Top News

တောင်ကိုရီးယားအမျိုးသားအဆိုတော်အဖွဲ့ B.A.P မှ အဖွဲ့ဝင် Himchan သည် ဇွန် ၁၃ ရက်ညက ကိုယ့်ကိုယ်ကိုယ် အဆုံးစီရင်ရန် ကြိုးပမ်းခဲ့ကြောင်း Star News သတင်းဌာနက ဇွန် ၁၄ ရက်တွင် ထုတ်ပြန်ခဲ့သည်။

ကိုယ့်ကိုယ်ကိုယ်အဆုံးစီရင်ရန် မကြိုးပမ်းမီအချိန်က Himchan သည် လိင်ပိုင်းဆိုင်ရာ နှောင့်ယှက်စော်ကားမှုနှင့် အရက်အလွန်အကျွံသောက်သုံးပြီး ကားမောင်းနှင်မှုနှင့်သက်ဆိုင်သော ၎င်းရင်ဆိုင်နေရသည့် အငြင်းပွားမှုများနှင့်ပတ်သက်၍ ၎င်း၏ Instagram အကောင့်တွင် တောင်းပန်စာ ရေးတင်ခဲ့ကြောင်း သိရသည်။

Himchan ၏ ကျန်းမာရေးအခြေအနေနှင့် အခြားသော ပြင်းထန်သည့် မတော်တဆ ဖြစ်ရပ်များ ထပ်မံမဖြစ်ပွားလာစေရေးအတွက် ကာကွယ်ဟန့်တားပေးနိုင်ရန် Himchan နှင့်ရင်းနှီးကျွမ်းဝင်သူများက Himchan ၏မိခင်ကို ဆက်သွယ်ခဲ့ကြကြောင်း သတင်းတွင် ဖော်ပြခဲ့သည်။

သတင်းထုတ်ပြန်ချက်များအရ Himchan သည် အသက်အန္တရာယ်စိုးရိမ်ရသည့် အခြေအနေတွင် မရှိဘဲ လတ်တလောတွင် နေအိမ်၌ အနားယူနေကြောင်း သိရသည်။

မိမိကို ယုံကြည်သူများနှင့် မိမိ၏လုပ်ရပ်များနှင့်ပတ်သက်၍ မိမိအား စောင့်ဆိုင်းနေသူများအားလုံးကို တောင်းပန်လိုကြောင်း၊ ယခုအကြောင်းအရာကို အချိန်နှောင်းမှ ပြောကြားရသည့် အကြောင်းအရင်းများစွာ ရှိကြောင်း၊ အမှန်တရားနှင့် ကွဲလွဲနေသည့် အကြောင်းအရာများ၊ ဆောင်းပါးအများအပြား ထွက်ရှိနေခြင်းကြောင့် မိမိမှာ တိတ်တဆိတ်နေထိုင်ခဲ့ရကြောင်း၊ မိမိ၏ ပေါ့ဆမှုနှင့် အမှားများကို သိရှိပြီး အရာအားလုံးအတွက် တောင်းပန်ကြောင်းကို Himchan က ဇွန် ၁၃ ရက်တွင်Instagram ၌ ရေးတင်ခဲ့သည်။

၂၀၁၈ ခုနှစ်တွင် အမျိုးသမီးတစ်ဦးကို မဖွယ်မရာ လုပ်ရပ်ကျူးလွန်ခဲ့မှုဖြင့် ၂၀၂၁ ဖေဖော်ဝါရီတွင် ဆိုးလ်ဗဟိုခရိုင်တရားရုံးက Himchan အား ထောင်ဒဏ် ၁၀ လ ချမှတ်ခဲ့သည်။