Top News

ထိုင်းနိုင်ငံတွင် မြန်မာ့အရေးနှင့်ပတ်သက်၍ အာဆီယံနိုင်ငံခြားရေးဝန်ကြီးများ အလွတ်သဘောဆွေးနွေးပွဲကို ဒီဇင်ဘာ ၂၀ ရက်၌ ပြုလုပ်ခဲ့ပြီး ယင်းဆွေးနွေးပွဲအပြီးတွင် စင်ကာပူနိုင်ငံခြားရေးဝန်ကြီး ဗီဗီယန်ဘာ လာခရစ်ရှ်နန်က ဒေါ်အောင်ဆန်းစုကြည်အား လွှတ်ပေးရန်တောင်းဆိုကြောင်းကို ၎င်း၏ ဖေ့ဘွစ်အကောင့်တွင် ရေးသားထားသည်။

အဆိုပါအစည်းအဝေးတွင် မြန်မာနိုင်ငံနှင့်သက်ဆိုင်သည့် ဘုံသဘောတူညီချက် ငါးရပ်အကောင်အထည်ဖော်ရေးအပြင် စင်ကာပူနိုင်ငံခြားရေးဝန်ကြီးက မြန်မာနိုင်ငံ၏လက်ရှိအခြေအနေကို ဆွေးနွေးတင်ပြခဲ့သည်။

မြန်မာနိုင်ငံနှင့် သက်ဆိုင်သော ဘုံသဘောတူညီချက်ငါးရပ်အကောင်အထည်ဖော်ရေးကိစ္စကို ဆွေးနွေးသည့် အလွတ်သဘောဆွေးနွေးပွဲသို့ လက်ရှိအာဆီယံဥက္ကဋ္ဌ လာအို၊ ယခင်အာဆီယံဥက္ကဋ္ဌ အင်ဒိုနီးရှား၊ နောင်လာမည့် အာဆီယံဥက္ကဋ္ဌ မလေးရှားနိုင်ငံတို့ နိုင်ငံခြားရေးဝန်ကြီးများအပါအဝင် အာဆီယံကိုးနိုင်ငံမှ ကိုယ်စားလှယ်များလည်း တက်ရောက်ခဲ့ကြောင်း သိရသည်။

စင်ကာပူနိုင်ငံခြားရေးဝန်ကြီး ဗီဗီယန်ဘာလာခရစ်ရှ်နန်က ၎င်းတို့အနေဖြင့် စိုးရိမ်သည်မှာ မြန်မာပြည်သူများအတွက် ငြိမ်းချမ်းရေး၊ ကြွယ်ဝရေး၊ တိုးတက်ရေးပင်ဖြစ်ကြောင်း ပြောကြားသည်။

“ကျွန်တော်တို့ဟာ မြန်မာတပ်မတော် အာဏာပိုင်တွေက လေးစားရမယ့် ဘုံသဘောတူညီချက်ငါးရပ်ကို ထပ်လောင်းအတည်ပြုခဲ့ပါတယ်။ အကြမ်းဖက်တာတွေ ချက်ချင်းရပ်ရမှာဖြစ်ပါတယ်။ မြန်မာရဲ့ အရေးပါတဲ့ အဖွဲ့အစည်းတွေအကြားလုပ်ဆောင်တဲ့ အပြုသဘော အပြန်အလှန်ဆွေးနွေးတာဟာ ငြိမ်းချမ်းပြီး တာရှည်ခံတဲ့ ဖြေရှင်းနည်းအတွက် အရေးကြီးပါတယ်။ အမျိုးသားရင်ကြားစေ့ရေးအတွက် အရေးပါတဲ့ ဒေါ်အောင်ဆန်းစုကြည်ကို ချက်ချင်းပြန်လွှတ်ပေးဖို့ ကျွန်တော်တောင်းဆိုပါတယ်” ဟု စင်ကာပူနိုင်ငံခြားရေးဝန်ကြီးက ပြောကြားသည်။

ထိုင်းနိုင်ငံတွင် မြန်မာ့အရေးနှင့်ပတ်သက်၍ အလွတ်သဘော ဆွေးနွေးပွဲကို နှစ်ရက်တာ ကျင်းပခဲ့ခြင်းဖြစ်ပြီး ဒီဇင်ဘာ ၁၉ ရက်က မြန်မာနိုင်ငံ၏အိမ်နီးချင်းနိုင်ငံများဖြစ်သည့် အိန္ဒိယ၊ တရုတ်၊ ဘင်္ဂလားဒေ့ရှ်၊ လာအိုနှင့်  ထိုင်းနိုင်ငံတို့မှ ကိုယ်စားလှယ်များ သီးခြားတွေ့ဆုံဆွေးနွေးခဲ့ခြင်းဖြစ်ကာ ယင်းဆွေးနွေးပွဲကို မြန်မာနိုင်ငံခြားရေးဝန်ကြီး ဦးသန်းဆွေလည်း တက်ရောက်ဆွေးနွေးခဲ့သည်။