Top News

နွမ်းပါးသူများအတွက် အလုပ်လုပ်ရန် အရင်းအနှီးငွေထုတ်ပေးကာ ကူညီလှူဒါန်းလျက်ရှိသည့် သရုပ်ဆောင် မေနွယ်ထွန်းက အွန်လိုင်းစီးပွားရေးလုပ်ငန်းများအတွက် ၎င်း၏ Facebook Page မှ ကြော်ငြာနိုင်မည့် အစီအစဉ်ပြုလုပ်ထားသည်ဟု သိရသည်။

အဆိုပါအစီအစဉ်ကို သူ၏လူမှုကွန်ရက်စာမျက်နှာဖြစ်သည့် May New Htun Facebook Account တွင် Post တင်ကာ ပြုလုပ်ပေးထားခြင်းဖြစ်ကြောင်း သိရသည်။

ယင်းအစီအစဉ်နှင့်ပတ်သက်၍ သရုပ်ဆောင် မေနွယ်ထွန်းက “အခုလိုအချိန်မှာ စီးပွားရေးလည်း ကျပ်တည်းကြတယ်။ ဆွိအရင်ကဆို ဆိုင်တစ်ခုကို ကြော်ငြာ Post တင်ပေးတယ်ဆို အနုပညာကြေးရတယ်။ အခုလိုအချိန်မှာ ဘယ်သူမှ အဆင်မပြေလို့ ဆွိအကောင့်မှာလဲ Follower တွေ နည်းနည်းရှိတဲ့အတွက် ဆွိကူညီနိုင်တာလေး လုပ်ပေးချင်ပါတယ်။ ဆွိ ဒီ Post အောက်မှာ Online ကနေ စျေးရောင်းတဲ့သူလေးတွေကို ရောင်းချင်တာကို ကိုယ့်ဆီမှာ ဘာရတယ်ဆိုတာကို မန့်မှာဝင်ကြော်ငြာလို့ရတယ်နော်။ စားချင်တဲ့သူကလည်း မန့်ကနေကြည့်ပြီး ကြိုက်တာဝယ်စားကြပေါ့။ ပစ္စည်းဆိုလည်း ဝယ်ကြပေါ့။ မြို့ကိုတော့ သေချာရေးနော်။ ဖုန်းနံပါတ်တို့။ အဆင်ပြေကြပါစေ။ ဆွိလည်းဝယ်စားမယ်နော်။ ပစ္စည်းဆိုလည်း ကြိုက်ရင်အားပေးမယ်ရှင်” ဟု သူ၏ လူမှုကွန်ရက် စာမျက်နှာတွင် ရေးသားထားသည်။

လက်ရှိတွင် သရုပ်ဆောင် မေနွယ်ထွန်းသည် သက်ကြီးရွယ်အိုများနှင့် အရင်းအနှီး တစ်ခုရရှိရန်လိုအပ်နေသည့် စျေးသည်များအတွက် ထောက်ပံ့ငွေများပေးအပ်ခြင်း၊ ကျန်းမာရေးအတွက် ငွေကြေးအကူအညီနှင့် အခမဲ့ကုသနိုင်မည့် ဆေးခန်းများအား ဆက်သွယ်ချိတ်ဆက်ပေးခြင်းများအပြင် အခြားသောအကူအညီလိုအပ်နေသူများအား အလှူရှင်များနှင့်စုပေါင်းကာ လှူဒါန်းမှုများပြုလုပ်နေလျက်ရှိသည့် အနုပညာရှင်တစ်ဦးဖြစ်သည်။

“ညီမအနေနဲ့ အခုနောက်ပိုင်းမှာ ကိုယ်တတ်နိုင်သလောက် အလှူလေးတွေ လုပ်ဖြစ်ပါတယ်။ ကိုယ်တိုင်က အခုချိန်မှာ အနုပညာအလုပ်တွေ နားထားရတာက အချိန်အတော်ကြာသွားပြီဖြစ်တဲ့အတွက် ဝင်ငွေနည်းနေပေမဲ့ ကိုယ့်ရှိတဲ့အင်အားအနည်းငယ်မှာ အခြားသောအလှူရှင်တွေက ဆက်လက်ပါဝင်လှူဒါန်းပေးကြတဲ့အတွက်သာ ဆွိအနေနဲ့ အခုလို အလှူအတန်းတွေကို ဆက်တိုက်လုပ်ဖြစ်နေတာပါ” ဟု သရုပ်ဆောင် မေနွယ်ထွန်းက ဆိုသည်။

သရုပ်ဆောင် မေနွယ်ထွန်းနှင့် အလှူရှင်များသည် ဇွန်လအတွင်းမှာပင် စျေးရောင်းရန် အရင်းအနှီးလိုအပ်နေသည့် အဘိုးအဘွားများ၊ ကင်ဆာဆေးသွင်းရန် အခက်အခဲဖြစ်နေသည့် ဝေဒနာရှင်များ၊ ကျောက်ကပ်ဆေးရန် အခက်အခဲဖြစ်နေသည့်လူနာများ၊ ကလေးမီးဖွားရန် အခက်အခဲဖြစ်နေသည့် ကိုယ်ဝန်ဆောင်မိခင်တစ်ဦးနှင့်အတူ အကူအညီလိုလာရောက်တောင်းခံသည့် အခဲအခက်ကြုံနေရသူများကို လှူဒါန်းမှုများပြုလုပ်ခဲ့ကြပြီးဖြစ်ကြောင်း သိရသည်။