Top News

နိုင်ငံတကာရုပ်ရှင်ရုံများတွင် ရုံတင်ပြသမှုမှ ရုံဝင်ငွေဒေါ်လာ နှစ်သန်းကျော်ရရှိခဲ့သည့် သည်းထိတ်ရင်ဖို အိန္ဒိယဟာသဇာတ်ကား Roohi ကို Netflix အွန်လိုင်း ရုပ်သံလိုင်းတွင် ကြည့်ရှုနိုင်ပြီဖြစ်သည်။

Roohi ဇာတ်ကားကို ၂၀၂၀ ပြည့်နှစ် မတ်လတွင်ထုတ်လွှင့်ရန် ကနဦးစီစဉ်ခဲ့သော်လည်း COVID-19 ကူးစက်ပျံ့နှံ့မှုများ ဖြစ်ပွားနေခြင်းကြောင့် ဧပြီ ၁၇ ရက်၊ ဇွန် ၅ ရက်၊ ၂၀၂၁ ဖေဖော်ဝါရီ ၁၅ ရက်သို့ အကြိမ်ကြိမ် ရွှေ့ဆိုင်းခဲ့ရပြီးနောက် မတ် ၁၁ ရက်တွင်မှ အိန္ဒိယတွင် စတင်ပြသနိုင်ခဲ့ခြင်းဖြစ်သည်။

ယင်းဇာတ်ကားကို ကနဦးက Afzana ဟု အမည်ပေးခဲ့ခြင်းဖြစ်သော်လည်း ၂၀၂၁ ဖေဖော်ဝါရီတွင် ၁၅ ရက်တွင် ဇာတ်ကားအမည်ကို Roohi ဟု ပြောင်းလဲခဲ့သည်။

Roohi ဇာတ်ကားကို Jio Cinema ရုပ်သံလိုင်းတွင် ဧပြီ ၈ ရက်မှစ၍ ထုတ်လွှင့်ပြသခဲ့ပြီး Netflix တွင် ဧပြီ ၉ ရက်မှစ၍ ထုတ်လွှင့်ပြသခဲ့သည်။

အိန္ဒိယတွင် Roohi ဇာတ်ကားကို ပထမရက် ရုံတင်ပြသမှုမှ ရူပီးသန်း ၃၀ ကျော်ရရှိခဲ့ကာ ဒုတိယရက် ရုံတင်ပြသမှုတွင် ရူပီး ၂၂ သန်းကျော်၊ တတိယရက် ရုံတင်ပြသမှုတွင် ရူပီး ၃၄ သန်းကျော်၊ စတုတ္ထရက် ရုံတင်ပြသမှုတွင် ရူပီး ၃၈ သန်းကျော်ရရှိခဲ့သည်။

ဒါရိုက်တာ Hardik Mehta ရိုက်ကူးပေးထားပြီး ဟန္ဒီဘာသာစကားပြော Roohi ဇာတ်ကားသည် အသစ်စက်စက် ဇနီးမောင်နှံများ ပျားရည်စမ်းခရီးထွက်သည့်အချိန်အတွင် သတို့သမီးများကို ပြန်ပေးဆွဲလေ့ရှိသော လူမိုက်နှစ်ဦး၏အကြောင်းကို ဟာသနှောကာ ရိုက်ကူးတင်ဆက်ထားခြင်းဖြစ်သည်။

Bahura နှင့် Khattani အမည်ရှိ သူငယ်ချင်းနှစ်ဦးသည် ကြေးစားလူမိုက် Guiya Shakeel လက်အောက်တွင် အလုပ်လုပ်ကိုင်နေကြသူများဖြစ်သည်။ ၎င်းတို့၏အလုပ်သည် လက်ထပ်ထိမ်းမြားပြီးခါစ သတို့သမီးကို ပြန်ပေးဆွဲ၍ ထိုသတို့သမီးကို တစ်ဖက်သတ်ချစ်နေသည့် အခြားအမျိုးသားတစ်ဦးနှင့် ငွေကြေးအပေးအယူဖြင့် အတင်းအကျပ်လက်ထပ်ခိုင်းသည့် ဒုစရိုက်အလုပ်ကို လုပ်ကိုင်နေခြင်းဖြစ်သည်။

တစ်နေ့တွင် Roohi အမည်ရှိ သတို့သမီးတစ်ဦးကို ပြန်ပေးဆွဲရန် အလုပ်ရလာသောအခါ Bahura နှင့် Khattani တို့သည် အခက်အခဲများကြားမှ Roohi ကို ပြန်ပေးဆွဲနိုင်ခဲ့သော်လည်း Guiya က Roohi ကို သီးခြား လျှို့ဝှက်သည့်နေရာ၌ ထိန်းသိမ်းထားရန် ၎င်းတို့နှစ်ဦးအား ညွှန်ကြားခဲ့သည်။

ထိုအချိန်တွင် သူငယ်ချင်းနှစ်ဦးသည် သတို့သမီး Roohi ကို ဖမ်းဆီးစောင့်ကြည့်နေရာမှ Roohi မှာ ပုံမှန်အမျိုးသမီးတစ်ဦးမဟုတ်ဘဲ တစ္ဆေတစ်ကောင်ဝင်ပူးခံထားရသော သတို့သမီးဖြစ်နေသည်ကို Bahura က သိရှိသွားခဲ့ပြီးနောက် ၎င်းတို့သူငယ်ချင်းနှစ်ဦးနှင့် သတို့သမီး Roohi အကြား မည်သည့်အဖြစ်အပျက်များ ဖြစ်ပွားလာမည်၊ Roohi အား သတ်ဖြတ်ရန် Guiya ၏အမိန့်ပေးမှုကို သူငယ်ချင်းနှစ်ဦး မည်ကဲ့သို့ တုံ့ပြန်ကြမည်ဆိုသည်ကို Roohi ဇာတ်ကားတွင် ထိတ်လန့်တုန်လှုပ်ဖွယ် ဇာတ်လမ်း၊ ဇာတ်ကွက်များနှင့်အတူ ဟာသနှောကာ ရိုက်ကူးတင်ဆက်ထားခြင်းဖြစ်သည်။