Top News

အော်စကာဆန်ကာတင်စာရင်း၌ ပါဝင်သည့် မင်းသားကြီး နက်ဘီတီ အသက် ၈၃ နှစ်အရွယ်၌ ကွယ်လွန်
24htopnews | December 28, 2024 6:12 PM CST

Network ၊ Superman နှင့် Toy Story 3 ဇာတ်ကားများကြောင့် ထင်ရှားပြီး အော်စကာဆန်ကာတင်စာရင်း၌ ပါဝင်သည့် မင်းသားကြီး နက်ဘီတီသည် ဇွန် ၁၃ ရက်တွင် အသက် ၈၃ နှစ်အရွယ်၌ ကွယ်လွန်သွားပြီ ဖြစ်ကြောင်း သိရသည်။

“ နက်ဟာ တနင်္ဂနွေနေ့နံနက်မှာ မိသားစုနဲ့ ချစ်ခင်သူတွေ ဝန်းရံလျက် အနိစ္စသဘောအတိုင်း ကွယ်လွန်သွားတာ ဖြစ်ပါတယ်” ဟု Shelter Entertainment Group ၏ မန်နေဂျာ ဒီဘိုရာမေလာက ပြောကြားခဲ့သည်။

“ နက်ဟာ အိုင်ကွန်တစ်ဦး၊ ဂန္ထဝင်တစ်ဦးဖြစ်တဲ့အပြင် ချစ်ခင်ဖွယ်ကောင်းတဲ့ မိတ်ဆွေတစ်ဦးလည်း ဖြစ်ပါတယ်။ သူ့ကို ကျွန်တော်တို့အားလုံး သတိရလွမ်းဆွတ်နေမှာပါ” ဟုလည်း ၎င်းက ပြောကြားခဲ့သည်။

ကန်တက်ကီပြည်နယ်သား နက်သည် ၁၉၇၂ ခုနှစ်တွင် Deliverance ဟူသည့် ရုပ်ရှင်ဇာတ်ကားဖြင့် သရုပ်ဆောင်လောကသို့ စတင်ဝင်ရောက်ခဲ့သူ ဖြစ်သည်။

ဘီတီသည် ယင်းရုပ်ရှင်ဇာတ်ကားတွင် အရှက်ကွဲအောင် မုဒိမ်းကျင့်သည့် ဇာတ်ဝင်ခန်း၌ သရုပ်ဆောင်ရာမှ ထင်ရှားလာခဲ့ပြီး ၂၀၁၃ ခုနှစ်အထိ ရုပ်ရှင်သရုပ်ဆောင်လောကတွင် ကျင်လည်ခဲ့သည်။

ရုပ်ရှင်ဇာတ်ကားပေါင်းများစွာ၌ ပါဝင်သရုပ်ဆောင်ခဲ့ရာတွင် Superman ၊ All the President’s Men နှင့် Homicide: Life on the Street (ရုပ်သံစီးရီး) တို့မှာ အထင်ရှားဆုံး ဖြစ်သည်။

ငယ်ရွယ်သော ရုပ်ရှင်ပရိသတ်တို့ကမူ ၂၀၁၀ ပြည့်နှစ်က ဇာတ်ကား Toy Story 3 ကို မှတ်မိကြဦးမည်ဖြစ်သည်။ နက်ဘီတီ ပါဝင်သရုပ်ဆောင်ခဲ့သည့် အဆိုပါရုပ်ရှင်ဇာတ်ကားသည် အကောင်းဆုံးရုပ်ရှင်ဇာတ်ကားအဖြစ် အော်စကာဆု ဆန်ကာတင်စာရင်းတွင် ပါဝင်ခဲ့သည်။

Network ရုပ်ရှင်ဇာတ်ကားတွင် နက်ဘီတီ၏ သရုပ်ဆောင်ခဲ့မှုသည် သူ၏ပထမဆုံးနှင့် တစ်ကြိမ်တည်းအဖြစ် အကောင်းဆုံး ဇာတ်ပို့ဆုအဖြစ်ဖြင့် အော်စကာဆန်ကာတင် စာရင်းတွင် ပါဝင်ခဲ့မှု ဖြစ်သည်။


READ NEXT
Cancel OK