Top News

ဖေဖော်ဝါရီ ၁၀ ရက်က အမေရိကန်သမ္မတ ဂျိုးဘိုင်ဒင်သည် မြန်မာ့တပ်မတော် စစ်ဗိုလ်ချုပ်ကြီးများကို အာဏာစွန့်လွှတ်ရန် တိုက်တွန်းခဲ့ပြီး အမေရိကန် အစိုးရအနေဖြင့် အမေရိကန်တွင်ရှိသည့် မြန်မာအစိုးရ၏ ပိုင်ဆိုင်မှုများကို ထိန်းချုပ်မှု အပါအဝင် မြန်မာ့တပ်မတော်ကို အရေးယူမှုများ လုပ်ဆောင်မည့် အစီအစဉ်ကို ပြောကြားခဲ့သည်။

“မြန်မာတပ်မတော်အနေနဲ့ ဒေါ်အောင်ဆန်းစုကြည်နဲ့ သမ္မတ ဦးဝင်းမြင့် အပါအဝင် လက်ရှိထိန်းသိမ်းထားတဲ့ ဒီမိုကရေစီနိုင်ငံရေး ခေါင်းဆောင်တွေနဲ့ တက်ကြွလှုပ်ရှားသူတွေကို ချက်ချင်းပြန်လွှတ်ပေးဖို့ ဒီနေ့မှာ ကျွန်တော် ထပ်မံတောင်းဆိုပါတယ်” ဟု ပြီးခဲ့သည့် သီတင်းပတ်က မြန်မာနိုင်ငံတွင် ဖြစ်ပွားခဲ့သည့် အာဏာသိမ်းမှုနှင့် ပတ်သက်ပြီး ၎င်း၏နောက်ဆုံး မှတ်ချက်အဖြစ် ပြောကြားခဲ့သည်။

“တပ်မတော်ဟာ အာဏာကို စွန့်လွှတ် ရပါလိမ့်မယ်” ဟု ၎င်းကဆိုုသည်။

ထို့ပြင် ဘိုင်ဒင်က ၎င်း၏ အစိုးရအဖွဲ့သည် အမေရိကန်ရှိ မြန်မာအစိုးရ ရန်ပုံငွေ ဒေါ်လာတစ်ဘီလျံကို မြန်မာတပ်မတော်မှ မရယူနိုင်စေရန် ဆောင်ရွက်နေကြောင်းနှင့် မကြာမီအချိန်အတွင်း ပိတ်ဆို့မှုအသစ်များ ကြေညာသွားမည်ဟု ပြောကြားခဲ့သည်။

“အာဏာသိမ်းမှုကို ညွှန်ကြားတဲ့ တပ်မတော်ခေါင်းဆောင်တွေ၊ သူတို့ရဲ့ ကိုယ်ကျိုးစီးပွားတွေအပြင် သူတို့ရဲ့ နီးစပ်တဲ့ မိသားစုဝင်တွေကို ပိတ်ဆို့မှုတွေ ချက်ချင်းချမှတ်နိုင်မယ့် သမ္မတအုပ်ချုပ်ရေး အမိန့်သစ်ကို ကျွန်တော် အတည်ပြုပေးခဲ့ပါပြီ” ဟု ဘိုင်ဒင်က ပြောကြားခဲ့သည်။

ပစ်မှတ်ထား အရေးယူပိတ်ဆို့မည့် ပထမအသုတ်စာရင်းအား ယခုသီတင်းပတ်အတွင်း ၎င်း၏အစိုးရအဖွဲ့က ထုတ်ပြန်သွားမည်ဟု ဘိုင်ဒင်က ပြောကြားခဲ့သည်။

အမေရိကန်သည် မြန်မာနိုင်ငံအား ကူညီထောက်ပံ့မှုများကို ထိန်းချုပ်သွားမည် မဟုတ်ဘဲ အရပ်ဘက် လူမှုအဖွဲ့အစည်း သို့မဟုတ် လူသားချင်း စာနာထောက်ထားသည့် အဖွဲ့များကို တိုက်ရိုက်ကူညီ ပေးသွားမည်ဟု ဘိုင်ဒင်က ထပ်မံပြောကြားခဲ့သည်။

အမေရိကန်၏ ဥပဒေအရ အာဏာသိမ်းမှုဖြင့် အာဏာကို ရယူထားသည့် အစိုးရအဖွဲ့များကို ကူညီထောက်ပံ့မှုများကို တားမြစ်ထားသော်လည်း မြန်မာနိုင်ငံအား ရန်ပုံငွေထောက်ပံ့မှုများ အားလုံးကို အစိုးရမဟုတ်သည့် အဖွဲ့များမှတစ်ဆင့် ကူညီပေးသွားမည် ဖြစ်သည်။

တပ်မတော် ကာကွယ်ရေးဦးစီးချုပ် အပါအဝင် အာဏာသိမ်းမှုကို ဦးဆောင်သည့် ထိပ်သီးဗိုလ်ချုပ်ကြီးများသည် ဘင်္ဂါလီမွတ်စလင်များအား ဖိနှိပ်မှုများကြောင့် ယခင်ကတည်းက အမေရိကန်၏ ခရီးသွားလာရေးနှင့် ဘဏ္ဍာရေးဆိုင်ရာ ပိတ်ဆို့မှုများကို ခံခဲ့ရပြီး ဖြစ်သည်။

အမေရိကန် နိုင်ငံခြားရေးဌာန ပြောရေးဆိုခွင့်ရှိသူ နက်ဒ်ပရိုက်စ်ကလည်း အမေရိကန်သည် မဟာမိတ်နိုင်ငံများနှင့် ပူးပေါင်းပြီး မြန်မာတပ်မတော် ခေါင်းဆောင်များအပေါ် ဖိအားများပိုပေးရန် လုပ်ဆောင်သွားမည်ဟု ပြောကြားခဲ့သည်။

“ကျွန်တော်တို့ဟာ ကျွန်တော်တို့နဲ့ စိတ်သဘောထားချင်း တူညီတဲ့ မိတ်ဖက်တွေ၊ မဟာမိတ်နိုင်ငံတွေနဲ့ ပူးပေါင်းပြီး ဖိအားတွေကို ပိုပေးသွားနိုင်ပါလိမ့်မယ်” ဟု ပရိုက်စ်က ပြောကြားခဲ့သည်။