Top News

အော်စကာဆန်ခါတင်စာရင်းဝင်ခဲ့သည့် စွန့်စားခန်းအန်နီမေးရှင်းဇာတ်ကား Wolfwalkers ကို နိုင်ငံတကာရုပ်ရှင်ရုံများတွင်ပြသမှုမှ ဝင်ငွေဒေါ်လာနှစ်သိန်းကျော်ရရှိခဲ့
24htopnews | December 28, 2024 6:12 PM CST

၉၃ ကြိမ်မြောက် အမေရိကန်ရုပ်ရှင် ထူးချွန်ဆုပေးပွဲတွင် အကောင်းဆုံးအန်နီမေးရှင်းဇာတ်ကား အော်စကာဆု ဆန်ခါတင်စာရင်းဝင်ခဲ့သော Wolfwalkers ဇာတ်ကားကို နိုင်ငံတကာရုပ်ရှင်ရုံများတွင် ရုံတင်ပြသမှုမှ ဝင်ငွေဒေါ်လာ နှစ်သိန်းကျော်ရရှိခဲ့သည်။

Wolfwalkers အန်နီမေးရှင်းဇာတ်ကားသည် ဒါရိုက်တာ Tomm Moore ၏ အိုင်ယာလန် ရှေးပုံပြင်ဇာတ်လမ်း နောက်ခံထားရိုက်ကူးထားသော အန်နီမေးရှင်းဇာတ်ကားသုံးကားထဲတွင် တတိယမြောက်နှင့် နောက်ဆုံးဇာတ်ကားလည်းဖြစ်သည်။ ကျန်ဇာတ်ကားနှစ်ကားမှာ ၂၀၀၉ ခုနှစ်က ထွက်ရှိခဲ့သော The Secret of Kells နှင့် ၂၀၁၄ ခုနှစ်ကထွက်ရှိခဲ့သည့် Song of the Sea အန်နီမေးရှင်းဇာတ်ကားတို့ဖြစ်သည်။

Wolfwalkers ဇာတ်ကားကို ၂၀၂၀ ပြည့်နှစ် စက်တင်ဘာ ၁၂ ရက်တွင် တိုရွန်တို အပြည်ပြည်ဆိုင်ရာရုပ်ရှင်ပွဲတော်၌ ပွဲဦးထွက်ပြသခဲ့ပြီး အောက်တိုဘာ ၂၆ ရက်တွင် ဗြိတိန်၊ နိုဝင်ဘာ ၁၃ ရက်တွင် အမေရိကန်၊ ကနေဒါတို့၌ စတင်ရုံတင်ပြသခဲ့ကာ ဒီဇင်ဘာ ၁၁ ရက်တွင် Apple+ ရုပ်သံလိုင်း၌ ထုတ်လွှင့်ပြသခဲ့သည်။ မြောက်အမေရိကရှိ သတ်မှတ်ထားသောရုပ်ရှင်ရုံများတွင် ၂၀၂၁ မတ် ၁၉ ရက်မှစ၍ ယင်းဇာတ်ကားကို ရုံတင်ပြသခဲ့သည်။

Wolfwalkers အန်နီမေးရှင်းဇာတ်ကားသည် ဆုအများအပြားရရှိထားပြီး အော်စကာ၊ ရွှေကမ္ဘာလုံးနှင့် BAFTA Awards ဆန်ခါတင်ဆုစာရင်းများတွင်လည်း ပါဝင်ခဲ့သည်။

ယင်းဇာတ်ကားထဲတွင် ပန်းချီဆန်ဆန် အသွင်ဆန်းသည့် အန်နီမေးရှင်းပုံရိပ်များကို ကြည့်ရှုခံစားရမည်ဖြစ်သည်။

၁၆၅၀ ပြည့်နှစ်အတွင်း အိုင်ယာလန်၌ Kilkenny မြို့နေဒေသခံများသည် ရှင်ဘုရင် Oliver Cromwell ၏ အမိန့်အရမြို့အနီးတွင်ရှိသော သစ်တောကိုရှင်းလင်းရန် အလုပ်လုပ်ကိုင်နေကြရသည်။ သစ်တောကို ခုတ်ထွင်ရှင်းလင်းရသည့် တစ်ခုတည်းသော အကြောင်းအရင်းမှာ ဝံပုလွေများကို သုတ်သင်ရှင်းလင်းရန်အတွက်ဖြစ်သည်။

ရှင်ဘုရင် Oliver ၏ လက်အောက်တွင် ဝံပုလွေသုတ်သင်ရှင်းလင်းရေး မုဆိုးတစ်ဦးအဖြစ် အမှုထမ်းနေသူ Sean Bean ၏ သမီး Robyn သည် ဖခင်ဖြစ်သူနှင့်အတူ တောအုပ်အတွင်း ဝံပုလွေရှင်းလင်းရေး စွန့်စားခန်းထွက်ရန် ဆန္ဒပြင်းပြနေသူဖြစ်သည်။ သို့သော် ဖခင်ဖြစ်သူမှာ ခွင့်မပြုခြင်းကြောင့် တစ်နေ့တွင် တောထဲ၌ ထောင်ချောက်ချရန်သွားသော ဖခင်နောက်သို့ တိတ်တဆိတ်လိုက်ရင်းဖြင့် ၎င်းနှင့်အသက်အရွယ်တူသည့် ဝံပုလွေစောင့်ရှောက်သူ Mebh နှင့်ဆုံတွေ့မိခဲ့သည်။ ထိုသို့ ဆုံတွေ့မိချိန်တွင် Mebh က Robyn ကို မတော်တဆကိုက်မိခဲ့ပြီး ယင်းဒဏ်ရာကို ကုသပေးပြီးနောက် ၎င်းတို့နှစ်ဦးမှာ ခင်မင်ရင်းနှီးသွားခဲ့သည်။

Mebh ၏ မိခင်ကို ဘုရင် Oliver က ဖမ်းဆီးထားကာ ဝံပုလွေများနေထိုင်ရာ တောအုပ်ကိုမီးရှို့ရန် ကြံစည်လာချိန်တွင် Mebh နှင့် Robyn တို့ ကြုံတွေ့ရင်ဆိုင်ရမည့် အခက်အခဲများ၊ တစ်ဦးကိုတစ်ဦး ဖေးမကူညီမှုများ၊ သူငယ်ချင်းနှစ်ဦး၏ သံယောဇဉ်၊ သားသမီးနှင့်မိဘကြားမှ ချစ်မေတ္တာတို့ကို Wolfwalkers ဇာတ်ကားတွင် ရိုက်ကူးတင်ဆက်ထားခြင်းဖြစ်သည်။


READ NEXT
Cancel OK