Top News

ဘာစီလိုနာအသင်းသည် စပိန်လက်ရွေးစင် ကွင်းလယ်တိုက်စစ်ကစားသမား အော်လ်မိုကို မှတ်ပုံတင်နိုင်ရန်အတွက် နူးကမ့်ကွင်းသစ်ရှိ VIP ထိုင်ခုံနေရာကို ယူရို သန်း ၁၀၀ ဖြင့် ရောင်းချရန် သဘောတူညီမှု ရရှိခဲ့ပြီဖြစ်ကြောင်း သိရသည်။

ဘာစီလိုနာအသင်းသည် အော်လ်မို (၂၆ နှစ်) ကို ပြီးခဲ့သည့် နွေရာသီအပြောင်းအရွှေ့ကာလတွင် လိုက်ပ်ဇစ်အသင်းမှ ယူရို သန်း ၆၀ ဖြင့် ခေါ်ယူခဲ့ပြီး ၂၀၃၀ ပြည့်နှစ်အထိ သက်တမ်းရှိသည့် ခြောက်နှစ်စာချုပ် ချုပ်ဆိုထားသည်။ သို့သော် ဘာစီလိုနာ အသင်းအနေဖြင့် လစာအသုံးစရိတ်ကန့်သတ်ချက် ကျော်လွန်နေသောကြောင့် ရာသီစတင်ချိန်အမီ မှတ်ပုံတင်နိုင်ခြင်းမရှိဘဲ ပွဲစဉ် (၃) မှသာ စတင်ကစားခွင့်ရခဲ့သည်။ 

လာလီဂါ ပြိုင်ပွဲက ၎င်းအတွက် မှတ်ပုံတင်ခြင်းကို ဒီဇင်ဘာ ၃၁ ရက်အထိသာ ခွင့်ပြုပေးထားခြင်းဖြစ်ပြီး ဘာစီလိုနာအသင်းက ရာသီကုန်အထိ မှတ်ပုံတင်နိုင်ရန် ထပ်မံကြိုးပမ်းသော်လည်း ကူးသန်းရောင်းဝယ်ရေးဆိုင်ရာတရားရုံးက ဒီဇင်ဘာ ၂၇ ရက်တွင် လက်မခံဘဲ ပယ်ချခဲ့သည်။ ဘာစီလိုနာအသင်းက ယင်းဆုံးဖြတ်ချက်ကို အယူခံဝင်ထားပြီး ယနေ့ ကြားနာစစ်ဆေးမည်ဖြစ်သည်။

ထို့ပြင် ဘာစီလိုနာအသင်းသည် အသစ်ပြင်ဆင်နေသည့် နူးကမ့်ကွင်းရှိ VIP ထိုင်ခုံ နေရာကို အရှေ့အလယ်ပိုင်းရင်းနှီးမြှုပ်နှံသူများထံ ယူရိုသန်း ၁၀၀ ဖြင့် ရောင်းချရန် သဘောတူညီမှုရရှိထားပြီဟု သတင်းများ ထွက်ပေါ်လျက်ရှိသည်။ ပထမအရစ်ပေးချေ မှုကို ဒီဇင်ဘာ ၃၁ ရက်မတိုင်မီ ပေးချေဖွယ်ရှိပြီး အော်လ်မိုကို အချိန်မီမှတ်ပုံတင်နိုင်ရန် ရည်မှန်းထားကြောင်း သိရသည်။