမြို့များတွင် အာဏာရယူမှုကို ဆန့်ကျင်သော ပြည်သူ့ဆန္ဒပြပွဲများအား အင်အား အလွန်အကျွံ အသုံးပြုလျက် ရေအမြောက်၊ ရော်ဘာကျည်၊ ကျည်အစစ်တို့ဖြင့် ပစ်ခတ်နှိမ်နင်းမှုကြောင့် နေပြည်တော် မျှဝေသောလက်များ၊ ပရဟိတအသင်းမှ အဖွဲ့ဝင် အသက် ၁၉ နှစ်အရွယ်ရှိ မမြတ်သက်သက်ခိုင်မှာ အသက်အန္တရာယ် စိုးရိမ်ရသည်အထိ ဦးခေါင်းတွင် သေနတ်ဒဏ်ရာ ရရှိခဲ့ကြောင်း၊ နေပြည်တော် အခြေစိုက် သတင်းထောက်တစ်ဦး အပါအဝင် အခြားထိခိုက်ဒဏ်ရာ ရသူများလည်း ရှိခဲ့သည်ဟု CRPH ၏ ထုတ်ပြန်ချက်တွင် ဖော်ပြထားသည်။

ပြည်သူများ အနေဖြင့်လည်း အာဏာရယူထားသည့် အုပ်စုအပေါ် ဥပဒေနှင့်အညီ အရေးယူ အပြစ်ပေးနိုင်ရေး အတွက် အနယ်နယ်အရပ်ရပ်တွင် ၎င်းတို့ကျူးလွန်သော ပြစ်မှုဆိုင်ရာ သက်သေအထောက်အထားများ စုဆောင်းထားရန် CRPH က တိုက်တွန်းသည်။

သတင်းအချက်အလက်များကို ပြည်ထောင်စုလွှတ်တော် ကိုယ်စားပြုကော်မတီ၏ တရားဝင် အီးမေးလ် ဖြစ်သော crph.official.mm@gmail.com နှင့် Facebook စာမျက်နှာ https//www.facebook.com/crph.official.mm သို့ ပေးပို့နိုင်ကြောင်း ထုတ်ပြန်ချက်တွင် ဖော်ပြထားသည်။

ပြည်ထောင်စု လွှတ်တော်၏ ပုံမှန်လုပ်ငန်းများ လုပ်ကိုင်နိုင်ရန် NLD ပါတီမှ ရွေးကောက်ခံ ပြည်ထောင်စု လွှတ်တော်ကိုယ်စားလှယ် ၁၅ ဦး ပါဝင်သည့် ပြည်ထောင်စုလွှတ်တော် ကိုယ်စားပြုကော်မတီ (CRPH) ကို ဖေဖော်ဝါရီ ၅ ရက်တွင် ဖွဲ့စည်းခဲ့သည်။