Top News

Miss World Myanmar 2018 2nd Runner Up အလှမယ်ယမုံက ဆုရရှိခဲ့သည့် သရဖူအား မဲဖောက်ပေးပြီး လှူဒါန်းမှုများ ပြုလုပ်မည်ဖြစ်ကြောင်း သိရသည်။

အဆိုပါအစီအစဉ်အတွက် အလှမယ်ယမုံသည် သူ၏ဆုရသရဖူအား ငွေကျပ်သိန်း ၃၀ ဖြင့် ကနဦးရောင်းချရန် စီစဉ်ခဲ့သော်လည်း ပါဝင်လှူဒါန်းလိုသူများသည့်အတွက် မဲများရောင်းချကာဆုမဲအဖြစ် ဖောက်ပေးသွားရန် စီစဉ်ခဲ့ခြင်းဖြစ်ကြောင်း သိရသည်။ ယင်းအစီအစဉ်အတွက် မဲတစ်မဲလျှင် ငွေကျပ်တစ်သောင်းသတ်မှတ်ကာ ရောင်းချခဲ့ပြီး ဆုမဲသုံးရာအထိ ရောင်းချသွားမည်ဟု သိရသည်။ သို့သော် ယင်းအစီအစဉ်အား လူမှုကွန်ရက်မှ ကြေညာပြီး ၁၂ နာရီအတွင်း မဲပေါင်း ၂၀၀ ကျော်အထိ ရောင်းချခဲ့ရပြီးဖြစ်ကြောင်း သိရသည်။

“ညီမအနေနဲ့ လှူဒါန်းမှုအစီအစဉ်တွေကို တောက်လျှောက်လုပ်ဖြစ်နေတာပါ။ COVID ကာလတွေအတွင်းကစပြီး အလှူတွေ ဆက်တိုက်လုပ်ဖြစ်တယ်။ အစပိုင်းကတော့ ကိုယ့်ဘက်ကလည်း တတ်နိုင်သလောက် ထည့်ဝင်လှူဒါန်းပြီး ပါဝင်လှူဒါန်းကြသူတွေရဲ့ လှူဒါန်းမှုတွေနဲ့ပါပေါင်းပြီး လှူဒါန်းမှုတွေ ဆက်တိုက်လုပ်ဖြစ်တာပါ။ နောက်ပိုင်း အနုပညာဝင်ငွေမရှိတော့တဲ့အခါ ကိုယ့်အနေနဲ့ အလှူတွေလည်း ဆက်ပြီးလုပ်ချင်နေတာဖြစ်တဲ့အတွက် သရဖူကိုရောင်းဖို့ အစပိုင်းကလည်း စီစဉ်ခဲ့တယ်။ ဒါပေမဲ့လည်း လက်ရှိနိုင်ငံရေးအခြေအနေတွေဖြစ်လာတဲ့အတွက် အဲဒီအစီအစဉ်က မလုပ်ဖြစ်ခဲ့ဘူး။ လက်ရှိအချိန်မှာ အားလုံးကအခက်အခဲအကျပ်အတည်းတွေနဲ့ ရင်ဆိုင်နေရတယ်။ ကိုယ်ပိုင်ကလည်း ဝင်ငွေကနည်းတော့ ဒီဆုရသရဖူကို သိန်း ၃၀ နဲ့ရောင်းပြီး လှူမယ်လို့ စီစဉ်ဖြစ်ခဲ့တာပါ။ ဒါပေမဲ့ အခုလိုအချိန်မှာ အလှူရှင်တစ်ဦးတည်းအတွက် ငွေကျပ် သိန်း ၃၀ ဆိုတာ များနေမှာစိုးတဲ့အတွက် လူအများလည်း ပါဝင်နိုင်ပြီး အများအတွက် အရမ်းကြီးမခက်ခဲလောက်တဲ့ မဲတစ်မဲကို ငွေကျပ်တစ်သောင်းသတ်မှတ်ပြီး အဲဒီထဲကမှ ဆုအဖြစ်နဲ့ ဒီသရဖူကိုပေးမယ်လို့ စီစဉ်ခဲ့တာပါ။ ဒီသရဖူက ငွေကျပ်သိန်း ၃၀ မကတန်ပါတယ်။ နောက်ပြီး သရဖူရောင်းရတဲ့ငွေကျပ် သိန်း ၃၀ လုံးကို ကင်းမရွာအတွက် လှူဒါန်းသွားမှာပါ။ အဲဒီနောက်ပိုင်း ဝင်လာတဲ့အလှူငွေတွေကိုတော့ ကင်းမရွာနဲ့ အခြားလိုအပ်နေတဲ့နေရာတွေကို ခွဲဝေလှူဒါန်းသွားဖို့ စီစဉ်ထားပါတယ်” ဟု အလှမယ်ယမုံက ဆိုသည်။

အဆိုပါ Miss World Myanmar 2018 2nd Runner Up ဆုရသရဖူအတွက် ဝယ်ယူထားသည့်မဲများကို ဇွန် ၂၅ ရက်တွင် အလှမယ်ယမုံက သူ၏လူမှုကွန်ရက်စာမျက်နှာတွင် Live လွှင့်ကာ မဲဖောက်ပေးသွားရန် စီစဉ်ထားသည်ဟု သိရသည်။

“ညီမအနေနဲ့ မဲဖောက်တာကို ဇွန် ၂၅ ရက်နေ့မှာ Live လွှင့်ပြီး ပြုလုပ်သွားဖို့ ရှိပါတယ်။ ဒီကြားထဲမှာက မဲလိပ်တွေစီစဉ်ရမှာရှိသလို အဲဒီမဲဖောက်ပေးတဲ့အချိန်မတိုင်ခင်မှာ ညီမအနေနဲ့ ကင်းမရွာအတွက် လှူဒါန်းမှုကိုပြုလုပ်ပြီး Live မှာ လှူဒါန်းပြီးစီးကြောင်းလေး ပြချင်တာကြောင့်ပါ” ဟု အလှမယ်ယမုံက ဆက်လက်ရှင်းပြခဲ့သည်။

COVID ကပ်ရောဂါ မြန်မာနိုင်ငံတွင် စတင်ဖြစ်ပွားခဲ့ပြီးနောက်ပိုင်းတွင် အလှမယ်ယမုံသည် အခြားသောအလှူရှင်များနှင့်အတူ အခက်အခဲဖြစ်နေသူများ လိုအပ်သည့်နေရာများသို့ လှူဒါန်းမှုများကို ဆက်တိုက်ပြုလုပ်ခဲ့သည့် အလှမယ်တစ်ဦးဖြစ်သည်။

အလှမယ် ယမုံသည် Miss World Myanmar 2018 2nd Runner Up ဆုအပြင် ၂၀၁၇ ခုနှစ် Miss Crown ဆုကိုလည်းကောင်း ၂၀၁၉ ခုနှစ်တွင် Miss Myanmar 2019 2nd Runner Up ဆုကိုလည်းကောင်း ရရှိခဲ့သည့် အလှမယ်တစ်ဦးဖြစ်သည်။ ထို့ပြင် ၂၀၁၄-၂၀၁၈ ခုနှစ် မြန်မာ့ရုပ်ရှင်ထူးချွန်ဆုရွေးချယ်ပွဲတွင်လည်း ရွှေကြိုအဖြစ် ပါဝင်ခဲ့သူဖြစ်သည်။ ယင်းအပြင် Forever Group Co.,Ltd. ၏ Talent Management Center ၏ သရုပ်ဆောင်သစ်တစ်ဦးအဖြစ် ရွေးချယ်ခြင်းခံထားရသည်ဟုလည်း သိရသည်။