Top News

အရေးပေါ် စစ်အုပ်ချုပ်ရေးအမိန့် ကြေညာခဲ့သည့် တောင်ကိုရီးယားသမ္မတ ယွန်းဆော့ယိုအား စွဲချက်တင်ဆိုနိုင်ရေး ထောက်ခံအားပေးခဲ့သည့် အိုင်ယူအပါအဝင် အနုပညာရှင်များအား  နိုင်ငံရေး ရှေးရိုးစွဲအမြင်ရှိနေ သူများက မကျေမနပ်ဖြစ်နေကြကာ အမေရိကန် ဗဟိုထောက်လှမ်းရေး အေဂျင်စီ(စီအိုင် အေ)သို့ သတင်းပို့တိုင်ကြားမှုများ ပြုလုပ်ထားကြသည်။

ဒီဇင်ဘာ ၁၇  ရက်တွင် ကိုရီးယား အွန်လိုင်းရပ်ကွက်တစ်ခုဖြစ်သည့်  DC Inside သုံးသူတစ်ဦးက သမ္မတယွန်း စွဲချက်တင်ခံရရေးကို အားပေးခဲ့သည့် ကိုရီးယားအနုပညာရှင်များကို တစ်စုတစ်စည်းတည်း ဖော်ပြခဲ့ သည်။ ထို့ပြင် ၎င်းတို့အား စီအိုင်အေသို့ တိုင်ကြားရန်လည်း အခြားလူများကို တိုက်တွန်းထားသည်။

အဆိုပါအနုပညာရှင်များစာရင်းတွင်  အိုင်ယူ ၊ New Jeans အဖွဲ့ ၊ Stayc အဖွဲ့၊ Girls’ Generation အဖွဲ့ဝင်ယူရီ ၊ ဟာသသရုပ်ဆောင် ပတ်မြောင်ဆူ ၊ မင်းသားလီဒုံဝု နှင့် အန်ဘိုဟွန်းတို့လည်း ပါဝင်ကြသည်။ ၎င်းအနုပညာရှင်များက သမ္မတကို စွဲချက်တင်ရေး တောင်းဆိုဆန္ဒပြမှုများကို အားပေးသည့် လုပ်ရပ်များ ပြခဲ့သည်ဟု သတ်မှတ်ခံရသည်။

ဥပမာအိုင်ယူ ၊ New Jeans နှင့် ယူရီတို့က ဆန္ဒပြသူများအား စားစရာနှင့်သောက်စရာများ  အခမဲ့ ဝေပေးခဲ့ပြီး ယူရီက Girls’ Generation အဖွဲ့၏ Into The New World သီချင်းကို ဆန္ဒပြပွဲများတွင် အသုံးပြုခွင့်ပေး ခဲ့သည်။

အခြားသော DC Inside သုံးသူများကလည်း စီအိုင်အေသို့ တိုင်ကြားထားသည်များကို screenshot ပုံများ တင်လာကြပြီး ထိုသို့ တိုင်ကြားထားသည့်အတွက် ၎င်းအနုပညာရှင်များ အမေရိကန်သို့ ပြည်ဝင်ခွင့်ခက်သွား နိုင်သည်ဟု ယူဆနေကြသည်။

ထို့ပြင် ၎င်းတို့က အိုင်ယူ၏ အင်စတာ ဂရမ်အကောင့်တွင် အမုန်းစကားများ သွားရေးကြပြီး “ လွတ်လပ်ခွင့်ရဲ့တန်ဖိုးကို မသိသူ”ဟု ခေါ်ဝေါ်ခဲ့ကြသည်။

မလိုသူများ မည်မျှပင် ရှိနေသော်လည်း အိုင်ယူသည် ဘက်စုံထူးချွန်သူအဖြစ် ၊ ကိုရီးယား၏ နံပါတ်တစ် အဆိုတော်အဖြစ် Billboard ကရွေးချယ်ထားသူ ဖြစ်သည်။ နယ်ပယ်စုံတွင် တစ်ပြိုင်တည်း အောင်မြင် နေသူက အိုင်ယူတစ်ဦးတည်းရှိသည်ဟု  Billboard ကဆိုသည်။